E lē o taʻua i le Tusi Paia po le ā le taimi na amata foafoa ai e le Atua le vateatea, ma po le ā foʻi le umi. O loo faapea mai: “Na foafoaina e le Atua le lagi ma le lalolagi i le amataga.” (Kenese 1:1) E lē o taʻua patino i le Tusi Paia le taimi “i le amataga” na foafoaina ai. Peitaʻi, na muamua foafoaina le vateatea i le faasologa o mea na foafoaina ia e faamauina i le tusi o Kenese, lea e taʻua o vaitaimi e ono po o “aso” o le foafoaga.

•  Po o aso e ono o le foafoaga e faasino atu i aso e taʻi 24 itula le uumi?

•  O le ā na tupu a o faasolo aso e ono o le foafoaga?

•  Pe e saʻo atoatoa faamatalaga faasaienisi o loo i le tusi o Kenese?

•  O le ā le taimi na foafoaina ai le lā, masina ma fetu?

•  O le ā le umi talu ona iai le lalolagi e tusa ai o le Tusi Paia?

 Leai. I le Tusi Paia, e faasino atu le upu “aso” i ni vaitaimi e eseese le uumi, e faalagolago lava i le siʻomaga o loo faaaogā ai le upu. O se faaaʻoaʻoga, i se vaega o lenei mau o loo faamatala ai le vaitaimi atoa o le foafoaga, i le aso e tasi.—Kenese 2:4.

 Na suia e le Atua le lalolagi sa “gaogao ma soona nunumi” i se lalolagi paneta e ʻainā e tagata. (Kenese 1:2) Ona ia fofoaina lea o meafaiola i le lalolagi. O loo faamatala i le Tusi Paia vaega e ono o mea na foafoaina a o faasolo aso e ono po o vaitaimi o le foafoaga:

•  Aso 1: Na faasusulu mai ai e le Atua le malamalama i le laueleele ma tuueseese ai loa le ao ma le pō.—Kenese 1:3-5.

•  Aso 2: Ua faia e Ieova le vanimonimo e vā aʻi vai i luga aʻe o le vanimonimo ma lalo ifo o le vanimonimo.—Kenese 1:6-8.

•  Aso 3: Ua faia e le Atua ina ia aliaʻe le eleele mātūtū. Na ia foafoaina foʻi le vao ma laau.—Kenese 1:9-13.

•  Aso 4: Ua faia e le Atua le lā, masina ma fetu ina ia iloa atu ma susulu mai i le laueleele.—Kenese 1:14-19.

•  Aso 5: Na foafoaina e le Atua meaola i le sami ma manufelelei.—Kenese 1:20-23.

•  Aso 6: Na foafoaina e le Atua meaola o le laueleele ma tagata.—Kenese 1:24-31.

 Ina ua maʻea le aso lona ono, ona mālōlō ai lea o le Atua mai ana galuega, po ua taofia galuega o le foafoaga.—Kenese 2:1, 2.

 O faamatalaga a le Tusi Paia e faatatau i le foafoaga o le lalolagi, e lē o matuā auʻiliʻili mai faamatalaga faasaienisi o loo iai. Nai lo lea, o loo faamatalaina le foafoaga i se auala e faigofie ona malamalama ai tagata faitau, e oo lava i tagata i le taimi o le Tusi Paia, i le faasologa o mea na foafoaina e le Atua. O le tala o le foafoaga e lē feteenaʻi ma mea ua faamaonia e le faasaienisi. Na tusi se Saienitisi e igoa iā Robert Jastrow: “E eseese uma faamatalaga, ae o vaega autū lava o le faasaienisi e tutusa ma le tala o le foafoaga i le Kenese. O le faasologa o mea na foafoaina se ia oo i le foafoaina o le tagata e matuā saʻo ma manino, i le taimi tonu na tupu ai.”

 Ua leva ona iai le lā, masina ma fetu auā o ni vaega o “le lagi” lea sa ʻfoafoaina i le amataga.’ (Kenese 1:1) Peitaʻi e leʻi mafai ona susulu mai lona malamalama i le laueleele ona o le mafiafia o le vanimonimo. (Kenese 1:2) E ui lava na tau vavala mai le malamalama i le aso muamua, ae lē iloa po o fea e sau mai ai lenā malamalama. I le aso lona fā, ua amata ona manifi atu le vanimonimo. Ua faapea mai le Tusi Paia, ua amata ona “susulu mai i le lalolagi” le lā, le masina ma fetu, ma o loo faamatala i se auala e pei ua iloa atu e se tagata mai le laueleele lenā malamalama.—Kenese 1:17.

 E lē o taʻua i le Tusi Paia le umi talu ona iai le lalolagi. E pei ona faamatalaina i le Kenese 1:1, e iai le amataga o le vateatea ma le lalolagi. E lē feteenaʻi lenei manatu ma talitonuga o saienitisi i le umi talu ona iai le lalolagi.