Yesuusi kakkalo, Maganu mannu ooso cubbunninna reyotenni gatisate qixxeessino qixxaawooti. Qullaawu Maxaafi duꞌnantinoti Yesuusi mundee wodo ikkitinonketa kulanno. (Efesooni Sokka 1:7; 1 Pheexiroosi 1:18, 19) Hakko daafira, Yesuusi uullara dayinohu “lowo manna wode gatisate lubbosi sayise aara” ikkinota coyiꞌrino.—Maatewoosi 20:28.

‘Lowo mannira wodo’ hasiissinohu mayiraati?

 Umi manchi Addaami guuta woy cubbu noosikkiha ikke kalaqamino. Isira hegerera heeꞌrate hexxo noosiha ikkirono, Maganoho hajajama giwe tenne huꞌnino. (Kalaqama 3:17-19) Isi oososirano cubbo ragisiisino. (Roomu Sokka 5:12) Qullaawu Maxaafi Addaami konni garinni isonootonna oososi cubbohonna reyote borojje asse ‘hirinota’ kulanno. (Roomu Sokka 7:14) Addaami ooso baalanti guuntete xeꞌne noonsare ikkitino daafira isi huninore qola didandiitanno.—Faarso 49:7, 8.

 Maganu, Addaami ooso hexxo noonsakkire ikkitino daafira mararinonsa. (Yohaannisi 3:16) Ikkollana, Maganu taashsho baxannoha ikkino daafira, cubbonsa lashshi asse saꞌꞌa woy mulla kae gatona yaa didandaanno. (Faarso 89:14; Roomu Sokka 3:23-26) Maganu mannu ooso baxanno daafira, taashshote daafira fushshino wodho agurikkinni, cubbinsara maaro afidhanno gede calla ikkikkinni cubbinsa baꞌꞌanno gede doogo qixxeessino. (Roomu Sokka 5:6-8) Wodote kakkalo Maganu tennera qixxeessino qixxaawooti.

Wodo kaaꞌlitannonkehu hiittoonniiti?

 Qullaawu Maxaafi giddo, “wodo” yaanno qaali aane nooha sase coye kulanno:

1.   Baatooshshe.—Kiiro 3:46, 47.

2.   Mitore agursiisate woy woxxate baantannire.—Fulo 21:30.

3.   Woxxinanni coyi ledo taalo waaga afidhino. a

 Hanni Yesuusi Kiristoositi wodote kakkalo konne sasenka coye wonshitino gara laꞌno.

1.   Baatooshshe. Qullaawu Maxaafi Kiristaanu ‘waagunni hidhinoonniha’ ikkinota kulanno. (1 Qorontoosi 6:20; 7:23) Hakku waagi Yesuusi mundeeti; isi mundeesinni “gaꞌre baala, addi addi afoo coyiꞌrannoha baala, gosanna sircho baala” Maganoho wodino.—Yohaannisi Ajuuja 5:8, 9.

2.   Agursiisa. Yesuusiti wodote kakkalo cubbonke ‘agursiissinonke’ woy cubbu anganni keere fushshitinonke.—1 Qorontoosi 1:30; Qolasiyaasi Sokka 1:14; Ibiraawoota 9:15.

3.   Taalo waaga. Yesuusi kakkalo Addaami huninote guuta mannu heeshsho ledo taalote. (1 Qorontoosi 15:21, 22, 45, 46) Qullaawu Maxaafi togo yaanno: “Mittu manchi Addaami hajajama giweenna lowo manni cubbaataamo ikkinte gede, Kiristoosi hajajamanni lowo manni keeraaꞌmanno.” (Roomu Sokka 5:19) Tini, mittu manchi reyo lowo mannira wodo ikkitannohu hiittoonniitiro leellishshanno. Isinni Yesuusi kakkalo, wodote kakkalonni horo afiꞌrate assa hasiissannonsare assanno “manna baala cubbuwiinni” gatissanno.—1 Ximootewoosi 2:5, 6.