O se Uō Pepelo

E iai sau “uō” na lua feiloaʻi a o lua laiti. Na e lagona ai le fiafia ona ua malamalama lelei o ia iā te oe, ma na fiafia mai ai foʻi au uō iā te oe. O taimi uma e te mafatia ai, sa e sulu atu iā te ia mo se “mapusaga,” ma ua e faalagolago iā te ia i le tele o taimi.

Ae ua e iloa mulimuli ane ona uiga leaga. E manaʻo ia e pipii atu pea iā te ia i taimi uma, e tusa lava pe e inosia ai oe i nisi nofoaga. Ua e fiafia ona ua pei ai oe o se tagata matua, ae, ua lamatia ai lou ola. O le mea e sili ona leaga, ua ia gaoia se vaega o lou totogi.

I nisi taimi, e te taumafai ai e momotu la lua faigāuō, ae ua lē mafai. E pei ua pule o ia iā te oe. Ua e salamō e faapea, maʻimau pe ana lua lē masani.

E FAAPENA le tulaga o le toʻatele o tagata ulaula ma le sikaleti. Ina ua mavae le 50 tausaga talu ona ulaula, ua manatua ai e se fafine e igoa iā Elena e faapea: “Sa sili ona aogā le sikaleti iā te aʻu i lo o se isi lava tagata. Sa sili atu foʻi i lo o se uō mamae; i nisi taimi, e na o le pau lava lenā o laʻu uō.” Ae na iloa ane e Elena, e lē gata o se uō pepelo le sikaleti, ae e mataʻutia foʻi. O upu o loo i luga e peiseaʻī sa tusia e uiga iā Elena, ae e tasi le mea e lē o aofia ai. Ina ua iloa e ia e leaga le ulaula i le silafaga a le Atua, ona e faaleaga ai o tatou tino na faia e le Atua, ona tuu loa lea o lana ulaula.—2 Korinito 7:1.

Na filifili foʻi se tamāloa e igoa iā Falani e tuu lana ulaula ina ia faafiafia ai le Atua. Ae tusa o se aso talu ona tuu lana ulaula, ae toe fetolofaʻi solo i lalo o lona fale e tau suʻe ni muli sikaleti na paʻuʻū i vāi laupapa. Na faapea mai Falani: “O le taimi tonu lava lenā na faia ai loa laʻu faaiʻuga. O loʻu fetolofaʻi solo e tau elieli mai ni muli sikaleti ua tiaʻi, na oso ifo ai loʻu ʻinoʻino, ma e leʻi toe ulaina ai lava saʻu sikaleti.”

Aiseā ua faigatā tele ai ona tuu le ulaula? E tele māfuaaga ua iloa e le ʻausuʻesuʻe: (1) E mafai e le tapaa ona pulea le tagata e pei o fualaau faasāina. (2) Pe a miti i totonu le nikotini (nicotine) o le tapaa, e na o ni nai sekone ae oo i le faiʻai. (3) E avea le ulaula ma mea tāua i le olaga o le tagata, pe a ō faatasi ma meaʻai, pia, talanoaga, ma mapu i ai i mafatiaga ma isi mea.

Ae, e pei ona faaalia e Elena ma Falani, e mafai ona tuu lenei masaniga leaga. Afai o e ulaula a ua e manaʻo e tuu, o lou faitau i nei mataupu o le a avea ma amataga o se olaga fou mo oe.