MINAANNIRANNA MINAAMARA
3: Mimmito Ayirrisa
HATTO YAA MAYYAATE?
Mimmito ayirrisanno minaanninna minaama mittu coyira sumuu yaa hooganno woyite nafa, mimmito baxanno. Mittu maxaafi togo yaanno: “Togoo minaanninna minaama, ‘Ani yoommotilla ikkito’ yee yiinore cuꞌmiꞌre digiwanno. Hatteentenni, kawa kaꞌaa higinonsa coye hasaawanno. Insa galtensa hedo ayirrinyunni macciishshanno; hakkiinni lamunkura woyyannore hedanno.”—Teni Lesensi tu Tiransiformi Yuuri Meereji.
QULLAAWU MAXAAFI BIDDISHSHA: “Baxillu [umisira] diroorsiꞌranno.”—1 Qorontoosi 13:4, 5.
“Minaamaꞌya ayirriseemmo daafira, ise lowori gede assite laꞌanno coye naadeemmo; qoleno, iseno adhamankeno gawajjannore mittoreno assa dihasiꞌreemmo.”—Mayika.
HASIISSANNOHU MAYIRAATI?
Minaanninna minaama mimmito ayirrisannokkiha ikkiro, hasaawanno woyite mimmito bushiishanno, coyinni kisanno, hattono woffi assanno. Xiinxallaano yitanno garinni, togoo akatta adhama martuwa marte diigantannota leellishshannote umi malaattaati.
“Minaamakki xissiisannore coyiꞌra, ise coyinni kisa woy ise daafira haariima qara baꞌanno gedenna ammaꞌnitannohekki gedella assitanno; hattono adhamaꞌne gawajjitanno.”—Biriyaani.
MAA ASSA DANDAATTO?
ATENEETO LAYIꞌRI
Mitte lamala geeshsha, galtekki ledo heedhe assattorenna hasaabbinanni gara wodanchate woꞌnaali. Hakkiinni ateneeto togo yite xaꞌmi:
‘Galteꞌya mishe coyiꞌroommohu meꞌꞌe higeeti? Galatoommosehu meꞌꞌe higeetiyya?’
‘Galteꞌya ayirriseemmota leellishannore maa maa assoommo?’
AANTE NOO XAꞌMUWA GALTEꞌNE LEDO HASAABBE
Atinna galtekki mimmito ayirrissinannita leellishate kuꞌu kuꞌuyira maa assa woy mayyaa dandiitinanni?
Mimmito ayirrissinannikkiha lawannohu maa assitinirooti woy mayitinirooti?
KAAꞌLITANNO AMAALE
Galtekki ayirrissannoheta leellishshara hasiꞌrattota sase doogo woraqataho borreessi. Iseno ati ayirrisattosera hasidhannota sase doogo borreessito. Hakkiinni woraqata ateha isera, iseha kayi atera uyiteenna, hattee doogganni mimmito ayirrissinannita leellishate sharramme.
Galteꞌneta baxxinanni akatta borreesse. Hakkiinni tenne akatta lowo geeshsha naaddinannita kuꞌu kuꞌuyira kulle.
“Minaannaꞌya ayirriseemmaha ikkiro, naadeemmasitanna hagiirraamo ikkara hasiꞌreemmata leellishannore asseemma. Tennera woꞌmanka woyite lowore assa hasiissannoe yaa diꞌꞌikkino; hatteentenni, duucha hige asseemmahu shiimmaaddu coyi ayirriseemmasita leellishara dandaanno.”—Meegani.
Atera galtekki ayirrissanni noottoha lawahera dandaanno; qaru coyi kayinni galtekki ayirrisattoseta huwataseeti.
QULLAAWU MAXAAFI BIDDISHSHA: “Mararro, joongille, shaqqille, shooshanqenna cinca, uddanote gede assitine uddidhe.”—Qolasiyaasi Sokka 3:12.
