O LE apogaleveleve lea e maua i fale i Amerika (Parasteatoda tepidariorum), e na te fausia lona faamoega mai i se mea piipii e tai pei o se apulupulu. O lenei mea piipii e mafai ona pipii mau ai le faamoega i se puipui, ae e mafai foʻi ona matala gofie mai ai lona faamoega pe a puʻea se iniseti mo ana meaʻai. E faapefea i le apogaleveleve ona faaaogā lenei mea piipii e tasi, ina ia pipii mau ai ma toe matala gofie mai ai lona faamoega?

Ia Mātau: E masani ona iai le faamoega o se apogaleveleve i se puipui, se fāʻalo po o se isi nofoaga. O le ogatotonu o le faamoega e mafiafia lona lalagaina faafelavasaʻi ma e mātua piipii, ina ia mafai ona puʻea ai iniseti e felelei solo mo ana meaʻai. Ua iloa e nisi o le ʻausuʻesuʻe mai i le iunivesite o Akron i Ohio i le Iunaite Setete, o pito o le faamoega po o aa lea e pipii ai i se mea, e lē mafiafia lona lalagaina e pei o le ogatotonu, ma e lē matuā piipii tele. O le māfuaaga lea e faigofie ai ona matala mai pito o le faamoega, ma lavelavea ai se iniseti o lāvea i le ogatotonu.

E tusa ai ma se faamatalaga mai i le iunivesite o Akron, ua taumafai nei i latou na suʻesuʻeina lenei meaola matagofie e faataʻitaʻi le auala o loo faapipii ai e lenei apogaleveleve mea. Ua taumafai nei saienitisi e faia se mea piipii faapena e aogā mo mea faapipii mo manuʻa, ma togafitia ai ponaivi ua gaui.

O le ā sou manatu? Pe na teʻi lava ua iai le tomai i lenei meaola e gaosia ai se mea piipii, e pipii mau ae faigofie foʻi ona matala? Pe na foafoaina?