Ina ia faafiafiaina Ieova, e tatau ona iā i tatou le faatuatua. Peitaʻi, ua faapea mai le Tusi Paia “e lē o tagata uma e iai le faatuatua.” (2 Tesa. 3:2) Na tusi le aposetolo o Paulo e faatatau i ē na sauāina o ia, o i latou o ni “tagata taulamalama ma amioleaga,” ma na manaʻomia ona laveaʻiina mai ai o ia. Peitaʻi, e iai foʻi isi e faatatau atu i ai le faamatalaga a Paulo e uiga i le faatuatua. Ua teena e nisi tagata faamaoniga manino e iai Lē na foafoaina mea uma, po o le Atua. (Roma 1:20) Ae ua faapea mai isi e latou te talitonu i le Atua. Peitaʻi, e lē lava lenā talitonuga ina ia atiaʻe ai le ituaiga o faatuatua e faafiafiaina ai Ieova.

E tatau ona tatou talitonu o loo soifua Ieova, ma “e na te tauia” i latou e malosi le faatuatua. (Epe. 11:6) O le faatuatua o se vala o le fua o le agaga paia o Ieova. Pe a tatalo atu la iā te ia, o le a tatou maua ai le fesoasoani a lona agaga paia. (Luka 11:​9, 10, 13) O se tasi o auala autū e maua ai lenā fesoasoani, o le faitau lea o le Afioga a le Atua. Pe a māeʻa lenā, ia manatunatu loloto i mea na faitauina ma ia faatatauina. O le iʻuga, o le a taʻitaʻia o tatou olaga e le agaga o Ieova, ma tatou atiaʻe ai le ituaiga o faatuatua e faafiafiaina ai o ia.