PE NA iai se taimi na e feagai ai ma se faafitauli, ae na e manatu e leai se isi e fesoasoani atu iā te oe? O loo tatou ola i “aso e sili ona faigatā,” ma e tatou te lagona ai le lotovaivai ma le tuua toʻatasi. (2 Timo. 3:1) Peitaʻi, e lē faapea ai ua leai nisi e fesoasoani mai iā i tatou. O loo faamatilatila mai i le Tusi Paia le tāua o le iai o ni uō moni i “taimi o puapuaga.”—Faata. 17:17.

Na maua e le aposetolo o Paulo le fesoasoani mai i ana uō na latou faimalaga faatasi. (Kolo. 4:​7-11) A o faafalepuipui Paulo i Roma, na fesoasoani ana uō e fai mea e leʻi mafai ona ia faia. O se faataʻitaʻiga, na faaoo atu e Epaferoti iā Paulo mea na ia manaʻomia, lea na auina mai e uso ma tuafāfine i Filipi. (Fili. 4:18) Na faaoo atu e Tuiko a tusi a Paulo i faapotopotoga eseese. (Kolo. 4:7) O le fesoasoani a uō a Paulo na mafai ai ona ia talaʻi atu pea, e ui ina faanofo vaavaaia i se fale ma ina ua faafalepuipui. E faapefea la ona avea oe o se uō moni?

E iai faaaʻoaʻoga i aso nei e faaalia ai le tāua o le avea ma uō moni. Seʻi mātau le faaaʻoaʻoga a se tuafafine na avea o se uō moni iā Elisabet, o se paeonia sauatoa i Sepania. Ina ua maua le tinā o Elisabet i le kanesa, na text atu e le tuafafine iā Elisabet le tele o feʻau faamāfanafanaloto mai i le Tusi Paia. Na faapea mai Elisabet: “O na feʻau faamāfanafanaloto na faamalosia ai aʻu i aso taʻitasi, ma ou lē lagona ai le tuua toʻatasi.”—Faata. 18:24.

E faamalosia a tatou faauōga ma o tatou uso ma tuafāfine, pe a tatou fesoasoani iā i latou e auai i sauniga ma talaʻiga. O se faataʻitaʻiga, pe e mafai ona e tauofo e piki se uso po o se tuafafine matua mo sauniga po o le talaʻiga? O le faia faapea, o le a maua ai le taimi e te lua fefaalaeiauaʻi ai. (Roma 1:12) Peitaʻi, e iai isi uso ma tuafāfine e lē mafai ona tuua o latou fale. E faapefea ona avea oe o se uō moni iā i latou na?

O isi uso ma tuafāfine e lē mafai ona auai i sauniga i le Maota, ona atonu o ni faafitauli tau i le soifua mālōlōina, po o nisi tulaga e faafaigatā ai ona latou faia faapea. Seʻi mātau le faaaʻoaʻoga a David, o lē na maua i le kanesa e taʻua o le lymphoma. E silia ma le ono masina o feagai o ia ma togafitiga faafomaʻi (chemotherapy). A o faagasolo lenā taimi, na faaaogā e David ma lana avā o Lidia le Zoom ina ia fesootaʻi mai ai i sauniga.

Na faapefea ona fesoasoani uso ma tuafāfine iā i laʻua? E taumafai i latou o loo auai i sauniga i le  Maota e talanoa iā David ma Lidia i luga o le Zoom, pe a uma sauniga taʻitasi. E lē gata i lea, pe a faia ni a la sao i le sauniga, e text atu isi uso ma tuafāfine e faamālō atu iā i laʻua. O le iʻuga, na atili vavalalata atu ai David ma Lidia i le ʻauuso, ma la lē lagona ai le tuua toʻatasi.

Pe e mafai ona tatou talaʻi faatasi ma se uso po o se tuafafine e lē o mafai ona tuua lona fale? E mafai ona tatou faia ni fetuunaʻiga lāiti i la tatou faasologa masani ina ia galulue faatasi ma i latou, ma faailoa atu ai e lē o galo i latou. (Faata. 3:27) Pe e mafai ona faatulaga se taimi e te lua talaʻi faatasi ai, e ala i le tusia o ni tusi pe faaaogā le telefoni? E mafai foʻi e i latou nei ona fesootaʻi mai i le talaʻiga e ala i le Zoom. O le mea lenā na faia e le faapotopotoga a David ma Lidia, ma na la matuā talisapaia. Na faapea mai David: “E matuā faamalosia i maʻua, pe a faalogo atu i se manatu faalaeiau ma le tatalo i le faatasiga o le talaʻiga.” E lē gata i lea, e mafai ona e fesili atu i se uso po o se tuafafine e lē o mafai ona tuua lona fale, pe e talafeagai ma lona tulaga le aumai o sau tagata suʻesuʻe o le Tusi Paia i lona fale, e te lua faia faatasi le suʻesuʻega.

Pe a tatou galulue faatasi ma uso ma tuafāfine e lē o mafai ona tuua o latou fale, ma mātauina o latou uiga lelei, o le a atili ai ona tatou vavalalata atu iā i latou. O se faataʻitaʻiga, pe a lua talaʻi faatasi ma se tasi ma e mātauina le lelei o le auala e na te faaaogā ai le Afioga a le Atua ina ia pāʻia ai le loto o se tagata, e mautinoa o le a atili ai ona e vavalalata atu iā te ia. Pe a e fesoasoani i isi ou uso tapuaʻi ina ia auai i sauniga ma talaʻiga, o le a faalautele atu ai lou loto i isi, ma e maua ai ni uō fou.—2 Kori. 6:13.

Na faamāfanafanaina Paulo i le iai faatasi ma lana uō o Tito. (2 Kori. 7:​5-7) E ui o se mea lelei le fai atu o upu faamāfanafana i uso ma tuafāfine, ae ua iloa mai i le faaaʻoaʻoga a Tito, e tatou te faamāfanafanaina foʻi i latou e ala i le faaalu faatasi o le taimi ma i latou, ma avatu se fesoasoani aogā.—1 Ioa. 3:18.

O o tatou uso ma tuafāfine i Rusia o ni faaaʻoaʻoga mataʻina o le fesoasoani o le tasi i le isi. Seʻi mātau le faaaʻoaʻoga a Sergey ma lana avā o Tatyana. Ina ua uma ona osofaʻia e leoleo lo la fale, ona ave lea o i laʻua i le ofisa o leoleo ma tuʻifesili ai. Na muamua faasaʻoloto Tatyana ma na toe foʻi i lo la fale. Na faamatala e Sergey: “Ina ua taunuu Tatyana i le fale, na vave lava ona asiasi ane iā te ia se tuafafine lototele. E toʻatele uso ma tuafāfine na ō mai ma fesoasoani e toe tapena le ma fale.”

Na faapea atili mai Sergey: “E ese loʻu fiafia i le Faataoto 17:​17, lea e faapea mai, ʻO le uō moni e alofa i taimi uma ma o ia o se uso ua fanau mo taimi o puapuaga.’ Na ou tofo totino i le moni o na upu i le taimi na ou feagai ai ma sauāga. Na saunia mai e Ieova ni uō lototetele e fesoasoani mai iā te aʻu.”

A o tatou feagai ma tulaga e sili ona faigatā, e tatou te manaʻomia ni uō e fesoasoani mai iā i tatou. E sili ona tatou manaʻomia ni uō faapena pe a oo i le puapuaga tele. O lea, seʻi o tatou faia taumafaiga uma ina ia avea o se uō moni i le taimi lenei!—1 Pete. 4:​7, 8.