Po ua E Faatulaga se Taimi e Suʻesuʻe ai le Tusi Paia?

I LE tausaga ua mavae, na faailoa mai ai e le Vaega Pule fesuiaʻiga i faasologa o sauniga a faapotopotoga, ina ia tele ai le taimi mo suʻesuʻega faale-Tusi Paia ma talanoaga a aiga. Afai o oe o le ulu o le aiga, ia faamautinoa ua faia e lē aunoa suʻesuʻega faale-Tusi Paia ma lau avā ma le fanau. E aogā i ulugalii e leai ni fanau le faaaogā o lea taimi e suʻesuʻe faatasi ai i le Tusi Paia. Ia faaaogā lelei lea taimi e uso ma tuafāfine nofofua e leai ni tiute faaleaiga, e faia ai a latou suʻesuʻega totino.

E toʻatele ua faaalia le talisapaia o lenei fuafuaga, o le Tapuaʻiga Afiafi a le Aiga. O se faaaʻoaʻoga, na tusi mai se toeaina e igoa iā Kevin e faapea: “E lē lava le upu faafetai e faamatala ai lagona o le faapotopotoga. O i matou o toeaina, sa matou talanoa i le auala e faaaogā ai pō e leai ni sauniga e faia ai le mea lea e fautuaina mai e le Vaega Pule, o le suʻesuʻe ma o matou aiga.”

Na tusi mai Jodi, o le avā a se toeaina e faapea: “E toʻatolu la ma fanau teine, e 15, 11, ma le 2 tausaga. E leʻi leva ona matou siitia i se faapotopotoga a tagata logonoa. E tele le taimi ma taumafaiga e sauniuni ai mo sauniga uma. Ae o lenei suiga ua matou maua ai se afiafi faaopoopo e uaʻi totoʻa atu ai i le tapuaʻiga faaleaiga!”

Na tusi mai se ulugalii paeonia sauatoa, o John ma JoAnn e faapea: “E leai se taimi patino o le ma suʻesuʻega faale-aiga ona e faafetaui i mea e fai a le faapotopotoga. Ae o lenei suiga fou, o se meaalofa mai iā Ieova e faafouina ai i maʻua pe afai e faaaogā tatau le taimi.”

Sa faatulaga e Toni, o se uso nofofua ua ova ma le 20 ona tausaga, le afiafi o Aso Lua e fai ai ana suʻesuʻega totino. E faaaogā isi taimi o le vaiaso e sauniuni ai mo sauniga a le faapotopotoga. Peitaʻi, ua faapea mai Toni, “E ese loʻu fiafia i Aso Lua.” Aiseā? “O loʻu taimi faapitoa lenā mo Ieova.” Fai mai o ia: “E tusa ma le lua itula ou te suʻesuʻe ai i mataupu e faamalosia ai la ma faiā ma Ieova. Ua tele ai taimi e manatunatu ai i mau o le Tusi Paia na ou faitauina.” O le ā le iʻuga? “Ua sili ona tāmau i loʻu loto fautuaga a Ieova i lo le taimi muamua.” O le ā se faaaʻoaʻoga o lea mea? “Na ou faitau i le tusi o le Insight e uiga i le faauōga a Tavita ma Ionatana. E tele mea na ou aʻoaʻoina mai i le uiga lē manatu faapito o Ionatana. Na aogā lana faaaʻoaʻoga iā te aʻu e iloa ai le uiga o le avea o se uō moni. Ou te fiafia tele i pō o Aso Lua auā e tele manatu tāua o le a ou aʻoaʻoina ai!”

E mautinoa le tele o aogā e maua e auauna uma a Ieova pea a faaaogā lelei nei taimi faaopoopo, e suʻesuʻe lelei ai i le Tusi Paia ma faia ai le tapuaʻiga a le aiga.