Sa nonofo lo matou aiga i Tellancourt, o se nuu i mātū i sasaʻe o Falani. O loʻu tamā o le Falani, ae o loʻu tinā o le Italia. I le valu o oʻu tausaga, sa matou siitia ai i Roma i Italia i se aai e matitiva ma faigaluega mamafa tagata. Sa faigatā le olaga o lo matou aiga i inā. E masani ona misa leaga oʻu mātua ona o faafitauli tau tupe.

Ina ua 15 oʻu tausaga, sa uunaʻia aʻu e loʻu tinā ou te alu e suʻe ni aʻu uō. Sa amata loa ona ou tuua le aiga mo ni taimi uumi, ma e leʻi umi ae iai ni aʻu aumea lē lelei. I se tasi aso, na sau ai se tamāloa e foliga mai e faaleuō, ma tuu mai ni fualaau faasāina. Sa ou taliaina ona na ou manaʻo e faailoa atu ua ou tama matua foʻi. E leʻi umi ae ou tagofia ma faatau atu fualaau faasāina ma faia amioga lē mamā. E tele taimi na faileagaina ai aʻu i le itu tau feusuaʻiga. Sa lē tāua le ola iā te aʻu, ma ou te leʻi popole pe ou te ola pe ou te oti. Sa ou matuā lagona le tuua toʻatasi, ma i le 16 o oʻu tausaga, sa ou taumafai ai e pule i loʻu ola e ala i le inu o se fagu uisikī ma puna i se vaitafe. O le iʻuga, e tolu aso o oʻu taoto e lē iloa se mea.

Sa amata ona ou faatāua le ola, a o le taimi e tasi sa ou sauā ma fai mea piʻopiʻo. Sa ou faatosina isi ina ia faia feusuaʻiga, faaonanā i latou i o latou fale, ona ou gaoia lea o so o se mea tāua sa iā i latou. Sa faaaogā aʻu e vaega o tagata na lauiloa i soligatulafono, ina ia faatau atu fualaau faasāina i Italia. E tele taimi na maua ai aʻu e leoleo. E ui lava sa ou talitonu e iai se māfuaaga o loʻu ola pea, ae sa foliga mai e leai se tāua o loʻu olaga ma na lē mafai ona ou pulea. Sa ou ōle atu i le Atua ia aumai tau o se tausaga se tasi ou te ola fiafia ai ma filemu.

Ina ua 24 oʻu tausaga, sa ou filifili e siitia i Egelani ona na lamatia loʻu ola i isi tagata na faatauina fualaau faasāina. Ae a o leʻi oʻu alu, sa ou asiasi i loʻu tinā, ma na faateʻia aʻu ina ua ou vaai i se tamāloa e igoa iā Annunziato Lugarà, o loo talanoa i loʻu tinā e faatatau i le Tusi Paia. * Sa ou iloa le talaaga o lenei tamāloa i faiga solitulafono,  o lea na ou fefe ai ma fesili i ai po o ā ana mea o loo fai i inā. Sa ia faamatala mai suiga iloga na ia faia ina ia avea ai ma se Molimau a Ieova, ma na faapea mai afai ou te taunuu i Egelani, ia ou talanoa i Molimau a Ieova. Sa ou ioe e faia faapea. Peitaʻi, ina ua ou taunuu, sa ou toe foʻi lava i le olaga sa ou ola muamua ai.

I se tasi aso, sa ou feiloaʻi ai i se tamāloa Molimau a Ieova o loo ofo mekasini o Le Olomatamata ma le Ala Mai! i se magāala pisi i Lonetona. Na ou toe manatua laʻu folafolaga na fai iā Annunziato, ma ou talosaga loa i le Molimau ina ia fai saʻu suʻesuʻega faale-Tusi Paia.

Sa ou matuā maofa i mea na ou aʻoaʻoina mai i le Tusi Paia. O se faaaʻoaʻoga, sa pāʻia loʻu loto i upu o loo i le 1 Ioane 1:9, lea o loo taʻua ai e faatatau i le Atua: “Afai e faailoa atu a tatou agasala, e faamaoni ma amiotonu o ia e na te faamagaloina a tatou agasala, ma faamamāina ai i tatou.” Sa telē se aafiaga o lenei mau iā te aʻu, ona sa ou lagona le matuā lē mamā o loʻu olaga. Sa amata loa ona ou auai i sauniga a Molimau a Ieova i le Maota mo Sauniga. Sa latou talia fiafia aʻu, ma na ou mātauina le māfana o a latou faauōga, o se mea ua leva ona ou moomoo i ai. Sa ou manaʻo ai loa e avea ma vaega o la latou faapotopotoga lea e pei o se aiga.

Sa faigofie ona ou taofia le faaaogāina o fualaau faasāina ma le ola i se olaga lē mamā. Peitaʻi sa matuā faigatā ona faaleleia oʻu uiga. Sa ou iloa e ao ona ou feutagaʻi ma tagata i se auala faaaloalo ma magafagafa. O loo ou tauivi pea ma nisi o uiga lē lelei i le taimi nei. Peitaʻi ua mafai ona ou agaʻigaʻi i luma ona o le fesoasoani a Ieova. I le 1997 ina ua mavae le ono masina talu ona ou suʻesuʻeina le Tusi Paia, sa ou papatiso ai loa e avea ma Molimau a Ieova.

Ina ua uma ona ou papatiso, sa ou faaipoipo iā Barbara, o lē e leʻi leva foʻi ona avea ma Molimau a Ieova. Ina ua mātauina e se tasi na avea muamua ma aʻu uō le telē o le suiga iā te aʻu, sa ia suʻesuʻeina loa le Tusi Paia. O le iʻuga na avea o ia ma Molimau a Ieova, faapea foʻi lona tuafafine. Mulimuli ane sa suʻesuʻeina foʻi e le uso o le tinā o loʻu tinā ua silia i le 80 tausaga, le Tusi Paia ma papatiso a o leʻi maliu o ia.

O loo oʻu auauna nei o se toeaina i le faapotopotoga o loo ma auai ai, ma ua avea i maʻua ma laʻu avā o ni tagata talaʻi faataimi atoa, ina ia fesoasoani e aʻoaʻo atu le Tusi Paia i tagata e tautatala i le gagana Italia o loo nonofo i Lonetona. O nisi taimi ou te lagona le faanoanoa pe a mafaufau i loʻu olaga sa iai, peitaʻi e fesoasoani tele mai Barbara iā te aʻu. Ua ou maua se aiga mautū sa ou moomoo i ai, faapea se Tamā alofa sa ou naunau i ai i le tele o taimi. Sa ou ōle atu i le Atua mo na o se tausaga se tasi ou te ola fiafia ai ma filemu, ae o lea ua ia foaʻi mai le tele o isi mea!