PO O LE A TOE FAALELEIA LO TATOU PANETA?
Sami
O LE sami e maua ai le tele o a tatou meaʻai, faapea le tele o mea e manaʻomia mo vailaau faafomaʻi. E saunia foʻi e le sami le silia ma le ʻafa o le okesene o le lalolagi, ma mitiia le kasa o le kaponi lea e maua mai i mea e faia e tagata. E lē gata i lea, o le sami e faalagolago i ai tau o le tausaga.
Māfuaaga o le Faaleagaina o le Sami
O suiga i le tau ua faaleagaina ai ʻamu ma āʻau, ma lamatia ai figota fai atigi ma isi meaola o le sami. Ua valoia e saienitisi, e oo atu i le isi 30 tausaga ua toeitiiti faaleagaina uma āʻau. Peitaʻi, o na āʻau o loo maua ai meaʻai a le pe ā o le 25 pasene o meaola i le sami.
Ua taʻua e tagata atamamai, o manufelelei ia e maua a latou meaʻai mai i le sami, e oo atu i le pe ā o le 90 pasene o i latou ua ʻaia mea e fai mai i le una. O na una, e foliga mai ua māfua ai le pepē o le faitau miliona o meaola i le sami i tausaga taʻitasi.
I le 2022, na taʻua ai e le failautusi a Malo Aufaatasi o António Guterres, “e lē o lelei le auala o loo tatou tausia ai le sami, ma ua manaʻomia ni a tatou taumafaiga faanatinati ina ia faasaoina ai.”
Foafoaina le Lalolagi ia Tumau
Na foafoaina le sami ma meaola o loo iai ina ia toe faaleleia pe faamamāina i latou lava. Peitaʻi, ua faigatā ona latou faia faapea ona o mea ua faia e tagata e faaleagaina ai le sami. Ua faamatalaina i le tusi Regeneration: Ending the Climate Crisis in One Generation, pe afai e lē faaleagaina e tagata le sami, “e mafai la e le sami ona faamamāina pe toe faaleleia o ia lava.” Mātau nisi o faamaoniga nei:
-
E iai i le sami ni meaola matuā ninii e taʻua o le phytoplankton, e faaaogāina ma teua le kasa o le kaponi po o le kasa autū lea e manatu e māfua ai suiga o le tau. E toeitiiti tutusa le tele o le kasa o le kaponi e teua e phytoplankton, ma le kaponi e teua e laau uma ma vao i le lalolagi.
-
O meaola matuā ninii, e latou te ʻaia otaota mai i iʻa lea e ono faaleagaina ai le sami, ae e ʻai e isi meaola o le sami na meaola ninii. Ua taʻua e le upega tafaʻilagi a le Smithsonian Institution Ocean Portal, “o lenei faiga e faatumauina ai le mamā o le sami.”
-
O le auala e faamalū ai e iʻa a latou meaʻai, e fesoasoani e faaitiitia ai le acid i le sami, lea e faaleagaina ai ʻamu, ma lamatia ai figota fai atigi ma isi meaola o le sami.
Taumafaiga a Tagata
O le faaaogāina o ato ma faguvai e mafai ona toe faaaogā i se isi taimi, o le a faaitiitia ai una i le sami
E lē manaʻomia ona tau faamamā le sami, pe afai e lē lafoaʻia i ai ni otaota. O le māfuaaga lea ua fautuaina ai e tagata atamamai le faaaogā o ato ma isi mea e mafai ona toe faaaogā, nai lo o mea e fai mai i le una lea e na o le tasi le taimi e faaaogā ai ae tiaʻi.
Peitaʻi, o loo manaʻomia pea nisi taumafaiga atili. I se tausaga talu ai nei, na aoina ai e se faalapotopotoga tau siʻosiʻomaga le 9,200 tone o lapisi na aumaia i uta e galu o le sami, i matafaga o atunuu e 112. Peitaʻi, ua na o le 0.10 pasene lenā o le lapisi o loo lafoaʻia i le sami i tausaga taʻitasi.
Ua lipotia mai e le National Geographic, ʻe foliga mai ua matuā leai se faamoemoe e mafai ona toe faaitiitia le acid i le sami. O le tele o mea (fossil fuel) ua susunuina e tagata, ua faigatā ai i meaola o le sami ona faamamāina le sami e pei o le auala na foafoaina ai.’
O le ā ua Folafola Mai i le Tusi Paia?
“Ua tumu le lalolagi i mea na e faia. O le sami e matuā telē ma lautele, ua tumu i le lē mafaitaulia o meaola, o meaola lāiti atoa ma meaola lapopoʻa.”—Salamo 104:24, 25.
Na foafoaina e Lē na faia mea uma le sami, ma le malosiaga e faamamā ai e le sami o ia lava. Ia mātau: Talu ai e silafia lelei e le Atua le sami ma meaola uma o loo iai, e mafai la ona faapea atu, o loo iā te ia le mana e toe faaleleia ai mea ua faaleagaina o le sami. Tagaʻi i le mataupu “Folafola Mai e le Atua o le a Tumau lo Tatou Paneta,” i le itulau 15.
