1, 2. (i) O le ā e tatau ona fai ina ia maua ai se faiā lelei ma Ieova? (ii) E faapefea ona tatou maua aogā mai le iloiloina o le auala na tali atu ai tagata i aʻoaʻiga a Ieova?

“O AʻU nei, ou te faalatalata atu i le Atua ou te lelei ai. Ou te sulufaʻi atu i le Alii Pule Silisili Ese o Ieova.” (Sala. 73:28) Aiseā na faatuatuaina ai e le faisalamo Ieova? Muamua atu, sa tigā lona loto ina ua ia vaaia le manuia o tagata amioleaga. Na ia faapea mai: “Ua ou faamamā fua i loʻu loto, ma ua ou fufulu oʻu lima e faailoa atu ai ou te mamā.” (Sala. 73:2, 3, 13, 21) Ae na toe sagatonu lona mafaufau ma mafuta vavalalata atu iā Ieova, ina ua alu i le “afioaga paia o le Atua.” (Sala. 73:16-18) Na aʻoaʻoina e le faisalamo le lesona lenei: Pe a manaʻo se tasi e mafuta vavalalata i le Atua, e tatau ona avea o ia ma tagata o Ieova, ia talia ma faatatauina ana fautuaga.​—Sala. 73:24.

² E tatou te faanaunau e maua se faiā lelei ma Ieova. O lea, e tāua tele ai ona tatou talia ana fautuaga ma aʻoaʻiga. O le auala lenā ua faatonutonu ai i tatou e Ieova, ina ia avea ma ituaiga o tagata e finagalo malie i ai. I aso ua mavae, na faaalia ai e Ieova le alofa mutimutivale, e ala i le tuu atu i tagata taʻitoʻatasi ma atunuu, o le avanoa e talia ai ana aʻoaʻiga. O na faaaʻoaʻoga, na tusia “e faatonu” ma ʻlapataʻia ai i tatou o ē o loo ola i le iʻuga o faiga o mea a le lalolagi.’ (Roma 15:4; 1 Kori. 10:11) O le iloiloina o nisi o na faaaʻoaʻoga, e tatou te malamalama ai i le silafaga a Ieova, faapea le auala e maua ai aogā mai ana taʻitaʻiga.

3. Ua faapefea i le Isaia 64:8 ma le Ieremia 18:1-6, ona faataʻitaʻia le aiā a Ieova e pule ai i tagata? (Tagaʻi i le ata i luga aʻe o le mau autū.)

³ E iā Ieova le aiā e pule ai i tagata ma atunuu e pei o se fai ipu omea. Ua faapea mai le Isaia 64:8: “Ieova e, o oe o lo matou Tamā. O i matou o omea, a o oe o lo matou Fai Ipu Omea; o le galuega a ou aao i matou uma.” E faia e le fai ipu o mea so o se ipu e manaʻo ai i le paluga. E faapena le auala e feutagaʻi ai Ieova ma tagata. E lē pule le paluga po o le ā le ituaiga ipu e fausia. I se tulaga talitutusa, e lē o iā i tatou le aiā e faatonu ai Ieova i le auala e faatonutonu ai i tatou.—Faitau le Ieremia 18:1-6.

4. Pe faamalosia e Ieova tagata e usiusitaʻi iā te ia? Faamatala.

⁴ Na faatonutonu e Ieova Isaraelu e pei o le galuega a se fai ipu omea. Peitaʻi, e lē tutusa Ieova ma se fai ipu omea faale-tagata. I le ā le itu? Na ia tuuina e Ieova i tagata ma atunuu le meaalofa o le filifiliga saʻoloto e fai ai a latou lava filifiliga. E leʻi faia e Ieova nisi tagata e lelei a o nisi e leaga, pe faaaogā foʻi lana pule e faamalosia ai tagata e usiusitaʻi iā te ia. Nai lo o lea, e tatau ona filifili le tagata lava ia pe manaʻo e faasaʻo ma faatonutonuina o ia e Ieova.​—Faitau le Ieremia 18:7-10.

5. O le ā e faia e Ieova pe a teena e se tasi lana taʻitaʻiga?

⁵ Ae faapefea pe a teena e se tasi le taʻitaʻiga a Ieova? E faapefea ona faaaogā e Ieova lana pule e pei o se fai ipu omea? Pe a faigatā ona faia e le fai ipu omea se ituaiga o ipu o loo manaʻo i ai, e filifili o ia pe fai se isi ipu fou, pe tiaʻi foʻi lenā ipu. O le gaoioiga lenā e fai e se fai ipu omea, pe a sesē le auala e fausia ai se ipu. Peitaʻi, e lelei atoatoa le auala e faatonutonu ai e Ieova tagata. (Teu. 32:4) E lē tuuaʻia Ieova pe a musu se tasi e faasaʻo ma faatonutonuina o ia e Ieova. E fetuunaʻi e Ieova le auala e taʻitaʻia ai tagata e fua i le auala e latou te tali atu ai. E aogā iā Ieova i latou e usiusitaʻi iā te ia. O se faataʻitaʻiga, o le ʻaufaauuina o i latou o “ipu e faaaogā mo mea taʻuleleia.” A o i latou e teena le taʻitaʻiga a Ieova, o “ipu o le toʻasā ua tatau i ai le faaumatiaga.”​—Roma 9:19-23.

6, 7. Na faapefea ona tali atu Tavita ma Saulo i fautuaga a Ieova?

 ⁶ E taʻitaʻia foʻi e Ieova tagata e ala i ana fautuaga ma aʻoaʻiga. O se faataʻitaʻiga, seʻi mafaufau i le auala na faasaʻo ai e Ieova tupu o Saulo ma Tavita. Sa iai aafiaga leaga iā Tavita ma isi ona o lona faia o le mulilua ma Patisepa. E ui o ia o le tupu, ae na matuā aʻoaʻia o ia e Ieova e ala mai i le perofeta o Natano. (2 Samu. 12:1-12) O le ā le auala na ia tali atu ai? Na salamō moni Tavita mai i lana agasala. O le iʻuga, na faaalia le alofa mutimutivale o Ieova iā te ia.​—Faitau le 2 Samuelu 12:13.

 ⁷ Ae i le isi itu, e leʻi usitaʻi Saulo i le faatonuga a Ieova. Na auina atu e Ieova le perofeta o Samuelu iā te ia ma le faatonuga ina ia faaumatia tagata Amaleka uma ma a latou manu. Peitaʻi, na faasaoina e Saulo le tupu o  Akako ma manu e sili ona lelei. (1 Samu. 15:1-3, 7-9, 12) Na aʻoaʻia e Ieova Saulo e ala mai iā Samuelu. Sa tatau ona faalogo Saulo i le aʻoaʻiga ma talia le faasaʻoga mai iā Ieova. Peitaʻi na ia teena. Na ia faia faamolemolega, ma manatu e faaaogā manu e fai ai le taulaga iā Ieova. O le iʻuga, na teena e Ieova le avea o Saulo ma tupu, ma lē toe maua ai se faiā lelei ma Ieova.​—Faitau le 1 Samuelu 15:13-15, 20-23.

8. O le ā e tatou te aʻoaʻoina mai le auala na tali atu ai Isaraelu i le faasaʻoga a Ieova?

⁸ Na tuu atu e Ieova i atunuu le avanoa e usiusitaʻi ai iā te ia. Na avea Isaraelu ma nuu o le Atua ina ua faasaʻolotoina mai i Aikupito i le 1513 T.L.M. Na folafola e Ieova o le a ia faatonutonuina i latou. Peitaʻi na latou teena ma faia mea leaga i lana silafaga. Na oo foʻi ina latou tapuaʻi i atua o isi atunuu. Na auina atu e Ieova perofeta e fesoasoani e suia o latou ala, ae na latou teena. (Iere. 35:12-15) Na matuā aʻoaʻia e Ieova i latou. Na faaumatia e Asuria le malo o ituaiga e sefulu i mātū, ae na faaumatia mulimuli ane e Papelonia le malo o Iuta i le itu i saute. O le lesona tāua, e faatoʻā tatou maua aogā mai faasaʻoga mai iā Ieova, pe a tatou taliaina.

9, 10. Na faapefea ona tali atu tagata Nineva i le lapataʻiga a Ieova?

 ⁹ Na tuu atu foʻi e Ieova i tagata Nineva le avanoa e utagia ai ana lapataʻiga. Na fetalai Ieova iā Iona: “Inā tulaʻi ia ma alu i Nineva le aai tele, ma folafola atu i ai ua oo mai i oʻu luma a latou amioleaga.” Sa filifili Ieova e faaumatia i latou.​—Iona 1:1, 2; 3:1-4.

¹⁰ Ina ua faailoa atu e Iona le feʻau, “ona faatuatua lea o tagata o Nineva i le Atua, ma ua latou talaʻi atu le anapogi ma oofu i ʻie talatala, o i latou uma, o ē e mauʻoa ma matitiva, ma ē e matutua ma lāiti.” Ina ua faalogo i ai le tupu, “ona ia tulaʻi lea mai i lona nofoālii ma aveese ona ofu tautupu, ae ofu i le ʻie talatala ma nofo i le lefulefu.” Na talia e tagata Nineva le faasaʻoga a Ieova ma faaalia le salamō. O le iʻuga, e leʻi faaumatiaina e Ieova le aai.​—Iona 3:5-10.

11. O le ā tatou te aʻoaʻoina mai le auala na feutagaʻi ai Ieova ma tagata Isaraelu ma tagata Nineva?

¹¹ E ui na avea Isaraelu ma nuu o le Atua, ae na ia aʻoaʻia i latou. Peitaʻi, e leʻi iai se faiā faapitoa a Ieova ma Nineva, ae na latou talia ana faasaʻoga. O lea na faaalia e Ieova le alofa mutimutivale ma lē faaumatiaina ai i latou. E lē faailogatagata Ieova, ma e na te faamasinoina tagata i le auala e latou te gaoioi ai.​—Teu. 10:17.

12, 13. (i) Aiseā e suia ai e Ieova ana faaiʻuga pe a talia e tagata ana faasaʻoga? (ii) O le ā e uiga i ai le ʻsuia e Ieova o ana filifiliga’ i le tulaga o Saulo ma Nineva?

¹² E lotomalie Ieova e suia ana faaiʻuga, pe a sui le auala e gaoioi ai se tasi. O se faataʻitaʻiga, ua faapea mai le Tusi Paia na “faanoanoa” o ia i lona tofia o Saulo e avea ma tupu. (1 Samu. 15:11) Ina ua salamō tagata Nineva ma suia o latou ala, ua faapea mai le Tusi Paia: “Ona suia lea o le filifiliga a le Atua moni e tusa ma le malaia na ia fetalai ai e faaoo iā i latou; ma e leʻi faaooina i ai le malaia.”​—Iona 3:10.

¹³ Na finagalo malie Ieova iā Saulo i le taimi muamua. Peitaʻi na ia teena le avea o ia ma tupu. E leʻi faapea na sesē le filifiliga na faia e Ieova e avea Saulo ma tupu, ae ona o le lē usitaʻi o Saulo iā te ia. Ina ua salamō tagata Nineva, ona suia lea o lana faaiʻuga. E faamāfanafanaina i tatou i le agalelei ma le alofa mutimutivale o Ieova. E lē gata i lea, o lona lotomalie e sui lana faaiʻuga, pe a suia a tatou amioga.

14. (i) Ua faapefea ona faasaʻo ma faatonutonu i tatou e Ieova i aso nei? (ii) O le ā le auala e tatau ona tali atu ai i faasaʻoga mai iā Ieova?

¹⁴ Ua faaaogā e Ieova le Tusi Paia ma lana faalapotopotoga e faasaʻo ma faatonutonu ai i tatou i aso nei. (2 Timo. 3:16, 17) E tatau ona tatou fiafia e talia so o se aʻoaʻiga po o se fautuaga tatou te mauaina. Ia usiusitaʻi pea i faatonuga a Ieova, e tusa po o le ā le umi talu ona tatou papatiso po o le tele foʻi o faaeaga i le faapotopotoga. O le faia faapea, e avea ai i tatou ma ituaiga o tagata e finagalo malie i ai o ia.

15, 16. (i) O ā faalogona e oo i se tasi pe a aveesea ona faaeaga? Aumai se faataʻitaʻiga. (ii) O le ā e fesoasoani i o tatou lagona māsiasi pe a aumaia ni aʻoaʻiga?

 ¹⁵ E tatou te maua faasaʻoga mai iā Ieova e ala mai i aʻoaʻiga. O nisi taimi e tatou te manaʻomia aʻoaʻiga malolosi pe a faia se mea sesē, ma e ono aveesea ai o tatou faaeaga. Seʻi mafaufau i le faaaʻoaʻoga a Dennis. * Sa aʻoaʻia o ia ona o sana filifiliga sesē i se mataupu faapisinisi. O ā ni ona faalogona ina ua faasilasila ua lē toe avea o ia ma toeaina? Na ia lagona le lē taulau. Na ia faapea mai: “E tele faaeaga sa ou galue ai i le 30 tausaga ua mavae. Sa ou paeonia sauatoa, galue i le Peteli, auauna o le faiva, ma avea o se toeaina. Ua faatoʻā māeʻa foʻi laʻu lauga muamua i se tauaofiaga itumalo. Peitaʻi, ua leai se mea o totoe.” Sa oo iā te ia le māsiasi ma faalogona lē taulau.

¹⁶ Sa tatau ona fai e Dennis se suiga. O le ā na fesoasoani i ona lagona māsiasi? Sa ia maumauaʻi e suʻesuʻe le Tusi Paia, ma auai e lē aunoa i le talaʻiga ma sauniga uma. Na ia talisapaia faalaeiauga a uso ma tuafāfine faapea a tatou lomiga. Na ia faapea mai: ʻO le mataupu ʻPe na Iai Sou Faaeaga? Pe e Mafai Ona E Toe Aapa Atu?’ o loo i le Olomatamata o Aokuso 15, 2009, na tali ai aʻu tatalo.’ Na ia aʻoaʻoina mai i lenā mataupu, e tatau ona faaaogā le taimi e faamalosia ai lana faiā ma Ieova. Na ia maua aogā mai i na faasaʻoga, ma ina ua mavae ni nai tausaga, ua avea nei o ia ma auauna o le faiva.

17. E faapefea ona fesoasoani le faateʻaina i le tagata faimea sesē? Aumai se faaaʻoaʻoga.

¹⁷ O le faateʻaina, o se tasi o auala e aumaia ai e Ieova aʻoaʻiga. E puipuia ai le faapotopotoga mai i aafiaga leaga, ma mafai ona fesoasoani ai i le tagata faimea sesē e faaalia le salamō. (1 Kori. 5:6, 7, 11) Sa faateʻaina Ropeti mo le toetoe 16 tausaga. I lenā taimi atoa, sa mulimuli lona aiga i le taʻiala a le Tusi Paia e ʻalofia le faifaimea ma ia, e oo lava i se faamālō. Ua toe faaaʻe nei o ia, ma ua agaʻigaʻi i luma faaleagaga. O se tasi o māfuaaga na ia toe foʻi ai i le upu moni, ona e leʻi mananaʻo lona aiga e faifaimea faatasi ma ia. Na ia matuā misia lona aiga, ona e oo lava i sina taimi itiiti, sa lē mafai ona latou faaalu faatasi ma ia. O se tasi lea o vala na uunaʻia ai o ia e toe foʻi mai iā Ieova.

18. O le ā le auala e tatou te tali atu ai pe a faasaʻo ma faatonutonu i tatou e Ieova?

¹⁸ Atonu e tatou te lē manaʻomia na ituaiga o aʻoaʻiga. Peitaʻi, e tatau ona tatou mafaufau po o le ā le auala e tatou te tali atu ai pe a faasaʻo ma faatonutonu i tatou e Ieova. Po o le a tatou talia fautuaga e pei o Tavita? Po o le a tatou faataʻitaʻi iā Saulo? O Ieova le Fai Ipu Omea Sili, o lo tatou Tamā. Ia aua neʻi galo “e aʻoaʻia e Ieova o lē e alofa i ai, e pei foʻi ona faia e le tamā i lona atalii o lē ua ia alofa i ai.” O lea, ia talia pea aʻoaʻiga mai iā Ieova.​—Faata. 3:11, 12.