‘Heeshshote yaa boohaarate, loosate, adhanna adhamate, ile lossiꞌratenna geedha callate?’ yite hedde egennootto? (Iyyoobi 14:1, 2) Qullaawu Maxaafi lowo geeshsha hayyoota ikkino mannira nafa tini xaꞌmo huluullitinonsata kulanno.—Mekibibi 2:11 nabbawi.

Isi heeꞌneemmohu mayiraati? Balanxe, heeshsho hanaffinohu hiittoonniitiro afa hasiissannonke. Batinyu manni, surrenkenna wole bisinke kifilla dhagge ikkanno garinni loosantino gara huwati gedensaanni hayyichu Kalaqaanchi kalaqinonketa ammanino. (Faarso 139:14 nabbawi.) Hatto ikkiro, isi kalaqinonkehu mulla diꞌꞌikkino yaate! Kalaqammoommo korkaata bade afanke heeshshonke waagu noota ikkitinota huwanteemmo gede assitannonke.

Maganu umi labbaahanna meyaata maassiꞌri gedensaanni hagiirsiisanno looso uyinonsa. Isi hedo insa uulla woꞌmitanno gede, ise gannate assitanno gedenna hegerera heedhanno gedeeti.—Kalaqo 1:28, 31 nabbawi.

Mannu ooso Maganu gashshootira finqiltuta hedosi woꞌmitukki keeshshitino. Ikkollana, Maganu manna facci asse diagurino; qoleno hedosi disoorrino. Qullaawu Maxaafi, Maganu ammanamino manna gatisatenna uullate hedinore wonshate loosanni keeshshinota kulannonke! Konni daafira, Maganu atino isi hedinote gedee heeshsho afiꞌrattora hasiꞌranno! (Faarso 37:29 nabbawi.) Qullaawa Maxaafa xiinxallite, Maganu hedo woꞌmitanno wote horo afiꞌratto gara rosi.