Le Manatu o le Tusi Paia

E Faapefea Ona E Faatupu le Filemu ma Isi?

UA FAAPEA mai le Tusi Paia e uiga i tagata: “Ua agasala tagata uma lava, ma ua lē ausia le mamalu o le Atua.” (Roma 3:23) Talu ai e lē lelei atoatoa tagata i le lalolagi lea ua silia i le fitu piliona le faitau aofaʻi, e mautinoa la o le a iai feeseeseaʻiga ona e eseese uma o latou talaaga. E faapefea ona tatou faatupuina le filemu i na ituaiga tulaga?

Ua aumaia e le Tusi Paia fautuaga aogā. O loo faamatalaina ai Lē na foafoaina mea “o le Atua o le filemu,” o lona suafa o Ieova. (Eperu 13:20; Salamo 83:18) E finagalo le Atua ia olioli ma nonofo fifilemu lana fanau i le lalolagi. Ua taʻimua ai la o ia i le faia faapea. Ina ua agasala le uluaʻi ulugalii i le Atua ma motusia ai se faiā filemu, na vave loa ona ia saunia se faaleleiga ma ana foafoaga o tagata. (2 Korinito 5:19) Seʻi mafaufau i ni mea se tolu e te faia ina ia tausia ai le filemu ma isi.

Ia Faamagalo ma le Lotoatoa

O le ā le manatu o le Tusi Paia? “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.”—Kolose 3:13.

Aiseā e faigatā ai? Atonu e lelei ni au “māfuaaga e faitio ai” ma e manatu e saʻo lau faaiʻuga o le faamuta o fesootaʻiga ma lē ua faatigā mai. Ua e manatu foʻi e tatau ona faatoese muamua mai le tagata iā te oe. Ae afai e lē o iloa e le tagata lenā sana mea sesē na fai, pe e manatu foʻi o oe e sesē, o lona uiga o le a faaumiumi ai lava ona tumau le faafitauli.

O le ā e ao ona e fai? Ia utagia fautuaga a le Tusi Paia e ala i le matuā faamagalo atu i le tagata, aemaise lava pe a lē matuiā tele le faafitauli. Manatua, ana faapea e mātaulia e le Atua a tatou mea sesē e fai, e lē mafai la ona tatou tutū atu i ona luma. (Salamo 130:3) Ua faapea mai le Tusi Paia “e alofa mutimutivale Ieova ma alofa fua, e telegese lona toʻasā ae e tele lona alofa faamaoni. Auā ua silafia lelei e ia le mea na faia ai i tatou, ua ia manatua o le efuefu lava i tatou.”—Salamo 103:8, 14.

Ia manatua foʻi le faataoto a le Tusi Paia: “O le tofā mamao o le tagata, e faagesegese ai lona ita, ma e matagofie foʻi lona lē manatua o le agaleaga.” (Faataoto 19:11) O le tofā mamao e fesoasoani iā i tatou e tilofaʻia ai māfuaaga atonu na faia ai e tagata se faamatalaga po o se gaoioiga. O lea la, ia fesili ifo iā te oe lava, ʻPe na vaivai, maʻi pe iai se mea na popole ai lenā tagata?’ O le malamalama i māfuaaga moni a isi, o latou faalogona ma tulaga o iai, atonu e faaitiitia ai lou ita ma fesoasoani iā te oe e lē amanaʻia ai a latou mea sesē na fai.

Ia Talanoa le Faafitauli

O le ā le manatu o le Tusi Paia? “Afai ua faia e sou uso se agasala, ia e alu lua te talanoa na o oulua e faaali i ai lana mea sesē. A faalogo o ia, ua e maua la lou uso.”—Mataio 18:15.

Aiseā e faigatā ai? O faalogona sesē e pei o le fefe, ita ma le māsiasi, e ono taofia ai oe mai le talanoa atu i le tagata ma foʻia le faafitauli. Atonu foʻi e faaosoosoina oe e saʻili atu le lagolagosua a isi e ala i le faailoa atu iā i latou o le faafitauli, ma atili ai ona faalautele ma faateteleina ai le feeseeseaʻiga.

O le ā e ao ona e fai? Pe afai e matuiā le faafitauli ma ua e lē mafai ona aveesea ma lou mafaufau, talanoa atu i le tagata ina ia soālaupule le mataupu. Taumafai e taulima le mataupu i auala nei:

(1) Vave ona foʻia: Aua le faatuai. Pe afai e te faatuai, o le a faateteleina la le faafitauli. Taumafai  e faatatau le fautuaga a Iesu e faapea: “Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.”—Mataio 5:23, 24.

(2) Talanoa na o oulua: ʻAlofia le faaosoosoga o le faitala atu i isi e faatatau i le faafitauli. “Ia finau i lau mataupu ma lou tuaoi, aua e te faailoa mataupu faalilolilo a se tasi.”—Faataoto 25:9.

(3) Ia filemu: ʻAlofia le taumafai e suʻesuʻe po o ai e saʻo a o ai e sesē. O lou sini o le faatupu o le filemu ae e lē o le manumalo i se finauga. Taumafai e faaaogā le faaupuga “aʻu” nai lo o “oe.” O le fai atu i le tagata “ua ou lagona le mafatia ona . . . ,” atonu e sili atu nai lo le fai atu “ua e faatigā mai iā te aʻu!” Ua faapea mai le Tusi Paia: “Tausisi i mea e faatupu ai le filemu, ma mea e atiaʻe ai e le tasi le isi.”—Roma 14:19.

Ia Faapalepale

O le ā le manatu o le Tusi Paia? “Aua le taui atu le leaga i le leaga i se tasi. . . . Ae, ʻafai e fia ʻai lou fili, ia fafaga iā te ia; afai e fia inu o ia, ia avatu i ai se meainu.’”—Roma 12:17, 20.

Aiseā e faigatā ai? Afai e teena e le tagata au uluaʻi taumafaiga ina ia faatupu le filemu, atonu o le a tofotofoina oe ua lava lea.

O le ā e ao ona e fai? Ia onosaʻi. E eseese tulaga ma le taʻumatuaina o tagata. O nisi e umi le taimi o tau faateʻa le ita; a o isi o loo aʻoaʻoina pea ia faaalia uiga faale-Atua. Ia faaali atu pea iā i latou le agalelei ma le alofa. Ua faapea mai le Tusi Paia: “Aua le faatoʻilaloina oe i le leaga; ae ia faatoʻilaloina pea le leaga i le lelei.”—Roma 12:21.

Ina ia faatupu le filemu ma isi, e manaʻomia ona tatou galulue e faaalia le lotomaulalo, tofā mamao, onosaʻi ma le alofa. Ae o faiā filemu e mautinoa e matuā aogā!

PO O E TAUMĀNATU EA I NISI TAIMI?

● O le ā e fesoasoani iā te oe e faamagalo ai se tasi ma le lotoatoa?—Kolose 3:13.

● O le ā e fesoasoani iā te oe e talanoa atu i le tagata ina ia foʻia le faafitauli?—Mataio 5:23, 24.

● O le ā e mafai ona e faia pe afai e teena mai e le tagata au taumafaiga ina ia faatupu le filemu?—Roma 12:17-21.

[Faamatalaga faaopopo i le itulau 21]

“O le tofā mamao o le tagata, e faagesegese ai lona ita, ma e matagofie foʻi lona lē manatua o le agaleaga.”—FAATAOTO 19:11