1. Aiseā ua talafeagai ai ona taʻua Ieova o le uluaʻi Faievagelia?

O LE faievagelia o se tasi lea e faalauiloaina atu tala lelei. O Ieova o le uluaʻi Faievagelia, ma o ia o le Faievagelia sili. Ina ua fouvale Atamu ma Eva, ona faailoa mai loa lea e Ieova o le tala lelei o le a tafiesea Satani le Tiapolo. (Kene. 3:15) A o faagasolo senituri, na faagaeeina e Ieova ni tane faamaoni e tusia le auala o le a taʻumamāina ai lona suafa, le faalēaogāina o galuega a le Tiapolo, ma toe maua le avanoa e ola ai e faavavau.

2. (i) O le ā le matafaioi a agelu i le galuega faievagelia? (ii) Na faapefea ona avea Iesu ma faaaʻoaʻoga sili o se faievagelia?

² Ua avea foʻi agelu o ni faievagelia, auā e latou te folafolaina atu tala lelei, ma fesoasoani i isi e faailoa atu lenā tala lelei. (Luka 1:19; 2:10; Galu. 8:26, 27, 35; Faaa. 14:6) Ae faapefea le agelu sili o Mikaele? A o soifua o ia i le lalolagi o se tagata, na avea Iesu ma faaaʻoaʻoga sili o se faievagelia, auā sa faaautū lona olaga i le folafolaina atu o le tala lelei.​—Luka 4:16-21.

3. (i) O le ā le tala lelei o loo tatou folafolaina atu? (ii) O ā fesili o le a tatou talanoaina?

³ Na faatonu e Iesu ona soo ina ia fai le galuega faievagelia. (Mata. 28:19, 20; Galu. 1:8) I le 2 Timoteo 4:5, na ʻaiʻoi ai Paulo iā Timoteo ina ia ʻfai le galuega a le faievagelia, ma ia faia ma le māeʻaeʻa lana faiva.’ I le avea ai ma soo o Iesu, o loo tatou folafola atu le tala lelei, lea e aofia ai le faamautinoaga o le alofa o Ieova mo i tatou. (Ioa. 3:16; 1 Pete. 5:7) O se tasi o auala ua faaalia mai ai lenā alofa,  e ala i lona Malo. E tatou te fiafia e faailoa i isi e mafai ona latou maua se faiā lelei ma Ieova, pe a usiusitaʻi iā te ia, gauaʻi i le pulega a lona Malo, ma faia le amiotonu. (Sala. 15:1, 2) O se tasi vala o le tala lelei o le finagalo o Ieova ia aveesea mafatiaga uma ma tigā. (Isa. 65:17) I le avea ai ma faievagelia, seʻi o tatou talanoaina tali o fesili tāua nei: (1) Aiseā e tāua ai ona iloa e tagata le tala lelei? (2) E faapefea ona tatou taulau manuia o ni faievagelia?

4. O ā aʻoaʻoga sesē ua aʻoaʻoina ai tagata e faatatau i le Atua?

⁴ Seʻi faapea ua fai atu se tasi ua sola lou tamā. Ae faapea mai nisi, o ia o se tagata faamaualuga ma sauā. E faapea mai nisi e lē mafai ona oulua toe fesootaʻi ona ua maliu. E talitutusa na manatu ma aʻoaʻoga a le toʻatele e faatatau i le Atua. O ia o se Atua e mamalu tele, e lē finagalo e faailoa mai o ia, ma e sauā. Ua faapea mai nisi taʻitaʻi lotu, e faasala e le Atua tagata leaga i seoli. Ua tuuaʻia e tagata le Atua o ia e māfua ai mala faalenatura ma ua aafia ai tagata i mafatiaga. Ua faapea mai tagata o faasalaga nei e mai le Atua, e ui lava ina fano ai soifua o tagata lelei ma tagata leaga.

5, 6. O ā aafiaga ua oo i tagata ona o le aʻoaʻoga o le evolusione ma aʻoaʻoga sesē faalotu?

⁵ Ua faapea mai nisi e leai se Atua. Seʻi mafaufau i le aʻoaʻoga o le evolusione. Ua faapea mai i latou e lagolagoina lenā aʻoaʻoga, na teʻi lava ua iai le tagata ma meaola e aunoa ma Sē na foafoaina. Ua faapea mai nisi e tupuga mai tagata mai i meaola, e lē faateʻia ai la pe a amio faamanu se tagata. E talitonu nisi o se mea masani, le sauāina e tagata malolosi o ē vaivai. O lea, ua manatu ai le toʻatele e lē mafai ona aveesea faiga lē tonu. O ē talitonu i le evolusione, e leai so latou faamoemoe.

⁶ Ua saosaolaumea le aʻoaʻoga o le evolusione ma aʻoaʻoga sesē a lotu i puapuaga o loo fesagaʻia e tagata i nei aso e gata ai. (Roma 1:28-31; 2 Timo. 3:1-5) Nai lo o le aumaia ai o se tala lelei, ae ua ʻpogisa ai pea o latou mafaufau, ma vavaeese ai i latou i le ola mai i le Atua.’ (Efe. 4:17-19) Ua faigatā ona talia e tagata le tala lelei ona o aʻoaʻoga o le evolusione ma aʻoaʻoga sesē a lotu.​—Faitau le Efeso 2:11-13.

7, 8. E faapefea ona malamalama atoatoa tagata i le tala lelei?

⁷ Ina ia maua e tagata se leleiga ma le Atua, e tatau ona latou talitonu o loo soifua Ieova, ma e iai māfuaaga e tāua ai ona faalatalata atu iā te ia. O lea, e tatau ona tatou faalaeiauina i latou e suʻesuʻe galuega o le foafoaga. O le faia faapea, e latou te aʻoaʻoina ai le atamai o le Atua faapea lona mana. (Roma 1:19, 20) E mafai ona faaaogā le tusi Faalatalata Atu iā Ieova, mataupu e 5 ma le 17, palakalafa e 9-14, faapea le polosiua Po o Silasila Alofa mai ea le Atua iā i Tatou? vaega e 3, e fesoasoani ai i tagata e talisapaia mea ua foafoaina e Ieova. Peitaʻi, e iai fesili e lē mafai ona taliina e ala i le tau ina suʻesuʻe o galuega o  le foafoaga. O se faataʻitaʻiga: Aiseā ua lē taofia ai e le Atua mafatiaga? O le ā le finagalo o le Atua mo le lalolagi? Pe e manatu mamafa mai le Atua iā te aʻu?

⁸ O se faaeaga le aʻoaʻoina o isi i le tala lelei. Ina ia malamalama atoatoa tagata e faatatau i le Atua ma lana fuafuaga, e ao ona latou suʻesuʻeina le Tusi Paia. Ina ia pāʻia loto o tagata, e lē lava le faailoa atu i ai o upu moni, ae e tatau ona faatalitonu i latou. (2 Timo. 3:14) E faaleleia lenā vala e ala i le faaaʻoaʻo iā Iesu. Na ia taulau ona sa lelei le auala na ia faaaogāina ai fesili. E faapefea ona tatou faaaʻoaʻo iā te ia?

9. E faapefea ona tatou fesoasoani i le itu faaleagaga o tagata?

⁹ Aiseā e tāua ai le faaaogāina o fesili i le faiva e pei ona sa faia e Iesu? Seʻi faapea ua fai atu le fomaʻi e tatau ona faia sou taotoga. Atonu e te talitonu iā te ia. Ae faapefea pe afai e faia muamua lenā faaiʻuga, ae leʻi fesili atu i le tulaga o lou maʻi? E mautinoa e te lē maufaatuatuaina o ia. Po o le ā lava le atamai o le fomaʻi, e manaʻomia ona ia fesili, ma iloa āuga o lou maʻi a o leʻi aumaia se fesoasoani. Pe a fesoasoani i tagata e talia le tala lelei o le Malo, e manaʻomia foʻi ona tatou faaaogāina lelei fesili. E faatoʻā mafai ona avatu se fesoasoani, pe a tatou malamalama lelei i le tulaga faaleagaga o le tagata.

10, 11. O ā vala e mafai ona tatou faataunuuina pe a faaaogāina lelei fesili?

¹⁰ Na silafia e Iesu, o fesili e filifilia lelei e mafai ona malamalama ai le faiaʻoga i lana tagata suʻesuʻe. E uunaʻia ai foʻi le tagata aʻoga e manatunatu loloto, ma faaali mai ona manatu. O se faaaʻoaʻoga, na faaaogā e Iesu se fesili faatupu manatu, ina ia aʻoaʻoina ai ona soo e faatatau i le lotomaulalo. (Mare. 9:33) Na ia faaaogā foʻi fesili e mafaufau i ai Peteru ina ia iloa le gaoioiga e tatau ona fai. (Mata. 17:24-26) Na faaaogā e Iesu fesili ina ia iloa ai manatu o ona soo. (Faitau le Mataio 16:13-17.) E leʻi tau ina fetalai Iesu i upu moni. Ae sa ia faaaogā foʻi fesili e pāʻia ai loto o tagata, ma uunaʻia ai i latou e ola e ōgatusa ma le tala lelei.

¹¹ E pe ā ma le tolu ni vala e mafai ona tatou faataunuuina, pe a faaaʻoaʻo iā Iesu i le faaaogāina lelei o fesili. (1) E tatou te iloa ai le auala sili e fesoasoani ai i tagata, (2) foʻia ai ni manatu e ono taofia ai se talanoaga, ma le (3) e fesoasoani ai i tagata e maua ni iʻuga lelei. Seʻi o tatou iloiloina ni faataʻitaʻiga se tolu, i le auala e faaaogā lelei ai fesili.

12-14. E faapefea ona e fesoasoani i lou alo e maua le lototele, pe a faailoa atu i isi le tala lelei? Aumai se faataʻitaʻiga.

¹² Muamua, pe afai o oe o se matua, e faapefea ona e fesoasoani i lou alo e faamatala atu ona talitonuga e faatatau i le foafoaga i totonu o le aʻoga? Ia faalaeiau o ia ina ia lototele e faailoa atu le tala lelei. Nai lo o le otegia o ia pe vave foʻi ona avatu fautuaga, ia faaaʻoaʻo iā Iesu i le faaaogā o fesili ina ia faaali mai  ai ona manatu. E faapefea ona faia lenā tulaga?

¹³ Ia faitau ma lou alo faamatalaga o loo i le mataupu e 5 o le tusi Faalatalata Atu iā Ieova, faapea le vaega 3 o le polosiua Po o Silasila Alofa mai le Atua. Pe a māeʻa, ona fesili lea i ai po o ā ni faamatalaga e sili ona fiafia i ai. Ia faailoa atu i lou alo, e ono eseese o oulua manatu i le mataupu. Ae ia faalaeiau o ia e manatunatu loloto i le māfuaaga e talitonu ai i Lē na foafoaina mea, faapea le māfuaaga e fia auauna ai iā Ieova.​—Roma 12:2.

¹⁴ Ia faailoa atu i lou alo, e mafai ona ia faataʻitaʻia manatu sa oulua talanoaina, pe a molimau atu i se tasi o lana vasega. E mafai ona ia iloilo nisi o manatu, ona faaaogā lea o ni fesili e faaali mai ai manatu o le tamaitiiti o le vasega. O se faataʻitaʻiga, e mafai ona faitau le palakalafa 1 ma le 2 i le itulau e 4 o le polosiua Po o Silasila Alofa mai le Atua. Ona fesili lea i le tamaitiiti: ʻPe na teʻi lava ua iai meafale i lo outou fale?’ E mautinoa e tali mai le tamaitiiti e leai. Ona fesili lea i ai: ʻPe afai sa iai se tasi na fausia na meafale, faamata la e lē tatau foʻi ona iai se tasi na foafoaina i tatou? Pe na teʻi lava ua tatou iai i le lalolagi?’ E manaʻomia ona lototele lau tama pe a talanoa i isi e faatatau i ona talitonuga. O lea, ia aʻoaʻoina o ia e faaaogā lelei fesili, ma ia faia e lē aunoa. O le faia faapea, o le a ia faataunuuina ai lona tiute o se faievagelia.

15. E faapefea ona tatou faaaogā fesili e fesoasoani ai i se tasi e lē talitonu i le Atua?

¹⁵ Lona lua, e tatou te feiloaʻi i le galuega talaʻi ma i latou e fesiligia pe e iai  se Atua, pe lē talitonu foʻi e iai se Atua. Aua le avea na manatu ma itu e taofia ai le talanoaga. Ia fesili ma le faaaloalo i le tagata i māfuaaga, faapea le umi talu ona ia talitonu faapea. Ia faalogologo lelei ma avatu le faamālō i ona manatu. E mafai ona fesili i ai pe talafeagai ma ia le iloiloina o se tusi, o loo iai faamaoniga e iai Sē na foafoaina mea. Afai e fiafia i ai le tagata, e mafai ona ofo i ai le polosiua Po o Silasila Alofa mai le Atua, ma faamatilatila le vaega 3. E ono pāʻia le loto o le tagata ma faigofie ona talia le tala lelei, pe a faaaogā fesili faatupu manatu i se auala faaaloalo.

16. Aiseā e lē atamai ai le faitau e le tagata suʻesuʻe o tali saʻo mai le palakalafa i taimi uma?

¹⁶ Lona tolu, e masani ona faitau mai e le tagata suʻesuʻe tali saʻo mai le palakalafa. E lē fesoasoani lenā i lona tuputupu aʻe faaleagaga, auā e lē o mafai ona ia manatunatu loloto i ana tali. E lē mauaa foʻi le upu moni i lona loto, ma e faigofie ona faavaivai pe a oo mai teteega. (Mata. 13:20, 21) O lea, ia fesili i le tagata suʻesuʻe i sona manatu e tusa o mea ua ia aʻoaʻoina. Ia fesoasoani iā te ia e fefulifulisaʻi i mau o le Tusi Paia, ina ia mafai ona ia faia ni filifiliga atamai. (Epe. 5:14) Pe a lelei le auala e faaaogā ai fesili, o le a faamalosia le faatuatua o tagata suʻesuʻe, ma mafai ai ona fesagaʻia ē taufaasesē ma tetee mai. (Kolo. 2:6-8) O le ā se isi vala e aofia i la tatou matafaioi o ni faievagelia?

17, 18. E faapefea ona oulua galulue faatasi ma se isi tagata talaʻi a o auai i le faiva?

¹⁷ Na aauina atu e Iesu ona soo ina ia galulue taʻitoʻalua i le talaʻiga. (Mare. 6:7; Luka 10:1) Mulimuli ane na taʻua e Paulo i le Filipi 4:3, e iai i latou na latou “galulue faatasi” ma “tauivi faatasi e talaʻia le tala lelei.” Ina ia ōgatusa ma lenā faaaʻoaʻoga faale-Tusi Paia, na amata ai se polokalame i le 1953 e toleni ai tagata talaʻi i le faiva.

¹⁸ E faapefea ona oulua galulue faatasi ma se isi tagata talaʻi a o auai i le faiva? (Faitau le 1 Korinito 3:6-9.) Ia suʻe i mau o loo faaaogā e lau paga, ma uaʻi atu i le talanoaga. E tāua le faia faapea, auā e ono tāpā e lau paga se fesoasoani i le talanoaga. (Fai. 4:12) O se fautuaga: ʻAlofia le faasalavei atu a o sologa lelei le talanoaga. O lou lē magafagafa, e ono lotovaivai ai lau paga ma lē mautonu ai lē ona le fale. E iai taimi e talafeagai ai ona fai sou manatu i le talanoaga. O lea, ia faapuupuu ma faafaigofie ou manatu, ona toe tuu lea i lau paga e faaauau le talanoaga.

19. O le ā e tatau ona tatou manatua, ma aiseā?

¹⁹ E faapefea ona fesoasoani le tasi i le isi a o auai i le talaʻiga? E lelei ona talanoa i auala e faaleleia ai taulimaga o le a faaaogā. Ia ʻalofia le faia o faamatalaga e faatatau i tagata o le oganuu, e tatou te ono lotovaivai ai a o auai i le talaʻiga. Ia ʻalofia foʻi le talanoa i vaivaiga o o tatou uso. (Faata. 18:24) Ia manatua o i tatou o tagata lē lelei atoatoa, ma o le agalelei o Ieova ua tuuina mai ai iā i tatou le ʻoa tautele o le faiva o le tala lelei. (Faitau le 2 Korinito 4:1, 7.) Tau ina ia tatou talisapaia lenei ʻoa tautele, e ala i le faataunuuina atoatoa o la tatou matafaioi o ni faievagelia.