Seʻi faamatala mai le tapuaʻiga na e ola aʻe ai.

Sa fanau loʻu tamā i Initia, ae na fanau loʻu tinā i Uganda e ui lava o ona matua o ni Initia. Na telē le aafiaga o tū ma aga o le lotu Hinitū i o la olaga. O aʻu e lona lua i se fanauga e toʻatolu. Na matou nonofo i Nairobi i Kenya ma o le toʻatele o isi tagata lotu Hinitū na nonofo latalata ane.

O le ā na faaosofia ai lou naunau i le faasaienisi?

O loʻu fiafia ia i meaola, ma e masani ona matou ō ma aʻu uō e feʻaʻei i atumauga, ma nonofo i faleʻie ma matamata i meaola ma laau matagofie i le vaomatua. O le taimi muamua, sa ou manaʻo e avea o se fomaʻi manu. Ae ina ua uma ona ou faauu mai i se iunivesite o matātā eseese i Nairobi, na ou malaga ai loa i Egelani e suʻesuʻe e faatatau i le māfuaaga o faamaʻi ma le auala e togafitia ai i le University of London. Mulimuli ane, na ou galue faapitoa i le faia o suʻesuʻega e faatatau i le faiʻai o le tagata.

Pe na aafia ou talitonuga ona o au suʻesuʻega?

Ioe. O le tele lava o loʻu suʻesuʻe i le faasaienisi, o le faigatā foʻi lenā ona ou talitonu i talatuu ma aganuu o le lotu Hinitū, e pei o le tapuaʻi i meaola ma faatusa.

Aiseā na e taliaina ai le aʻoaʻoga o le evolusione?

A o oʻu talavou, na talitonu le toʻatele o tagata na matou ola faatasi o le evolusione na amata mai i Aferika, ma sa masani ona talanoaina lenei aʻoaʻoga i le aʻoga. Na faatalitonuina foʻi i matou e faiaʻoga ma polofesa o le iunivesite, e talitonu saienitisi faaaloalogia uma i le evolusione.

 A o faagasolo taimi, aiseā na e toe iloiloina ai le manatu e faatatau i le amataga mai o le ola?

E na o ni nai tausaga na ou suʻesuʻe ai e faatatau i meaola ma le fausaga o le tino o le tagata, ae faamatala mai e se tasi na ma aʻoʻoga, mea sa ia aʻoaʻoina e faatatau i le Tusi Paia mai i Molimau a Ieova. Na ou fia iloa atili e faatatau i na mea. O lea, ina ua faia se fonotaga a Molimau a Ieova i le hall a lo matou kolisi i Nairobi, na ou auai ai. Mulimuli ane na faamatala mai e ni Molimau misionare e toʻalua nisi o aʻoaʻoga a le Tusi Paia. O lo la talitonu i Lē Sili na Foafoaina mea e faapea e iai iā te ia tali i fesili tāua i le olaga, na ou mautinoa ai e lē o ni talatuu nei aʻoaʻoga. Na foliga mai e iai faamaoniga o nei manatu.

Pe na avea lou tomai faafomaʻi ma itu na faafaigatā ai ona e talitonu i le foafoaga?

E leai. A o oʻu suʻesuʻe e faatatau i le fausaga o le tino o le tagata, na ou iloa ai le maoaʻe ma le mataʻina o le auala na foafoaina ai meafaiola. Ou te leʻi toe talitonu i le manatu na teʻi lava ua iai se meafaiola, e mataʻina le auala na foafoaina ai.

O le ā se faaaʻoaʻoga?

Talu mai le 1971 na ou suʻesuʻe ai e faatatau i le faiʻai o le tagata, ma ou te maofa i le ofoofogia o lenei totoga. O le puna lea o manatunatuga ma e faatonutonuina gaoioiga eseese o le tino. O le faiʻai o le vaega autū foʻi lea o o tatou lagona, ma e mafai ona iloa ai faamatalaga i totonu ma fafo o o tatou tino.

O le auala e gaoioi ai o tatou faiʻai, e māfua mai i le lavelave o le auala ua tuufaatasia ai ma le tele o vaega o neroni o loo iai, o sela tāua nei o le faiʻai. E faitau piliona neroni o loo i le faiʻai o le tagata, ma e fesootaʻi nei neroni e ala i ni uaua uumi e taʻua o axons. E mai i nei axons e mafai e se neroni se tasi ona faia aʻe le faitau afe o fesootaʻiga ma isi neroni, e ala i le tuufaatasia o uaua uumi nei ma taʻua ai o dendrites. O le iʻuga, e lē mafaitaulia le aofaʻi o fesootaʻiga i totonu o le faiʻai. E lē gata i lea, e ui i le tele o neroni ma dendrites ae e lē faapea ai ua felavasaʻi solo, ae o loo faatulaga i se auala e maopoopo lelei. E mataʻina le auala ua tuufaatasia ai nei uaua.

Seʻi faamatala mai faamolemole.

E maopoopo le auala e tuufaatasia ai nei uaua i le taimi a o afuafua se pepe i le manava faapea le taimi e fanau mai ai. E taumafai neroni e fesootaʻi atu i isi neroni lea atonu e na o ni nai senitimita e va ai. Pe a faatusatusa i tulaga o sela, e matuā vavamamao lava. Atonu e lē na o se sela patino o loo taumafai neroni e fesootaʻi atu iai, ae o loo taumafai e fesootaʻi atu i se vaega patino o lenā sela.

A o tupu aʻe se isi uaua mai i se neroni, e faatonutonuina lenā uaua e ni vailaau o loo i totonu o le faiʻai, e faailoa mai le taimi e “taofi,” “alu,” pe “liliu” ai, seʻia oo lava ina fesootaʻi le uaua i le isi neroni. A aunoa ma nei faatonuga manino, e faigatā i nei uaua ona iloa vaega e tatau ona fesootaʻi i ai. E maoaʻe le auala ua faatulaga ai nei fesootaʻiga, e amata mai i faatonuga o loo i totonu o o tatou DNA.

O lenā manatu ua tatou iloa ai, e tatou te lē o malamalama atoatoa i le auala e faia aʻe ai le faiʻai ma gaoioi ai, e aofia ai le auala e maua ai manatu, faalogona, ma mafaufauga. Iā te aʻu lava ia ua lava le auala e gaoioi ai le faiʻai—atoa ai ma le auala maopoopo faapea le auala mataʻina e faia aʻe ai—e iloa ai e iai lē e sili atu lona atamai i lo o tatou.

Aiseā na avea ai oe o se Molimau a Ieova?

Na faailoa mai e Molimau a Ieova faamaoniga e iloa ai o le Tusi Paia o le Afioga a le Atua. O se faataʻitaʻiga, o le Tusi Paia e lē o se tusi faasaienisi, ae pe a talanoaina mataupu faasaienisi, e saʻo aʻiaʻi le auala e faamatalaina ai. O loo faamatalaina ai foʻi valoaga e saʻo aʻiaʻi. Ua faaleleia ai foʻi olaga o i latou e faatatauina aʻoaʻoga mai i le Tusi Paia. O se faamaoniga o lenā mea, o le olaga ua ou ola ai. Talu ona avea aʻu o se Molimau a Ieova i le 1973, na taʻitaʻia loʻu olaga i taʻiala o le Tusi Paia. O le iʻuga, ua ou maua se olaga e faamalieina moni ma e iai se fuafuaga aogā.