E masani ona iloa rane poʻa e nonofo i laau i Iapani, i le auala e latou te fetagisi faalausosoo ai. E tusa lava pe tele ni rane poʻa o loo fetagisi faatasi, ae e mafai lava ona iloa tagi a rane taʻitasi. I Iapani, na iloa ai e tagata e suʻesuʻe i rane, e māfua ona matilatila tagi a rane poʻa taʻitasi, ona o le maopoopo o le auala e fetagisi ai rane poʻa o loo iai i se mea se tasi, agaʻi i rane fafine.

 Ia Mātau: E fetagisi rane poʻa e nonofo i laau i Iapani ina ia tosina mai ai rane fafine. E sau le tagi a le rane mai i lona alāleo, ona faasolo lea ina leotele pe a oo mai i le vaega o lona faaʻī lea e pei o se taga e puta ma toe māui.

 E faapefea ona iloa le eseesega o tagi a rane poʻa taʻitasi? Ua iloa nei e tagata suʻesuʻe, nai lo o le fetagisi uma o rane i le taimi e tasi, e faasolosolo ona fetagisi taʻitasi nei rane. O lenei auala atamai, e ʻalofia ai le felavasaʻi o leo ma manino ai leo o tagi a rane taʻitasi, ae faasaoina ai foʻi le malosi. E lē gata i lea, o le maopoopo o le auala e fetagisi faasolosolo ai rane, e maua ai le taimi e mālōlō ai.

 O le auala maopoopo e fetagisi ai rane e nonofo i laau i Iapani, ua uunaʻia ai tagata suʻesuʻe i fesootaʻiga ina ia faaleleia le auala e feaveaʻi ai le tele o faamatalaga, e aunoa ma le felavasaʻi. O le iʻuga, ua vave ma maufaatuatuaina le auala e feaveaʻi ai faamatalaga, ma ua faaitiitia le malosiaga o le eletise e alu ai.

 O le ā sou manatu? Pe na teʻi lava ua iai i rane e nonofo i laau i Iapani le tomai e fetagisi ai i se auala maopoopo? Pe na foafoaina?