IA FAAAUAU ONA MATAALA!

2023: Se Tausaga o Popolega—O le ā le Manatu o le Tusi Paia?

PLAY

A o faagasolo le 2023, e tele mea na tutupu i le lalolagi e faamaonia ai ua tatou ola i taimi o loo taʻua i le Tusi Paia “o aso e gata ai.” (2 Timoteo 3:1) Mātau pe faapefea i mea o loo tutupu i le taimi lenei, ona faamaonia ai e saʻo mea na valoia i le Tusi Paia o le a tutupu i o tatou taimi.

Mea na valoia i le Tusi Paia ma mea o loo tutupu

“Taua ma tala o taua.”—Mataio 24:6.

“Ua faatuputeleina fetauaʻiga i le tele o vaega o le lalolagi.” a

Tagaʻi i le mataupu “O Ai o le a Laveaʻia Tagata Lautele?” ma le “Silia i le $2 Tiliona ua Faaalu i Vaegaʻau a le Lalolagi.”

“Mafuiʻe i lea mea ma lea mea.”—Mareko 13:8.

“Talu mai le amataga o le 2023, ua silia ma le 13 mafuiʻe i le lalolagi e oo atu le malosi i le 7, ma o se tasi lea o fuainumera maualuga ua faamauina.” b

Tagaʻi i le mataupu “Taia Take ma Suria e ni Mafuiʻe Mataʻutia.”

“Vaaiga e matataʻu ai.”—Luka 21:11.

“O loo faaauau pea ona faateteleina le vevela o le lalolagi.”—António Guterres, failautusi o Malo Aufaatasi. c

Tagaʻi i le mataupu “Mataʻutia le Vevela o le Tau Māfanafana 2023.”

“Oge.”—Mataio 24:7.

“2023: O se isi tausaga sili ona ogaoga mo i latou o loo faigatā ona saunia mea e manaʻomia mo o latou aiga.” d

Tagaʻi i le mataupu “Matuā Utiuti Meaʻai i le Lalolagi Aoao Ona o Taua ma Suiga o le Tau.”

“Aso e sili ona faigatā.”—2 Timoteo 3:1.

“E toʻatasi mai i le toʻavalu tagata i le lalolagi aoao e aafia i faafitauli o le mafaufau.” e

Tagaʻi i le mataupu “Faatupulaʻia Faafitauli o le Mafaufau o Talavou.”

O le ā e tatou te faatalitalia i le 2024?

E leai se tasi e iloa mea o le a tutupu i le 2024. Ae ua faaalia i mea o loo tutupu i le lalolagi, ua toeitiiti ona suia lea e le Malo o le Atua po o le faigāmalo i le lagi o faigāmalo uma a tagata, ma aveesea mea uma o loo māfua ai mafatiaga ma popolega.—Tanielu 2:44; Faaaliga 21:4.

A o tatou faatalitali atu i lenā taimi, e tatau ona tatou faalagolago i le Atua mo le fesoasoani pe a lagona le popole. Ua faapea mai le Tusi Paia:

“Pe a ou fefe, ou te faatuatua atu iā te oe.”—Salamo 56:3.

E faapefea ona faaalia atu e tatou te faatuatua i le Atua? E matou te valaaulia oe e aʻoaʻo atili e faatatau i le folafolaga a le Tusi Paia, i se lumanaʻi e lē toe iai ni mafatiaga. Ia faataʻitaʻi a matou talanoaga faale-Tusi Paia e aunoa ma se totogi, ina ia iloa ai pe faapefea ona e maua faatasi ma lou aiga aogā mai i folafolaga a le Tusi Paia.

a Foreign Affairs, “A World at War: What Is Behind the Global Explosion of Violent Conflict?” tusia e Emma Beals ma Peter Salisbury, Oketopa 30, 2023.

b Earthquake News, “Year 2023: Number of Major Earthquakes on Course for Record,” Me, 2023.

c United Nations, “Secretary-General’s Opening Remarks at Press Conference on Climate,” Iulai 27, 2023.

d World Food Programme, “A Global Food Crisis.”

e World Health Organization, “World Mental Health Day 2023,” Oketopa 10, 2023.