O le ā le Uiga o le Faaupuga o Aso e Gata Ai?

O FAAUPUGA “o aso e gata ai” ma “ona pō o le iʻuga,” ua leva ona tatou faalogo i ai. (2 Timoteo 3:1; Tanielu 12:4) Ua silia ma le 2,500 tausaga talu ona faailoa i le perofeta o Tanielu ni vaaiga e faatatau i malo malolosi o le lalolagi, faapea ma feteenaʻiga a nei malo, seʻia oo i “ona pō o le iʻuga.” Na taʻu atu iā te ia, o le a manino mai uiga o nei vaaiga, i le taimi o le iʻuga. (Tanielu 8:17, 19; 11:35, 40; 12:9) Na tusia foʻi e Tanielu e faapea: “O ona pō o ia tupu e faatūina ai e le Atua o le lagi o le malo e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:44.

Na taʻua e Iesu le taimi o “le iʻuga,” ina ua ia tali i se fesili e faatatau i “le faailoga o [lona] faatasi mai, ma le iʻuga o faiga o mea a le lalolagi.” (Mataio 24:3-42) E foliga mai la o loo taʻua uma e Tanielu ma Iesu se taimi faaiʻu, o se suiga tele o le a aafia uma ai tagata o loo soifua nei, ma i latou sa soifua i le lalolagi atoa. Na tusi Tanielu e faatatau i le iʻuga o malo uma o le lalolagi. Ae na tautala Iesu e faatatau i le “iʻuga o faiga o mea a le lalolagi.”

O le mea moni, o le tulaga lea e tatau ona iai, e ao i tagata uma ona fia malamalama atili i ai, auā e aafia ai i latou uma. Peitaʻi ane, ua faalēano le toʻatele i lenei mataupu. Na valoia e le Tusi Paia e faapea: “O aso e gata ai e ō mai ai tagata tauemu ma latou faatauemu mai, ma ua latou faia faapea e tusa ai ma o latou lava tuʻinanauga ma faapea ane: ‘Na folafola mai o ia e afio mai, ae o fea o iai? Auā e mai le aso na maliliu ai o tatou augātamā, e leai lava se mea o suia talu mai le foafoaga o le lalolagi.’” (2 Peteru 3: 3, 4) Ioe, e toʻatele nisi ua manatu, o mea o loo tutupu nei, o mea foʻi ia sa iai i la aso, ma o le tulaga masani lava lenā o le olaga e faaauau ai lava faapena.

Po o iai ea ni faamaoniga o loo tatou ola moni i le taimi ua taʻu e le Tusi Paia o aso e gata ai? Seʻi tatou iloilo ni faamaoniga.