1-2. Ua faapefea ona talitutusa o tatou tulaga ma le alii talavou o loo taʻua i le palakalafa 1?

 SEʻI faapea e iai se alii talavou na ola aʻe i se aiga maumea. I se tasi aso, na maliliu ai ona mātua i se faalavelave faafuaseʻi, ma na matuā mafatia ai lava o ia. Peitaʻi, e iai se isi tala lē lelei na matuā faateʻia ai lenei alii talavou. Na ia iloa ane e tele tupe a lo latou aiga na faamaʻimau e ona mātua, ma ua tele ai aitalafu. Nai lo o le mauaina o ni tupe, ae ua tuua o ia ma se aitalafu telē e tatau ona ia totogiina. Ua mananaʻo foʻi tagata na aitalafu i ai ona mātua e vave totogi atu. E lē mafai ona ia totogia lenei aitalafu telē.

² E talitutusa o tatou tulaga ma lenā alii talavou. Na lelei atoatoa o tatou uluaʻi mātua o Atamu ma Eva, ma na la ola i se parataiso matagofie. (Kene. 1:27; 2:​7-9) Na la maua le avanoa e ola ai e faavavau, ae na suia mea uma. Na aveesea i laʻua e Ieova mai i lenā Parataiso, ma e la te leʻi toe maua ai le avanoa e ola e faavavau. O le ā se mea na la tuufaasolo mai i a la fanau? Ua faapea mai le Tusi Paia: “E pei ona oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata  uma auā ua agasala uma lava.” (Roma 5:12) Ua tuufaasolo mai e Atamu iā i tatou le agasala, lea ua māfua ai ona tatou feoti. O lenei agasala tuufaasolo ua pei o se aitalafu telē, ma e leai se tasi o i tatou e mafai ona totogia.—Sala. 49:8.

 3. Aiseā ua faatusaina ai a tatou agasala i “aitalafu”?

³ Na faatusa e Iesu agasala i “aitalafu.” (Mata. 6:​12, fpl.; Luka 11:4) Pe a tatou agasala, e tai pei o loo tatou aitalafu iā Ieova. E tatau ona tatou totogia le faasalaga mo le agasala. Pe a lē totogia, e na o le pau le auala e soloia ai o le oti.—Roma 6:​7, 23.

 4. (a) Pe a aunoa ma le fesoasoani, o le ā o le a tupu i tagata agasala uma? (Salamo 49:​7-9) (e) I le Tusi Paia, o le ā e uiga i ai le upu “agasala”? (Tagaʻi i le pusa “ Agasala.”)

⁴ E lē mafai i a tatou lava taumafaiga ona toe mauaina ai mea uma na melea e Atamu ma Eva. (Faitau le Salamo 49:​7-9.) Pe a aunoa ma le fesoasoani, e tatou te lē maua se faamoemoe mo le lumanaʻi po o le faamoemoe foʻi o le toetū. O lea pe a tatou feoti, o le a leai so tatou faamoemoe, e tai pei lava o meaola.—Fai. 3:19; 2 Pete. 2:12.

 5. O le ā le auala ua fesoasoani mai ai lo tatou Tamā alofa e totogi le agasala ua tuufaasolo mai? (Tagaʻi i le ata.)

⁵ Seʻi toe mafaufau i le alii talavou lea na taʻua i le amataga. O ā ni ona faalogona pe a ofo mai se tamāloa maumea e totogi ana aitalafu uma? E mautinoa o le a matuā talisapaia e lenei alii talavou lenā gaoioiga agalelei. I se tulaga talitutusa, ua foaʻi mai e lo tatou Tamā alofa o Ieova se meaalofa e totogi ai le agasala ua tuufaasolo mai iā Atamu. Na faamatalaina e Iesu lenā meaalofa e faapea: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, ae ia maua le ola e faavavau.” (Ioa. 3:16) O lenā meaalofa, ua mafai ai foʻi ona tatou atiaʻe se faiā lelei ma Ieova.

 6. O ā faaupuga mai i le Tusi Paia o le a tatou talanoaina i lenei mataupu, ma aiseā?

⁶ E faapefea ona aogā iā i tatou lenei meaalofa mataʻina, ma faamagaloina ai a tatou agasala po o “aitalafu”? E taliina lenā fesili pe a iloilo faaupuga nei o loo taʻua i le Tusi Paia: leleiga, togisala, togiola, laveaʻiina ma le taʻuamiotonuina. O le a talanoaina i lenei mataupu uiga o nei upu taʻitasi. A o tatou manatunatu loloto i uiga o na upu, o le a faalolotoina ai lo tatou lotofaafetai i le gaoioiga na faia e Ieova e faamagalo ai a tatou agasala.

 LE SINI: MAUA SE LELEIGA

 7. (a) O le ā se isi mea na melea e Atamu ma Eva? (e) Talu ai na tatou tupuga mai iā Atamu ma Eva, o le ā se mea e tatou te matuā manaʻomia lava? (Roma 5:​10, 11)

⁷ Ina ua agasala Atamu ma Eva, na la melea le avanoa e maua ai le ola e faavavau, ma lē toe maua ai sa laʻua faiā māfana ma lo laʻua Tamā o Ieova. I le taimi muamua, na avea Atamu ma Eva o se vaega o le aiga o le Atua. (Luka 3:38) Ae ina ua la lē usiusitaʻi iā Ieova, na tuliesea i laʻua mai i lona aiga, ma na tupu lenā mea a o leʻi maua ni a la fanau. (Kene. 3:​23, 24; 4:1) Talu ai e tatou te tupuga mai iā Atamu ma Eva, e manaʻomia la ona tatou maua se leleiga ma Ieova. (Faitau le Roma 5:​10, 11.) I nisi faaupuga, e manaʻomia ona tatou atiaʻe se faiā lelei ma ia. Ua taʻua i se tasi tusi, o le upu Eleni o loo faaaogā mo le “leleiga,” e mafai ona uiga atu i le “atiaʻe o se faauōga ma se fili.” O le mea e mataʻina ai, na tausolomua Ieova e faia lenei faaleleiga. E faapefea?

LE FAATULAGAGA: TOGISALA

 8. O le ā e uiga i ai le togisala?

⁸ O le togisala o le faatulagaga na faia e Ieova, ina ia mafai ai e tagata agasala ona toe maua se faiā māfana ma ia. E aofia ai le fesuiaʻi o ni mea e tutusa lelei o la tau, ina ia mafai ai ona toe maua pe fesuiaʻi se mea na leiloa pe faaleagaina. I Tusitusiga Paia Eleni, o loo faasino atu le upu “togisala” i le auala na saunia e Ieova ina ia maua ai e tagata taʻitoʻatasi se faiā māfana ma ia.—Roma 3:25.

 9. O le ā le faatulagaga lē tumau na faavae e Ieova ina ia faamagalo ai agasala a tagata Isaraelu?

⁹ Ina ia maua e tagata Isaraelu se faiā lelei ma Ieova, na ia faavaeina se faatulagaga lē tumau mo le faamagaloina o a latou agasala. I Isaraelu, na faamanatuina ai le Aso o le Togisala i tausaga taʻitasi. I lenā aso, e ofoina atu ai e le ositaulaga sili taulaga e faaaogā ai manu ina ia faamagaloina ai agasala a le nuu. O le mea moni, e lē mafai e na taulaga ona faamagaloina atoatoa agasala a tagata, talu ai e maulalo ifo manu i lo o tagata. Peitaʻi, pe afai e ofoina atu e tagata Isaraelu ua salamō taulaga e faafinagaloina e Ieova, e finagalo malie o ia e faamagalo a latou agasala. (Epe. 10:​1-4) E lē gata i lea, o lenā faatulagaga ma le ofoina atu e lē aunoa o taulaga mo agasala, na faamanatu atu ai i tagata Isaraelu le matuiā o lo latou tulaga agasala, ma lo latou matuā manaʻomia o se faatulagaga tumau mo le faamagaloina o a latou agasala.

10. O le ā le faatulagaga tumau na faavae e Ieova ina ia faamagaloina ai agasala?

¹⁰ Na finagalo Ieova e faavae se faatulagaga tumau mo le faamagaloina o agasala. Na ia tuu atu lona Alo pele ina ia ʻfaatasi ona foaʻi atu lona ola, e tauaveina ai agasala a le toʻatele.’ (Epe. 9:28) Na ʻfoaʻi atu e Iesu lona ola e fai ma togiola e sui aʻi tagata e toʻatele.’ (Mata. 20:28) O le ā le togiola?

LE TAU: LE TOGIOLA

11. (a) I le Tusi Paia, o le ā le togiola? (e) O le ā e manaʻomia ina ia totogi ai le togiola?

¹¹ I le Tusi Paia, o le togiola o se tau e totogi ina ia faia ai le togisala ma maua se leleiga. I le silafaga a Ieova, o le togiola o le faavae lea ina ia toe maua ai se mea na leiloa. I le ā le itu? Ia manatua, na melea e Atamu ma Eva le ola lelei atoatoa faapea le avanoa e ola ai e faavavau. O lea, e tatau ona tutusa le tau o le togiola ma le tau o le mea na leiloa. (1 Timo. 2:6) E na o se tane po o se alii e mafai ona totogia le togiola, o sē e (1) lelei atoatoa; (2) e mafai ona ola e faavavau  i le lalolagi; ma le (3) e lotomalie e faataulaga lona ola mo i tatou. E pau lenā o le auala e mafai ona suia ai le ola na leiloa, pe faia ai le togisala.

12. Aiseā na mafai ai e Iesu ona saunia se tau e fetaui lelei mo le togiola?

¹² Seʻi o tatou talanoa i ni māfuaaga se tolu na mafai ai e Iesu ona totogi le tau o le togiola. (1) E lelei atoatoa o ia, ma “e leʻi faia e ia se agasala.” (1 Pete. 2:22) (2) Ona o lenā tulaga, na mafai ona ia ola e faavavau i le lalolagi. (3) Na lotomalie e maliu ma faataulaga lona ola mo i tatou. (Epe. 10:​9, 10) E lelei atoatoa Iesu, ma e tutusa lelei o ia ma le uluaʻi tagata o Atamu a o leʻi agasala. (1 Kori. 15:45) O le maliu o Iesu, ua mafai ai ona ia faia le togisala mo le agasala a Atamu, ma suia ai le ola lelei atoatoa na melea e Atamu. (Roma 5:19) O lea, na avea ai Iesu ma “Atamu mulimuli.” E lē manaʻomia la se isi tagata lelei atoatoa e totogia le mea na melea e Atamu. “E na o le faatasi lava” ona maliu Iesu.—Epe. 7:27; 10:12.

13. O le ā le eseesega o le togisala ma le togiola?

¹³ O le ā la le eseesega o le togisala ma le togiola? O le togisala, o le gaoioiga lea e faia e le Atua ina ia toe maua ai e tagata se faiā lelei ma ia. O le togiola, o le tau lea e totogi ina ia mafai ai ona faia le togisala mo tagata agasala. O lenei tau e faaata mai ai le tau o le toto tāua o Iesu na faamaligiina mo i tatou.—Efe. 1:7; Epe. 9:14.

O AOGĀ: LAVEAʻIINA MA LE TAʻUAMIOTONUINA

14. O le ā o le a tatou iloiloina, ma aiseā?

¹⁴ O ā aogā o le togisala? O loo faaaogā i le Tusi Paia faaupuga eseese e faamatilatila ai na aogā. E ui e taitutusa uiga o nei faaupuga, ae o loo faamatilatila mai e upu taʻitasi se vala patino o le togisala lea e mafai ona tatou maua ai le faamagaloga a Ieova. A o tatou iloiloina nei faaupuga, o le a tatou iloa ai foʻi aogā mo i tatou taʻitoʻatasi.

15-16. (a) I le Tusi Paia, o le ā e faasino atu i ai le upu “laveaʻiina”? (e) O ā ni o tatou faalogona ona o le tuusaʻoloto o i tatou mai i le agasala ma le oti?

¹⁵ I le Tusi Paia, e faasino atu le upu laveaʻiina i le faasaʻoloto po o le faalēaogāina o se mea, ona o le totogi o le togiola. Na faamatalaina e le aposetolo o Peteru e faapea: “Ua outou iloa e leʻi faasaʻolotoina [Ele., “togiolaina; laveaʻiina”] outou i mea e pala o le siliva po o le auro, mai i o outou olaga iʻuvale, lea na tuufaasolo mai iā te outou e o outou augātamā. A o le toto tāua o Keriso, ua pei o se tamaʻi mamoe e lē ponā ma e leai se ila.”—1 Pete. 1:​18, 19; fpl.

¹⁶ O le taulaga togiola, ua mafai ai ona tuusaʻoloto i tatou mai i le pule sauā a le agasala ma le oti. (Roma 5:21) O le māfuaaga lea e tatou te matuā lotofaafetai ai iā Ieova ma Iesu, ona ua laveaʻiina i tatou e ala i le toto tāua po o le soifua o Iesu.—1 Kori. 15:22.

17-18. (a) O le ā e uiga i ai le taʻuamiotonuina o i tatou? (e) O ā aogā mo i tatou?

¹⁷ O le taʻuamiotonuina e uiga atu i le faalēaogāina po o le soloia o ni moliaga. O le faia e Ieova o lenā mea, e na te lē o solia ai ana lava tapulaa amiotonu. E lē taʻuamiotonuina e Ieova i tatou ona o ni a tatou lava taumafaiga, pe tuufau foʻi i tatou e faia pea le agasala. Ae ona o lo tatou faatuatua i le togisala ma le tau na totogiina mo le togiola, o le māfuaaga lea ua mafai ai e Ieova ona faamagaloina a tatou agasala.—Roma 3:24; Kala. 2:16.

¹⁸ O ā aogā o le taʻuamiotonuina e Ieova o i tatou? O i latou ua filifilia e pule faatasi ma Iesu i le lagi, ua taʻuamiotonuina i latou o  fanau a le Atua. (Tito 3:7; 1 Ioa. 3:1) Ua faamagaloina i latou, ma e peiseaʻī ai e latou te leʻi faia ni agasala. O lea, ua latou agavaa ai e ulu atu i le Malo. (Roma 8:​1, 2, 30) O i latou e maua le faamoemoe e ola i le lalolagi, ua taʻuamiotonuina i latou o ni uō a le Atua ma ua faamagaloina a latou agasala. (Iako. 2:​21-23) O le motu o tagata e toʻatele o le a faasaoina mai iā Amaketo, e latou te maua le avanoa e ola ai pea e lē oo i ai le oti. (Ioa. 11:26) O le a toetutū mai “tagata amiotonu” ma “tagata amiolētonu” ua maliliu. (Galu. 24:15; Ioa. 5:​28, 29) I le iʻuga, o le a maua e auauna usiusitaʻi uma a Ieova i le lalolagi “le saʻolotoga mamalu o le fanau a le Atua.” (Roma 8:21) Maʻeu se faaeaga mataʻina ona o le faatulagaga o le togisala, lea ua tatou maua ai se leleiga atoatoa ma lo tatou Tamā o Ieova!

19. Ua faapefea ona suia o tatou tulaga? (Tagaʻi foʻi i le pusa “ O Aogā mo i Tatou.”)

¹⁹ O le mea moni, na pei o tatou tulaga o le alii talavou na taʻua i le amataga. Na leiloloa mea uma sa iā te ia, ma tuua ai o ia ma se aitalafu telē e lē mafai ona ia totogia. Ae e tatou te faafetai iā Ieova ona o lana fesoasoani. Ua suia o tatou tulaga ona o le faatulagaga o le togisala ma le totogi o le togiola. O lo tatou faatuatua iā Iesu Keriso, ua mafai ai ona laveaʻi pe faasaʻolotoina i tatou mai i le agasala ma le oti. Ua mafai ai foʻi ona soloia ma faalēaogāina a tatou agasala. Ae o le mea e sili ona tāua, ua mafai ai ona tatou maua se faiā māfana ma lo tatou Tamā alofa o Ieova.

20. O le ā o le a tatou talanoaina i le mataupu o loo sosoo mai?

²⁰ E faateleina lo tatou lotofaafetai, pe a tatou manatunatu i mea ua faia e Ieova ma Iesu mo i tatou. (2 Kori. 5:15) Pe ana aunoa ma le la fesoasoani, semanū e leai so tatou faamoemoe. Ae o le ā tonu lava le aogā o le faamagaloga a Ieova mo i tatou taʻitoʻatasi? O le a taliina lenā fesili i le mataupu o loo sosoo mai.