Pe e foliga mai o taimi e te lua talanoaina ai se faafitauli ma lau paaga, e uma ane lava e atili ai ona telē le faafitauli? Afai o le tulaga lea e mafai ona faaleleia. Ae e iai ni vala e ao ona e malamalama muamua i ai, i le eseese o le auala e fesootaʻi ai alii ma tamaʻitaʻi. *

O avā e masani ona mananaʻo e talanoa i se faafitauli a o leʻi faalogo atu i le vaifofō. Ae o le mea moni, o nisi taimi o le talanoa o le vaifofō lea.

“E lelei oʻu lagona pe a uma ona faailoa atu oʻu faalogona ma ua ou iloa ua malamalama laʻu tane i le mea lea ou te fai atu ai. E uma loa ona ou talanoa i lea mataupu, e masani a i ni nai minute ua toe lelei oʻu faalogona.”—Sirppa. *

“E lē mafai ona teʻa ese se faafitauli mai i loʻu mafaufau pe afai e lē maua se avanoa e faamatala atu ai i laʻu tane oʻu lagona i lea mataupu. Pe a ou talanoa atu i le faafitauli ona ou lē toe popole ai lea.”—Ae-Jin

“E pei o se galuega a leoleo nanā. A o talanoa atu ou te taumafai e malamalama i vala uma ma le pogai o le faafitauli.”—Lurdes.

E masani lava ona mafaufau tane i ni vaifofō. O se tulaga malamalama lenā mea auā o le foʻia o faafitauli e lagona ai e se tane lona taʻuaogāina. O le ofoina atu o se fofō i se faafitauli o lana lea auala e faailoa atu ai i lana avā e mafai ona faalagolago mai iā te ia mo se fesoasoani. O le mea lea e lē malamalama ai tane pe a lē talia a latou vaifofō. Ua faapea mai se tane e igoa ia Kirk: “Ou te lē malamalama po o le ā le mea e te talanoa ai i se faafitauli pe a e lē manaʻo i se vaifofō.”

Ua lapataʻi mai le tusi The Seven Principles for Making Marriage Work: “E tatau ona malamalama muamua a o leʻi avatu se fautuaga. E ao ona e faailoa atu i lau paaga ua e malamalama lelei ma e tutusa lua lagona i le faafitauli a o leʻi avatu se vaifofō. O  le tele o taimi e lē o manaʻo lau paaga i se fofō ae na o sē e faalogologo lelei.”

Mo tane: Ia faamasani i le faalogologo lelei ma taumafai e malamalama i faalogona o lau avā. Ua faapea mai se tane e igoa iā Tomás: “O nisi taimi pe a uma ona ou faalogo atu ou te mafaufau, ʻE lē o foʻia ai le faafitauli.’ Peitaʻi o le tele o taimi e na o le pau lenā o le mea e manaʻomia e laʻu avā, o le faalogologo lelei atu.” E ioe foʻi se tane e igoa iā Stephen i lea manatu: “E sili lava le tuu o laʻu avā e faailoa mai ona lagona e aunoa ma le faasalavei atu. O le tele o taimi, pe a uma ona talanoa mai e faapea mai ua toe lelei ona faalogona.”

Ia faataʻitaʻi: Pe a lua toe talanoaina se faafitauli ma lau avā, ia ʻalofia le avatu o se fautuaga ae e leʻi talosaga mai. Ia tilotilo atu iā te ia ma faalogo i ana tala. Ia luelue atu lou ulu e iloa ai e te ioe i ona manatu. Ia toe taʻua le aano o lana tala e faailoa atu ai o loo e malamalama. Ua faapea mai se tane e igoa iā Charles: “O nisi taimi e pau le mea o loo manaʻomia e laʻu avā, ia ou malamalama i ona faalogona ma o loo tutusa la ma vaaiga i le mataupu.”—Mataupu silisili: Iakopo 1:19.

Mo avā: Ia taʻu atu i lau tane le mea e te manaʻo iā te ia e fai. Ua faapea mai se avā e igoa iā Eleni: “Atonu e tatou te manatu e iloa e a tatou tane le mea o loo tatou manaʻomia a o isi taimi e tatau ona tatou faailoa atu.” Ua taʻua e se avā e igoa iā Ynez le auala lea: “Atonu ou te faapea atu, ʻE iai se mea o loo oʻu popole ai ma ou te manaʻo e te faalogo mai. Ou te lē manaʻo e te foʻia le faafitauli ae ou te manaʻo e te malamalama i oʻu faalogona i le mataupu.’”

Ia faataʻitaʻi: Afai e vave avatu e lau tane le fofō i le faafitauli aua e te manatu e lē o malamalama lau tane. Atonu o loo taumafai e fesoasoani atu iā te oe. Ua faapea mai se avā e igoa iā Ester: “Nai lo o loʻu ita, ou te taumafai e iloa e alofa laʻu tane ma e manaʻo e faalogo ma fesoasoani mai.”—Mataupu silisili: Roma 12:10.

Mo tane ma avā: E tatou te mananaʻo ia feutagaʻi ma isi i le auala e tatou te mananaʻo e faia mai e isi iā i tatou. Peitaʻi, ina ia lua talanoaina faafitauli i se auala e aogā, e manaʻomia ona e mafaufau po o le ā le auala e manaʻo lau paaga e te feagai ai ma ia. (1 Korinito 10:24) Ua faapea mai se tane e igoa iā Miguel: “Afai o oe o se tane, ia e naunau e faalogo atu. Afai o oe o se avā, ia naunau e faalogo atu i vaifofō o faafitauli i nisi taimi. Pe a lua malilie i lea tulaga e te lua maua uma aogā.”—Mataupu silisili: 1 Peteru 3:8.