Mai Olimipia e Oo Atu i Sini

UA MANATU le toʻatele o tagata i Taaloga o le Olimipeka faapea o le tauvaga afeleti sili lea ona tāua a le lalolagi. E taʻua e le World Book Encyclopedia: “E leai lava nisi taaloga e sili atu ona tosina i ai le tele o tagata na i lo le Olimipeka. E faitau fia miliona tagata e auai i taaloga, ma le fia selau miliona tagata i itu e fā o le lalolagi o loo latou maimoaina mai i televise.”

Sina Talafaasolopito Puupuu

Na amata mai Taaloga o le Olimipeka i le faitau afe tausaga ua mavae. I se talitonuga faapea o afeleti sa faafiafiaina ai agaga o ē ua oti, na māfua ai ona faia e tagata Eleni anamua ni faatasitasiga faaleatunuu sa fai faatasi ai faigalotu ma taaloga. Sa aofia ai iinā taaloga sa faia i le Isthmus, i Nemea, o taaloga Olimipeka ma taaloga o le Pythia. Mai nei taaloga uma, sa silisili ai lava ona taʻutaʻua taaloga Olimipeka, auā sa faamamaluina ai Seu, o lē na manatu i ai tagata Eleni, o le tupu lea o atua.

E foliga mai e na o le tasi le ituaiga o taaloga sa faia i uluaʻi taaloga Olimipeka, e na o se taaloga taufetuli. Peitaʻi na mulimuli ane na latou faaaofia ai ma isi tauvaga, e pei o tuuga kariota ma le tofotofoina o le umi o le malosi o se tagata. Sa lolofi mai tagata asiasi mai so o se tulimanu o le lalolagi mo le maimoaina o lenei faatasiga. Mo le faamautinoaina o lo latou malupuipuia, sa matuā faamamalu ai le faasāina o ni faiga taua mo se vaitaimi a o leʻi amata ma pe ina ua māeʻa foʻi taaloga.

Ina ua pule le malo o Roma, sa amata loa ona fai ifo le lauiloa o taaloga Olimipeka. O le mea moni, e toʻatele tagata Roma sa latou manatu faatauvaa i taaloga afeleti. Seʻi vaganā ai le emeperoa o Nero na ese mai lona manatu. I le 67 T.A. na auai atu ai o ia i taaloga ma manumalo ai i ituaiga taaloga uma lava sa ia tauvā ai. E foliga mai sa iloa lelei e isi tagata tauvā le faiga e faapele ai le emeperoa! Po o le ā lava le tulaga na iai, ae oo ane i le 394 T.A., ua lē toe faaauauina le Olimipeka.

Ua Toe Amata le Olimipeka

I ni senituri e 15 mulimuli ane, na toe olaola mai ai le naunau i nei taaloga, ona o mea sa laga aʻe e tagata Siamani o ē suʻesuʻeina mea e eli aʻe i le eleele, i le laufanua tonu lea sa fai ai taaloga Olimipeka anamua. O iinā na toe faatū ai e Baron Pierre de Coubertin, o se alii Falani e 29 ona tausaga, se lafo ina ia toe amata le taaloga. O lea, i le 1896 na faia ai i Atenai uluaʻi Taaloga Olimipeka e pei ona iai i ona po nei. Talu mai lena tausaga, sa faatulaga ai loa e taʻifā tausaga ma fai Taaloga o le Olimipeka, ma sa iai nisi tausaga na leʻi faia ai e ui o se mea na seāseā tupu.

I aso nei, e toʻatele tagata sa latou naunautaʻi e faatalitalia nei taaloga. I le tausaga na teʻa nei, sa faia ai i Sini, Ausetalia, mai ia Setema 15 e oo atu ia Oketopa 1. Sa aofia ai le 28 o tauvaga (sport) na faia, e 292 ituaiga o taaloga eseese i na tauvaga (event), ma le 635 o vaega eseese o taimi sa faatulaga e fai ai nei taaloga (session), faatasi ai ma le silia i le 10,300 tagata afeleti na faia ni a latou vaega.

Peitaʻi ane, i tausaga e leʻi leva tele atu, e tele ni vevesi na tutupu mai i le Olimipeka. Ua oo lava ina faapea mai le toʻatele o tagata, ua matuā malapagā lava faamoemoega maualuluga o le Olimipeka. O se iloiloga loloto o le a lē gata ina malamalama lelei ai ae faateʻia ai foʻi.

[Ē Ana le Ata i le itulau 3]

Scala/Art Resource, NY