Pe e Aʻoaʻoina e le Tusi Paia le Toe Ola Mai i se Isi Tino?

PLAY

Tali a le Tusi Paia

E leai. E lē o taʻua i le Tusi Paia lenā aʻoaʻoga. O le talitonuga o le toe ola mai i se isi tino, e faavae mai i le aʻoaʻoga o le ola pea o le agaga pe a oti le tagata. a Peitaʻi, o loo aʻoaʻoina i le Tusi Paia na faia le tagata mai i le efuefu, ma e leai se vaega e ola pea pe a oti.—Kenese 2:7; Esekielu 18:4; Kenese 3:19; Failauga 9:5, 6.

O le ā le eseesega o le toe ola mai i se isi tino ma le toetū?

O le aʻoaʻoga o le Tusi Paia o le toetū, e lē faavae mai i le talitonuga o le ola pea o le agaga pe a oti. Pe a toe faatutūina tagata mai i le oti, o le a faia faapea ona o le mana o le Atua. (Mataio 22:23, 29; Galuega 24:15) O le faamoemoe o le toetū, e maua ai le avanoa e toe ola mai ai i se lalolagi parataiso e lē toe iai se oti.—2 Peteru 3:13; Faaaliga 21:3, 4.

Faamatalaga sesē e uiga i le toe ola mai i se isi tino ma le Tusi Paia

Faamatalaga sesē: O loo taʻua i le Tusi Paia, na toe ola mai le perofeta o Elia i le tino o Ioane le Papatiso.

Mea moni: Na folafola mai e le Atua: “O le mea lea ou te auina atu ai iā te outou o Elia le perofeta,” ma na faailoa mai e Iesu na faataunuuina e Ioane le Papatiso lenei valoaga. (Malaki 4:5, 6; Mataio 11:13, 14) Peitaʻi, e lē uiga atu na toe ola mai Elia i le tino o Ioane le Papatiso. Na taʻua patino mai e Ioane, e lē o ia o Elia. (Ioane 1:21) Nai lo o lea, na faia e Ioane galuega e pei o Elia, o le faalauiloa atu o le feʻau a le Atua i tagata ia salamō. (1 Tupu 18:36, 37; Mataio 3:1) Na faaalia foʻi e Ioane le maelega ma le malosi e pei o le perofeta o Elia.—Luka 1:13-17.

Faamatalaga sesē: O loo lagolagoina i le Tusi Paia le aʻoaʻoga o le toe ola mai i se isi tino, ina ua taʻua le faaupuga o le “toe fanau mai.”

Mea moni: Ua faaalia mai i le Tusi Paia, o le toe fanau mai e uiga atu i le toe fanau mai faaleagaga a o ola pea le tagata. (Ioane 1:12, 13) O le toe fanau mai, e lē o se āuga o gaoioiga i le taimi ua teʻa ae o se faamanuiaga mai i le Atua, lea e avatu ai i tagata se faamoemoe mo le lumanaʻi.—Ioane 3:3; 1 Peteru 1:3, 4.

a O talitonuga o le ola pea o le agaga pe a oti le tagata ma le toe ola mai i se isi tino, na tupuga mai i Papelonia anamua. Mulimuli ane, na faavaeina ai e tagata faifilosofia Initia le aʻoaʻoga o le Karma. Ua taʻua i le Britannica Encyclopedia of World Religions, o le Karma “o le tulafono o aafiaga ma gaoioiga, o lona uiga o gaoioiga a se tasi i lenei olaga o le a iai aafiaga i le isi olaga.”—Itulau 913.