Mikaeeli (mite ammaꞌno yitanno garinni, “Qullaawu Mikaeeli”) Yesuusi uullara daara albaanninna wirro gordo haꞌri gedensaanni woshshinannisi suꞌmaati. a Mikaeeli Muse reyi gedensaanni Sheexaanu ledo coyiꞌramino; hattono mitto sokkaasincho masaalaanchu Daanieelira Maganu sokka iillishanno gede kaaꞌlino. (Daanieeli 10:13, 21; Yihuda 9) Mikaeeli Maganu gashshootira hale ikke, hattono Maganu diinna ledo olame suꞌmisi tiro garinni heeꞌranno; Mikaeeli yaa “Maganu Gedeehu Ayi No?” yaate.—Daanieeli 12:1; Yohaannisi Ajuuja 12:7.

 Yesuusi sokkaasinete roorricha Mikaeeliiti yineemmohu mayiraatiro hanni laꞌno.

•   Mikaeeli ‘sokkaasinete roorrichaati.’ (Yihuda 9) “Sokkaasinete albisa” yitanno tiro afiꞌrinohu “sokkaasinete roorricha” yaannohu maaragete suꞌmi Qullaawu Maxaafi giddo lame bayicho calla no. Lamenka bayicho kuni suꞌmi haammata kiiro ikkikkinni mitto roorricha kulanno; hakko daafira konne suꞌma afiꞌrino sokkaasinchi mitto callaho yaate. Tenne qummeeshshuwa giddo mittu, reyotenni kainohu Mootichu Yesuusi “hajajote hirbinni, sokkaasinete roorrichi huuronni . . . gordunni [daannota]” kulanno. (1 Teselonqe 4:16) Yesuusi “sokkaasinete roorrichi huuronni” daannohu sokkaasinete roorricha Mikaeeli ikkino daafiraati.

•   Mikaeeli sokkaasinete olanto hajajanno. “[Mikaeelinna] sokkaasinesi dhudhuufu” yaano Sheexaanu ledo olantino. (Yohaannisi Ajuuja 12:7) Mikaeeli ‘sokkaasinete albisanna’ ‘jawa sokkaasincho’ yaamamasi, ayyaanu alame giddo lowo silxaane noosita leellishshanno. (Daanieeli 10:13, 21; 12:1) Haaru Gondoori xiinxallaanchi Deevidi E. Eyuni yiinonte gede, tini maaragete suꞌmuwa, Mikaeeli “sokkaasinete olanto giddo baalunkura aliidi roorricha” ikkinota buuxissanno.

   Qullaawu Maxaafi sokkaasinete olanto hajajannoha wole mitto roorricha calla kulanno. Maganu Qaali, “Mootichu Yesuusi wolqaataame sokkaasinesi ledo wala yitanno giiranni gordunni daanno” yaanno. (2 Teselonqe 1:7, 8; Maatewoosi 16:27) Yesuusi ‘gordo haꞌreenna,’ “sokkaasine, gashshaanonna wolqaataammu angasira higganno” gede assinoonni. (1 Pheexiroosi 3:21, 22) Maganu qullaawa sokkaasinesira lame addi addi hajajaano Yesuusanna Mikaeeli woranno yee heda ikkannokki coyeeti. Hatteentenni, lamunku suꞌmi yaano Yesuusino Mikaeelino mittu roorrichi suꞌmaati yaa roore ammansiissannote.

•   Mikaeeli konni albaanni ikke egenninokkihu “lowo qarri” daanno yannara “leellanno” woy kaꞌꞌanno. (Daanieeli 12:1) Daanieeli maxaafi giddo, mitto baxxino coye assate kaꞌanno mootoolla kulate duucha hinge “kaꞌꞌa” yaanno qaale horoonsiꞌnoonni. (Daanieeli 11:2-4, 21) “Maganu Qaale” yaamaminohu Yesuusi Kiristoosi, ‘Mootoollete Mooticha’ ikkasinni Maganu diinna baalanta qase qeelatenna Maganu manna agarate baxxino coye assanno. (Yohaannisi Ajuuja 19:11-16) Isi konne assannohu “kalaqamunni kayise xaa geeshsha ikke egenninokkihu gedensaannino ikkannokkihu lowo qarri daanno” yannaraati.—Maatewoosi 24:21, 42.