Po ua e oo i se tulaga e te iʻu ai i le matuā lēlavā o lou tino ma lou mafaufau? Pe afai o lea, o le a fesoasoani lenei mataupu iā te oe.

•  Mea e māfua ai

•  Māfuaaga e tāua ai

•  Mea e mafai ona e faia

•  Tala a isi talavou

•   Tele naʻuā mea e fai. Ua faapea mai se talavou e igoa iā Julie, “O so o se vala lava o tatou olaga e tatou te faalogo ai i tala e faapea, ia faaauau pea ona faia mea lelei, faaleleia atili pea, ia faataatitia ni sini maualuluga, ma ia ausia ni iʻuga lelei. E matuā faigatā lava iā te aʻu nei ituaiga omiga.”

•   Mea faatekinolosi. Ona ua tatou maua telefoni feaveaʻi, masini faaonapōnei (tablets) ma isi lava masini, ua mafai ai ona tatou “fesootaʻi” i so o se taimi lava o le aso. O le māfuaaga lea e tatou te matuā popole ai ma oo ai lava ina matuā lēlavā le tino ma le mafaufau.

•   Lē lava le moe. Ua faapea mai se talavou e igoa iā Miranda: “E toʻatele talavou e vave ona feala ma tuai ona momoe ona o aʻoga, galuega ma tafaoga ma e matuā lē talafeagai lenā ituaiga masaniga.” O lenā masaniga e iʻu atu ai i le matuā lēlavā o le tino ma le mafaufau.

 E viiviia e le Tusi Paia le tagata toʻaga. (Faataoto 6:6-8; Roma 12:11) Ae e lē o faapea mai e tatau ona tatou soona galulue ma oo ina tatou mafatia ma aafia ai lo tatou soifua mālōlōina.

 “Na iai le taimi na ou iloa ai ou te leʻi ʻai i le aso atoa, ona na alu uma loʻu mafaufau i le tele o tiute tauave. O lea, na ou aʻoaʻoina ai e lē lelei ona ou naunau tele e talia so o se tofiga ona e lē lelei mo loʻu soifua mālōlōina.”

 E iai se māfuaaga lelei ua taʻua i le Tusi Paia: “E sili le taʻifau ua ola nai lo o le leona ua mate.” (Failauga 9:4) O le fosi o lou malosi e te mafaufau ai e pei lou malosi o le leona, ae e lē umi. O lenā ua e tuua ai oe i se tulaga e te matuā lēlavā ai i le tino ma le mafaufau, ma e iai ni āuga e matuā leaga i lou soifua mālōlōina.

•   Ia iloa fai atu leai. Ua faapea mai le Tusi Paia: “E iai le atamai i ē e faamaulalo.” (Faataoto 11:2) O le tagata e faamaulalo, e na te iloa e iai le mea e gata ai lona mafai ma e na te lē taliaina foʻi le faia o ni mea se tele nai lo o mea e mafai ona ia faia.

   “O le tagata e sili ona aafia i le matuā lēlavā o le tino ma le mafaufau, o ia lea e lē mafai ona fai atu e leai, e na te taumafai e talia so o se galuega e ofo atu iā te ia. E lē o le faamaulalo lenā, auā o le a oo iā te ia le matuā lēlavā o le tino ma le mafaufau.”​—Jordan.

•   Ia lava lelei le mālōlō. Ua taʻua i le Tusi Paia: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” (Failauga 4:6) E tai pei le moe o se “meaʻai o le mafaufau” ma e manaʻomia e talavou ona momoe mo le valu i le sefulu itula, ae e lē o le mea lenā o loo tupu i le toʻatele o talavou.

   “Pe a matuā pisi tele laʻu faasologa, e masani ona lē lava ai laʻu moe. Ae o nisi taimi, pe a lava le taimi ou te moe ai o le mea tonu lava lenā o loo oʻu manaʻomia, ina ia tele ai mea e mafai ona ou faia i le aso e sosoo ai ma ou maua ai le fiafia.”​—Brooklyn.

•   Ia maopoopo. Ua taʻua i le Tusi Paia: “O fuafuaga a le tagata toʻaga e manuia ai o ia.” (Faataoto 21:5) O le aʻoaʻoina o le auala e faaaogā tatau ai le taimi ma faaleleia ai galuega, o le a e maua ai le tomai e aogā i lou olaga atoa.

   “E mafai ona ʻalofia le popole e ala i le fai o se faasologa. Pe a iai se faasologa, o le a faigofie ona e iloa mea e manaʻomia ona fetuunaʻi, ina ia ʻalofia ai le oo iā te oe o se tulaga e matuā lēlavā ai le tino ma le mafaufau.”​—Vanessa.