Maarta: Keereho Daraaro? Tenne Yesuusi Kiristoosi reyo Qaagooshshi Ayyaanira dawotta daafira lowo geeshsha hagiidhoomma. * Hakko barra gambooshshu hiittooti?

Daraaro: Danchaho; yinoonniri gudisamella dileellinoena. Ani afoommahu mannu Yesuusi ilaminoha Gannanna kaosi ayyaana Faasika ayirrisannaati ikkinninna reyosi ayyaana ayirrisanna afe diegennoomma.

Maarta: Halaale yootta, Gannunna Faasiku alame woˈmate egennamino ayyaanaati. Yihowa Farciˈraasine kayinni Yesuusi reyo Qaagooshshe ayirrisa hasiissannota ammantanno. Shiima yanna nooheha ikkiro, konne ayyaana ayirrisa hasiissinohu mayiraatiro kuleemmahe.

Daraaro: Maahoyye, shiima yanna nooena kulie.

Maarta: Yihowa Farciˈraasine Yesuusi reyo Qaagooshshi Ayyaana ayirrissannohu, isi harunsaanosi konne ayyaana ayirrissanno gede hajajino daafiraati. Hanni Yesuusi reyara albaanni noo hashsha mayi ikkinoro laˈno. Isi hakko hashsha ammanantino harunsaanosi ledo baxxino hurbaate itinota qaagatta?

Daraaro: Mootichu Hurbaate yaakkiiti?

Maarta: Ee. Hakko hashsha Yesuusi harunsaanosi maa assa hasiissannonsaro xawise kulinonsa. Hanni isi Luqaasi 22:19 aana yiinore nabbawattayya?

Daraaro: Maahoyye. “Qoleno, tima haare galata uyi gedensaanni, hiiqqe insara oye togo yii: ‘Kuni kiˈne daafira uyinanni maalaˈyaati yaate. Konne ayewoteno qaagooshshiˈyara asse.’”

Maarta: Galateemmahe. Yesuusi konni biddishshira jeefote, “Konne ayewoteno qaagooshshiˈyara asse” yiinonsata huwati. Yesuusi harunsaanosi iso qaaggara kulansara albaanni, isi daafira qaaga hasiissannonsari maatiro xawise kulinonsa. Isi heeshshosi harunsaanosi daafira sayise aannota coyiˈrino. Yesuusi Maatewoosi 20:28 aanano tenne assaawe ledo sumuu yaannore coyiˈrino. Tini xiqise togo yitanno: “Manchu Beetti dayinohu soqqammasira ikkikkinni soqqamaranna heeshshosi lowo mannira wodo asse aaraati.” Haranchunni, Yihowa Farciˈraasine diru dirunku gamba yite Yesuusi reyo qaagooshshi ayyaana ayirrissannohu isi shiqishinota wodote kakkalo qaagateeti. Isi reyo hajajamanno manni baalu heeshsho afiˈranno faro fantino.

Daraaro: Yesuusi reyinohu ninke heeshsho afiˈnammoraati yinanna macciishshoomma. Halaale coyiˈniro kayinni, kuni hiitto ikke ikkannoro diafoomma.

Maarta: Hige konne coye buuxoottakkiti ate calla diˈˈikkootta. Yesuusi wodore kulanno rosi hawa gede huwantanniha diˈˈikkino. Ikkirono Maganu Qaali giddo noohu lowonta hagiirsiisanno halaali  giddo mittu konneeti. Afummana shiima geeshsha lende hasaawate yanna heedhannohe?

Daraaro: Ee, shiima geeshsha lende hasaambummoro qarru dino.

Maarta: Maahoyye. Wodote daafira nabbawoommare hanni haranse kuleemmahe.

Daraaro: Ishshi.

Maarta: Wodo maatiro huwatate, balanxe hunda Addaaminna Heewani Edeni gannatete cubbo loossu wote ikkinore afa hasiissannonke. Roomu Sokka 6:23⁠te noo assaawe nabbawa tenne huwatate kaaˈlitannonke. Hanni tenne xiqise nabbawattayya?

Daraaro: Ishshi. Togo yitanno: “Cubbu damoozi reyote; Maganu Mootichinke Kiristoosi Yesuusi widoonni aanno elto kayinni hegere heeshshooti.”

Maarta: Galateemmahe. Hanni koye kulloonniha mitto mittonka coye laˈno. Balaxxe xiqise mayite hanaffannoro lai: “Cubbu damoozi reyote.” Maganu umonni manna kalaqi yannara, cubbu damoozi woy qorichi reyo ikkanno gede higge fushshino. Hige umi qara cubbaataamu dino. Addaaminna Heewani kalaqaminohu guunte noonsare ikkeeti; wonaatiro oosonsa baalantino guuta ikkite ilantanno. Hakko daafira reyinanni gede assannori diheeˈrannonka. Addaamiranna Heewanira, hattono oosonsa baalantera hagiidhitanni hegerera heedhanno faro faˈnantinonsa. Kayinni anfummonte gede, coyi hatto diˈˈikkino; ikkinoni?

Daraaro: Diˈˈikkino. Addaaminna Heewani hoolloonni haqqicho guma itino.

Maarta: Gara yootta. Addaaminna Heewani Maganoho hajajama gibbe tenne assansa cubboho. Hakko daafira guunte noonsakkirenna cubbaataamma ikka doodhitino. Tenne doodhansa insara calla ikkikkinni oosonsa baalantera lowo qarra naqqino.

Daraaro: Hiitto?

Maarta: Tenne huwatatta gede hanni mitto lawishsha kuleemmahe. Hiittooti buddeena gana baxatta?

Daraaro: Ee! Baxeemma.

Maarta: Hanni lawishshaho, haaro buddeenu mixashsho hidhootta yine hendo. Tini mixashsho buddeena mitte higge nafa gaˈnitakkinni gaˈnite hiinxidhu. Tenne hiinxidhino mixashshora gaˈnatta buddeeni baalunku maa adhe kaˈˈanno? Hiinxa adhe kaˈˈannoha dilawannohe?

Daraaro: Ee, hiinxa adhe kaˈˈanno.

Maarta: Hatteente gede, Addaaminna Heewani Maganoho hajajama gibbu yannara, cubbunninna guuntete xeˈnenni “hiinxidhino” woy musidhino. Insa cubbaataamma ikkitinohu ooso iltara albaanni ikkino daafira, baalanti oosonsa hattee “hiinxa” woy muso adhite ilantino. Cubbaataamma ikkitino yaate. Qullaawu Maxaafi giddo cubbo yaanno qaali meessa loonsanni cubbo calla ikkikkinni ragiˈnoonni cubbono kulannoho. Soˈro ikkinore assinoommokkiha ikkirono, woy Addaaminna Heewani cubbo loossu yannara ilammoommokkiha nafa ikkirono, insa cubbi sirchinsa gudisame ninkeno gantummokki guuntete xeˈnenna cubbo ragiˈne gumulote reyineemmore ikkineemmo gede assinonke. Roomu Sokka 6:23⁠te aana nabbambummonte gede cubbu qorichi reyote.

Daraaro: Tini kayinni gara dilabbannoe. Addaaminna Heewani loossino cubbinni mannu baalu hegerera qarramannohu mayiraati?

Maarta: Yaakki garaho—tini gara dilabbanno. Ikkollana heda hasiissannonkeri wolurino no. Maganu guuta taashshosinni Addaaminna Heewani loossino cubbinni reyitanno gede wossanino; ikkirono insa ooso ikkinoommori ninke hexxo noonkekkire ikkinammora diagurino. Maganu konni buutote qarri giddonni fulleemmo doogo qixxeessinonke. Yesuusiti wodote kakkalo hasiissinohu iseraati. Hanni galagalle Roomu Sokka 6:23 laˈno. Tini xiqise “cubbu damoozi reyote” yitu gedensaanni, aantete “Maganu Mootichinke Kiristoosi Yesuusi widoonni aanno elto kayinni hegere heeshshooti”  yitanno. Konni daafira cubbunna reyotenni ganteemmo doogo fantinonketi Yesuusi reyooti. *

Maarta: Tenne xiqise giddo kulammahera hasiˈroommahu wolu coyino no.

Daraaro: Maatikka?

Maarta: Tini xiqise, “Maganu Mootichinke Kiristoosi Yesuusi widoonni aanno elto kayinni hegere heeshshooti” yitannota wodanchi. Ninke daafira qarraminohunna reye heeshshosi sayise uyinohu Yesuusa ikkina, tini xiqise “Yesuusi aanno elto” yaa agurte “Maganu aanno elto” yitannohu mayiraati? *

Daraaro: Diiwe afoomma.

Maarta: Addaaminna Heewani kalaqinohu Maganoho; qoleno insa Edenete kaashshu basera cubbo loossu wote baddaltinohu isooti. Isi umo kalaqinori lamu manni finqiltinosi daafira lowo geeshsha dadillinoti dihuluullissannote. Ikkirono Yihowa mitto mala qixxeessinota bayichonko kulino. * Isi ayyaanaame kalaqosi giddonni mittu uullara daye guuta mancho ikke heeˈranno gede, jeefoteno heeshshosi wodote kakkalo asse shiqishanno gede assate alaamu noosita kulino. Konni daafira, wodote kakkalo gudisidhe Maganu eltooti yaa garankolla. Wodote kakkalo Maganu elto ikkitinoti wole doogono no. Yesuusa shini wote Maganoho mayi macciishshaminosiro hedde egennootta?

Daraaro: Hede diegennoomma.

Maarta: Koye xullote qaaqquullu godoˈlanni worinore laoomma. Hakko daafira qaaqquullu nooheha lawannoe.

Daraaro: Ee, mittu labbaahunna mitte meya qaaqqo nooe.

Maarta: Ooso iloottata ikkootta daafira leellannohena, hanni Yesuusi reyi wote iimi Annisira, Yihowara mayi macciishshaminosiro hedi. Isi iima heeˈre muxxe Beettosi amandanna, qacifantannanna tuntuˈmotenni gannanna lai wote mayi maciishshamannosiha lawannohe? Qoleno Beettosi misimaaretenni ganne haqqaho suntanna hakkiinnino qarrame reyanna lai wote mayi macciishshaminosi?

Daraaro: Lowo geeshsha xissiisiˈrinoha lawannoe. Konni albaanni tenne hede diegennoomma!

Maarta: Hige hakko barra Maganoho mayi macciishshaminosiro gudinse afa didandiineemmo. Ikkirono isi dadillarano hagiidharano dandaannota anfoommo; qoleno kuni baalu coyi ikkara fajjinohu mayiraatirono anfoommo. Mitte lowo manni afino xiqise yaano Yohaannisi 3:16 tenne dancha gede assite kultanno. Hanni tenne xiqise nabbawattayya?

Daraaro: Ishshi. Togo yitanno: “Maganu alame lowo geeshsha baxino daafira, Beettosi ammanannota loosunni leellishannohu baalunku hegere heeshsho afiˈranno gede ikkinnina baˈˈannokki gede, mitto Beettosi uyino.”

Maarta: Galateemmahe. Hanni tini xiqise umo yitannore galagalte lai. “Maganu alame lowo geeshsha baxino daafira” yitanno. Qaru coyi baxilleho. Baxillu, Maganu Beettosi ninke daafira reyara uullara soyanno gede assinosi. Addaho wodote kakkalo geeshsha baxille leellishannori woluri dino. Yihowa Farciˈraasine diru dirunku gamba yite Yesuusi reyo qaagooshshe ayirrissannohu tenne qixxaawo qaagateeti. Hasaawinke kaaˈlinoheri nooha lawannohe?

Daraaro: Ee, lowo geeshsha kaaˈlinoe. Haja assite dagge konne baala kuloottae daafira galaxxeemmahe.