AANIIDI QOOLIHA COYI UMO
Maganu Ola Olammannita Baxanno?
Tenne xaꞌmora dawaro maati yaatto? Batinyu manni Maganu olammara fajjino yee hedanno. Kuni manni Maganu hundi waro mite soqqamaanosi ola olantanno gede hajajino yaanno; Qullaawu Maxaafino tenne buuxisanno. Wolu manni kayinni, Maganu Beetti Yesuusi harunsaanosi diinnansa baxxanno gede rosiisinota huwatino. (Maatewoosi 5:43, 44) Hakko daafira, kuni manni Maganoho alba olaho noosi hedo gedensaanni soorrantinotanna yannankera ola olammara fajjinokkita coyiꞌranno.
Aterana ma lawannohe? Maganu ola olammara fajjinoni? Hatto ikkiro, yannankera olu kaꞌꞌanno wote hiikkuri widira hige haꞌlanno? Kuri xaꞌmuwara dawaro afiꞌrakki, olu daafira noohe hedo galagalte layiꞌratto gede assitahera dandiitanno. Lawishshaho, Maganu olammara fajjinoha calla ikkikkinni, ati kaaꞌlitanni nootto garora haꞌlanni noota afittoro, ate garo qeeltannota huwatootto daafira hagiidhattora dandaatto. Ikkollana, Maganu diinnakki garora kaaꞌlanni noota huwatittoro mayi macciishshamannohe? Hatto ikkiro, ayera haꞌla hasiissannohero galagalte layiꞌrattoti egennantinote.
Ikkollana, mittu roore hasiisanno coyi no. Maganu ola ma garinni laꞌꞌannoro afakki, isira noohe lao soorritara dandiitanno. Mannu kayisanno oli wolu lowo miliyoone ikkanno manni gede ateno baasa gawajjinoheha ikkiro, aante noo xaꞌmuwara dawaro afiꞌra hasiꞌrittokki digatatto: Maganu mitu manni hedanno gede ola baxannohanna olu manna gadachara hasiꞌrannoha ikkinoni? Woy olunni gawajjamanno manna afinori nookkihu gede ikke sammi yee laꞌꞌannoni?
Qullaawu Maxaafi qolanno dawaro, tenne hedonni lowo geeshsha baxxitinota ikkitinota afatto wote dhagge ikkahera dandaanno. Qoleno, Maganoho olu daafira noosi hedo hundinni kayisse xaa geeshsha disoorrantino. Hanni Qullaawu Maxaafi hundi waronna umi xibbi diro yaano Yesuusi uullate aana noo waro Maganu ola ma garinni laꞌꞌanno yaannoro laꞌno. Tenne afanke Maganu yannankera ola ma garinni laꞌꞌannoronna olu albillitteno heeꞌrannotanna teꞌee huwanteemmo gede kaaꞌlitannonke.
