O tagata lotomaulalo e faaalia foʻi le faaaloalo. Latou te lē gaoioi faamaualuga, pe faatalitalia foʻi isi e faia faapitoa i latou. Nai lo lenā, o le tagata lotomaulalo e faaalia le naunau moni i isi, ma lotomalie e aʻoaʻoina se mea mai iā i latou.

E mafaufau nisi tagata, o le lotomaulalo o se vaivaiga. Ae o le mea moni, o le malosiaga lenā e fesoasoani ai i tagata e iloa o latou sesē ma vaivaiga, po o mea e gata mai ai lo latou malosi.

• O le lotomaulalo e aogā i faiā. Ua taʻua i le tusi The Narcissism Epidemic e faapea, “O le mea moni, o tagata lotomaulalo e faigofie ona maua a latou uō.” Na faaopoopo atili mai lenei tusi, o nei ituaiga tagata e “faigofie foʻi le auala e fesootaʻi ma faatasitasi ai ma isi.”

• O le lotomaulalo e aogā i le lumanaʻi o lau fanau. Pe afai e aʻoaʻoina e lau fanau le lotomaulalo i le taimi nei, o le a faigofie mo ia ona maua se galuega pe a matua. Ua tusia e Dr. Leonard Sax e faapea, “E ono lē taulau i se faatalanoaga mo se galuega se talavou e faafefeteina ona o ona lava uiga mautinoa, ae e lē iloa ona lava vaivaiga. Ae o le talavou e naunau moni i faamatalaga o loo fai mai iā te ia, e telē le avanoa e na te mauaina ai le galuega.” *

Faalaeiau lau fanau ia aua le faasilia o latou manatu iā i latou lava.

MATAUPU SILISILI FAALE-TUSI PAIA: “Afai e manatu se tasi o ia o se tagata tāua ae e leai, ua faasesēina ai e ia o ia lava.”—Kalatia 6:3.

• ʻAlofia faamatalaga lē moni. O faaupuga e pei “O le a taunuu uma mea o loo e moomoo i ai” ma “E mafai ona e faia so o se mea e te manaʻo ai” atonu e foliga mai e atiaʻe ai, ae e seāseā tupu i le olaga. O le a taulau manuia lau fanau pe a iai ni o latou sini talafeagai ma galulue mamafa e ausia na sini.

• Ia faamālō atu i se gaoioiga patino. Pe a fai atu i lou alo “Lelei tele oe” o le a lē faalaeiauina ai le lotomaulalo. Ia patino le faamālō e te avatua.

• Faatapulaa le taimi e faaaogā ai e lau fanau tuatusi e fesootaʻi ai. E masani lava e faaauiluma e nei tuatusi le manatu faapito o le tagata iā te ia lava, faalauiloa ai taleni ma mea  ua ausia e se tagata. E matuā tuufaafeagai ma le lotomaulalo.

• Faalaeiau lau fanau ia vave faatoese atu. Fesoasoani i lou alo ia iloa ma taʻutino ana mea sesē.

Faaauiluma le lotofaafetai.

MATAUPU SILISILI FAALE-TUSI PAIA: ʻIa faaalia lo outou lotofaafetai.’—Kolose 3:15.

• Ia lotofaafetai mo le foafoaga. E tatau i fanau ona talisapaia mea i le natura ma le tele e tatou te faalagolago i ai mo le ola. Tatou te manaʻomia le ʻea e mānava ai, vai e inu ai, ma meaʻai. Ia faaaogā nei faaaʻoaʻoga e atiaʻe ai le talisapaia mo mea ofoofogia uma o le foafoaga.

• Ia lotofaafetai mo tagata. Ia faamanatu i lou alo e sili atu isi i lo o ia, ma nai lo le lotoleaga i tomai o isi, ia taumafai e aʻoaʻoina se mea mai iā i latou.

• Ia faailoa atu le lotofaafetai. Ia aʻoaʻo lau fanau e faaalia le lotofaafetai e lē na o upu ae faapea foʻi gaoioiga. O le agaga lotofaafetai, o se faavae lenā e atiaʻe ai le lotomaulalo.

Ia aʻoaʻo lau fanau i le tāua o le fesoasoani i isi.

MATAUPU SILISILI FAALE-TUSI PAIA: “Ia faia ma le lotomaulalo, i le manatu ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.”​—Filipi 2:3, 4.

• Ia faatalitalia lau fanau e faia feʻau. O lou lē tuuina atu o ni feʻau e fai e lau fanau, atonu e latou te manatu ai ʻE lē tāua na mea!’ E tatau ona fai muamua tiute tauave i le aiga i lo o isi mea. Ia taʻu atu le auala e aogā ai feʻau i isi ma le auala o le a talisapaia ma faaaloalogia ai e isi lau fanau mo le faia o na feʻau.

• Ia faamatilatila le faaeaga o le fesoasoani i isi. O le faia faapea o le uluaʻi laasaga lenā e atiaʻe ai le matua o le mafaufau. O lea, ia faalaeiau lou alo e vaai po o ai o loo manaʻomia le fesoasoani. Ia talanoa ma ia i le mea e mafai ona ia faia e fesoasoani atu ai i isi. Ia faamālō atu ma lagolagoina lou alo a o ia faia faapea.