O MUSIKA o se vaega na matuā tāua i le aganuu a Isaraelu anamua. E masani ona taʻua i le Tusi Paia tagata e tāina meafaifaaili ma usuina pese. O le mea moni, o le tele o vaega o le Tusi Paia o pese. O se faataʻitaʻiga, o le tusi o Salamo, Pese a Solomona, ma Auega. Ua faamatalaina i le tusi Music in Biblical Life, o loo taʻua manino i le Tusi Paia na faaaogā e tagata Isaraelu musika i le tele o vala o o latou olaga.

Musika i aso faisoo. Na tāina e tagata Isaraelu musika e faailoa mai ai o latou lagona. (Isa. 30:29) Na tāina e fafine topa ma usu ma le fiafia pese ma sisiva i faatasiga fiafia, e pei o le faauuina o se tupu fou, pe a manumalo se ʻautau i se taua, ma faatasiga mo le tapuaʻiga. (Faama. 11:34; 1 Samu. 18:​6, 7; 1 Tu. 1:​39, 40) Na usuina foʻi e tagata Isaraelu pese o auega pe a faavauvau i se maliu. (2 No. 35:25) O le mea moni, “o tagata Eperu o tagata e iloga i le fai musika” e pei ona faamatalaina i le McClintock and Strong’s Cyclopedia.

Musika i le maota o le tupu. Na fiafia tupu o Isaraelu e faalogologo i musika. Na valaaulia e le tupu o Saulo Tavita e alu atu i lona maota e tā le kitara mo ia. (1 Samu. 16:​18, 23) Ina ua avea Tavita ma tupu, na ia fausia meafaifaaili, fatuina pese matagofie, ma faamaopoopo ē na iai meafaifaaili e fai ai pesega i le malumalu o Ieova i se taimi mulimuli ane. (2 No. 7:6; Amo. 6:5) I le taimi o le pulega a le tupu o Solomona, na iai tama ma teine pepese i lona maota.—Fai. 2:8.

Musika mo le tapuaʻiga. O le vala e sili ona tāua, na faaaogā e tagata Isaraelu musika e tapuaʻi atu ai iā Ieova. E 4,000 tane na tāina meafaifaaili i le malumalu i Ierusalema. (1 No. 23:5) Na tāina e nei tagata tomai i le musika sumepalo, o meafaifaaili e iai uaua, kitara, ma iliina pū. (2 No. 5:12) Peitaʻi, e lē na o i latou na iai le tomai i le musika sa faaaogāina musika e tapuaʻi atu ai iā Ieova. E foliga mai o le toʻatele o tagata Isaraelu na usuina le Pese a Ē Ō Aʻe i le Aai, i taimi uma na latou faimalaga ai i tausamiga na faia i tausaga taʻitasi i Ierusalema. (Sala. 120-134) E tusa ai ma tusitusiga Iutaia, na usu e tagata Isaraelu Salamo a Aleli a i le taimi o le tausamiga o le Paseka.

O loo avea pea musika o se vaega tāua i olaga o auauna a le Atua i aso nei. (Iako. 5:13) E tatou te usuina pese a o tatou tapuaʻi iā Ieova. (Efe. 5:19) O musika e autasia ai lo tatou ʻauuso Kerisiano. (Kolo. 3:16) E faamalosia ai foʻi i tatou pe a feagai ma tulaga faigatā. (Galu. 16:25) Ioe, o musika o se auala matagofie lea e faaalia ai lo tatou faatuatua ma lo tatou alofa iā Ieova.