Pe e Mafai Ona Foʻia Faafitauli Tau Tamaoaiga?
I le tele o atunuu, ua faia ai solo tetee a tagata ona o le lē tutusa o tulaga tau tamaoaiga. Na faateteleina lenā faafitauli ona o le KOVITI-19, lea na faatupulaʻia ai faalogona lē mautonu. Na matilatila mai ai foʻi le eseesega o tulaga o tagata mauʻoa ma tagata matitiva i le tausiaina o le soifua mālōlōina.
Pe e iai se taimi o le a faamuta ai faafitauli ona o tulaga tau tamaoaiga? Ioe. Ua faamatala mai i le Tusi Paia mea o le a faia e le Atua e foʻia ai faafitauli o loo tatou fesagaʻia.
O le a foʻia e le Atua faafitauli tau tamaoaiga
Faafitauli: E lē o mafai e tagata ona faamalie manaʻoga tau tamaoaiga o tagata uma.
Vaifofō: O le a suia e le Atua faigāmalo faaletagata i le Malo o le Atua. O le a pule mai lona malo i le lagi i le lalolagi.—Tanielu 2:44; Mataio 6:10.
Iʻuga: Talu ai o le a pulea e le Malo o le Atua le lalolagi, o le a lelei atoatoa mea uma e fai i le lalolagi. O le a lē toe iai ni tagata matitiva pe popole foʻi neʻi lē lava mea e ola ai. (Salamo 9:7-9, 18) Nai lo o lea, o le a latou fiafia i iʻuga o a latou galuega ma ola i se olaga faamalieina ma o latou aiga. Ua folafola mai e le Tusi Paia: “O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi.”—Isaia 65:21, 22.
Faafitauli: E lē o mafai ona ʻalofia e tagata mafatiaga ma le lē lava o mea e ola ai.
Vaifofō: O le a aveesea e le Atua mea uma e māfua ai le fefe ma le lē mautonu e ala i lona Malo.
Iʻuga: I le pulega a le Atua, o le a lē toe tofo tagata i tulaga e mafatia ai. O se faataʻitaʻiga, o le a lē toe iai taua, oge ma faamaʻi. (Salamo 46:9; 72:16; Isaia 33:24) Ua fetalai le Atua: “E nonofo loʻu nuu i se nofoaga toʻafilemu ma fale e saogalemu ai, ma mea foʻi e mapu ai e lē faalavelave mai i ai se isi.”—Isaia 32:18.
Faafitauli: E masani ona faileagaina tagata e i latou e manatu faapito ma manaʻo tele.
Vaifofō: O le a aʻoaʻoina e tagatānuu o le Malo o le Atua le faamuamua o manaʻoga o isi nai lo o i latou lava.—Mataio 22:37-39.
Iʻuga: I le pulega o le Malo o le Atua, o le a faaaʻoaʻo tagata uma i le alofa o le Atua lea “e lē saʻili mo lona lava lelei.” (1 Korinito 13:4, 5) Ua taʻua i le Tusi Paia: “E latou te lē faia se mea e lamatia ai pe faaleagaina se mea i loʻu mauga paia uma; auā o le a tumu le lalolagi i le poto e uiga iā Ieova a e pei ona ufitia o le ilititai i le suāsami.”—Isaia 11:9.
Ua faailoa mai e le Tusi Paia ua tatou ola i aso e gata ai o lenei faiga o mea, ma ua toeitiiti ona faataunuuina lea o lana folafolaga e faamuta faafitauli uma ona o tulaga tau tamaoaiga. b (Salamo 12:5) Peitaʻi i le taimi nei, e mafai ona fesoasoani mataupu silisili o le Tusia Paia iā te oe e feagai ai ma faafitauli tau tamaoaiga. O se faataʻitaʻiga, tagaʻi i mataupu “Le Auala e Feagai ai ma le Utiuti o Tupe Maua” ma le “Se Vaaiga Paleni e Faatatau i Tupe.”
a I le Tusi Paia o Ieova o le suafa lea o le Atua.—Salamo 83:18.
b Ina ia e aʻoaʻoina le māfuaaga e maufaatuatuaina ai le Tusi Paia, tagaʻi i le mataupu “Tusi Paia—Le Puna Maufaatuatuaina o le Upu Moni.”
E te Ono Fiafia Foʻi
LE OLOMATAMATA
O le ā o le a Faataunuuina e le Malo o le Atua?
Na silafia lelei e Iesu e na o le Malo o le Atua le faigāmalo e mafai ona foʻia faafitauli o le lalolagi. O ā mea ua faataunuuina e lenā Malo lea e faamalosia ai lo tatou mautinoa?
ALA MAI!
Faamoemoe mo Tagata Matitiva ma Leai ni Mea e Nonofo Ai
E mafai ona fesoasoani fautuaga aogā mai i le Tusi Paia ina ia faaleleia ai lo tatou tulaga tau tamaoaiga ma le itu tau faalogona.
UIGA O MAU
Le Uiga o le Mataio 6:34—“Ia Aua Neʻi Outou Popole mo le Aso a Taeao”
E leʻi uiga atu le fetalaiga a Iesu e tatau ona tatou ʻalofia le fai o ni fuafuaga mo le lumanaʻi.
LE OLOMATAMATA
Pe e Mafai Ona Iai se Lalolagi e Aunoa ma le Mativa?
O ai e mafai ona faaiʻuina le tulaga mativa?
