I masina taʻitasi, e tatou te matuā tulimataʻia polokalame faaleagaga ma vitiō e maua mai i le TV i le Initaneti a Molimau a Ieova. Peitaʻi, o le toʻatele o o tatou uso i Aferika e lē mafai ona mauaina nei polokalame i le Initaneti. Aiseā?

 O le tele o vaega o Aferika e lē maua ai le Initaneti. Ae pe a maua foʻi le Initaneti, e lē saoasaoa pe e taugatā foʻi. O se faataʻitaʻiga, na kopiina e se ovasia matagaluega i Madagascar se polokalame mai i le TV i le Initaneti a Molimau a Ieova, mai i se fale e maua ai le Initaneti. Na ia totogiina ai le $16, o se tupe e sili atu ona telē nai lo o le totogi e maua e isi i le vaiaso e tasi! a

 E ui i nei luʻi, ae ua mafai nei ona olioli le faitau miliona i Aferika i le polokalame o le TV i le Initaneti a Molimau a Ieova, e aunoa ma le faaaogāina o le Initaneti. E faapefea ona tupu lenei mea?

 Talu mai le 2017, ua mafai ona matamata i latou e nonofo i le itu i saute o le toafa o Sahara i Aferika i le TV i le Initaneti a Molimau a Ieova, e ala i se alāata i le TV e faaaogā ai le satelite. E leai se totogi ina ia matamata ai i lenei alāata, ma e faaali ai polokalame i le 24 itula, fitu aso i le vaiaso, ma i gagana e 16.

 Ina ia faataunuu lenei mea, e totogi e Molimau a Ieova se auaunaga e faasalalauina ai nei polokalame e ala i se satelite. E 35 atunuu i le itu i saute o le toafa o Sahara i Aferika e oo i ai le malosi o lenei satelite. E silia ma le $12,000 e totogiina i masina taʻitasi mo lea auaunaga. I nisi taimi, e totogi ai se isi tupe faaopoopo ina ia faasalalau tuusaʻo ai ni polokalame i se isi alāata. O lea sauniuniga faaopoopo e mafai ai e le faitau afe ona olioli i tauaofiaga, po o polokalame faapitoa e fesootaʻi atu i asiasiga i ofisa o lālā.

 O le toʻatele o tagata e aofia ai ma ē e lē o ni Molimau, e matamata i lea alāata mai i o latou fale. Peitaʻi, o le toʻatele o o tatou uso e lē gafatia le tau o mea e manaʻomia e matamata ai i lea alāata. O lea, ua faatotogaina ai le silia ma le 3,670 Maota mo Sauniga i meafaigaluega e fesootaʻi ai i satelite, ina ia mafai ai e le ʻauuso ona matamata i le TV a Molimau a Ieova. E pe ā ma le $70 le tau o nei meafaigaluega, e aofia ai ma le totogi e auina atu ai i le Maota mo Sauniga, pe afai ua iai i inā se TV po o se masini e faaali ai ata. Ae afai e leai, e ono oo atu le tau i le $530.

 E matuā talisapaia e le ʻauuso lenei alāata. Ua faapea mai se toeaina i Cameroon: “Ua pei lea alāata o le manai i le toafa mo lo matou aiga.” Ua faapea mai Odebode, o se uso i Nigeria: “E faatolu i le vaiaso ona matou matamata o se aiga i lea alāata. E matuā tulimataʻia e laʻu fanau na taimi. O nisi taimi e latou te fai mai ai e sui le mea o loo matou matamata ai i le alāata a Molimau a Ieova.” Ua taʻua e Rose lea e nofo foʻi i Nigeria: “Ua ou fiafia nei e matamata i le alāata a Molimau a Ieova, nai lo o le matamata i taimi uma i tala o mea e tutupu. Pe a ou matamata i tala o mea e tutupu, e na o le oso ai o le ita ma le toto maualuga. Ae o polokalame i le TV i le Initaneti a Molimau a Ieova, e maua ai faalaeiauga ma le toʻafilemu. E ese loʻu fiafia i lenei alāata. O se faamanuiaga tele mai iā Ieova.”

 Na taʻua e se ovasia matagaluega i Mozambique, ua uma ona faatotogaina Maota mo Sauniga i lana matagaluega ina ia maua ai lea alāata. E tasi le itula pe sili atu foʻi e vave taunuu ai uso a o leʻi amata le sauniga, ina ia matamata ai i le TV i le Initaneti a Molimau a Ieova e ala i le satelite.

 I le tauaofiaga faavaomalo sa faia i le 2019 i Johannesburg i Aferika i Saute, na faaaogā ai lea alāata e faasalalau atu ai i isi nofoaga e iva ni lauga autū, e aofia ai lauga a se sui o le Vaega Pule. Ua faapea mai Sphumelele mai i le Matagaluega Faasalalau i le lālā i Aferika: “I le taimi muamua, e matou te faasalalauina lauga e ala i le Initaneti. Ae e manaʻomia ai le lelei o le Initaneti ma e taugatā foʻi. Peitaʻi, ua taugofie atu ma manino le alāata a Molimau a Ieova e faaaogā ai le satelite.”

 E faafetai atu mo a outou foaʻi i le galuega i le lalolagi aoao, ua mafai ai ona maimoa le toʻatele o o tatou uso ma tuafāfine i Aferika, i le TV i le Initaneti a Molimau a Ieova e ala i le satelite. E matou te matuā talisapaia a outou foaʻi o loo faia i auala eseese i le donate.mt1130.com.