Daawuloosinna durriissa manna lowo geeshsha gawajja dandiitanno; Qullaawu Maxaafi, ‘Tini gobba [alame] gudisante bushunni amadantino’ yaannohu iseraati. (1 Yohaannisi 5:19) Qullaawu Maxaafi, Daawuloosi manna gawajjate horoonsiꞌranno hayyo bade kulanno.

•   Soꞌrisiisa. Qullaawu Maxaafi, Kiristaanu ‘Sheexaanu xagarro ittisanno’ gede amaalanno. (Efesooni Sokka 6:11) Sheexaanu horoonsiꞌranno xagarro giddo mitte, mannu iso riqibbannore Maganu soqqamaanooti yee ammananno gede assate.—2 Qorontoosi 11:13-15.

•   Durriissate looso. Sheexaanu manna soꞌrisiisate ekera hasaawissannore, kiilaano, qaalloolenna ayyaanto horoonsiꞌranno. (Marro 18:10-12) Jingilli assitanno xagga adha, hipinootiizime, hattono hiincate kaaꞌlitanno yinanni hayyonni surre fano assiꞌra manna durriissa gawajjitanno gede assitanno.—Luqaasi 11:24-26.

•   Kaphu ammaꞌno. Kaphu roso rosiissanno ammaꞌno mannu Maganoho hajajamannokki gede assitanno. (1 Qorontoosi 10:20) Qullaawu Maxaafi togooha kaphu roso ‘durriisu roso’ yaanno.—1 Ximootewoosi 4:1.

•   Manna amada. Qullaawu Maxaafi giddo bushu ayyaani amadino mannire kultanno xagge no. Durriissa amaddino manni ballino, danqino woy umonsa gawajjino woyiti no.—Maatewoosi 12:22; Maarqoosi 5:2-5.

Daawuloosi gawajjannonketa gargadha dandiineemmohu hiittoonniiti?

 Qullaawu Maxaafi Daawuloosi giwanna hooꞌla dandiineemmo gara kulannonke daafira, iso gawajjannonke yine waajjinanni heeꞌra dihasiissannonke:

•   Sheexaanu horoonsiꞌranno hayyo afanke isi ‘xagarronni’ dogammeemmokki gede kaaꞌlitannonke.—2 Qorontoosi 2:11.

•   Qullaawa Maxaafa xiinxalli hattono rosoottore loosu aana hosiisi. Qullaawu Maxaafi biddishsha loosu aana hosiisakki Daawuloosi gawajjonni agartannohe.—Efesooni Sokka 6:11-18.

•   Durriissate loosi ledo xaado afiꞌrinoha baalanka coye huni. (Soqqamaasinete Looso 19:19) Huna hasiissannohe coyibba giddo mitu durriissate loosi ledo xaadooshshe afiꞌrino sirba woy muuziiqa, maxaaffa, metseetta, poosterranna viidiyubbate.