Fausiaina o Maota mo Sauniga e Viia ai Ieova

“Oka se manaia o le maota. Ou te leʻi manatu o le a iai se maota matagofie faapenei e matou te faatasitasi ai mo le tapuaʻiga iā Ieova. E lē mafai e tupe ona faatauina le olioli lea ua ou lagonaina!”—MARIA, i MEKISIKŌ.

E FIAFIA Molimau a Ieova e faatasitasi mo le aʻoaʻoina o le Afioga a le Atua, le Tusi Paia. (Salamo 27:4; Eperu 10:23-25) O se fiafiaga atili mo i latou le mafai ona faatasitasi i nofoaga e faamamaluina ai mo le tapuaʻiga. I tausaga ua mavae e faitau afe nofoaga fou mo tapuaʻiga ua fausia i le tele o atunuu i le lalolagi aoao, lea e taʻua o Maota mo Sauniga.

O le ā le māfuaaga ua fausia ai nei maota? O fea e ō mai ai le ʻaufaigaluega? O le ā le aafiaga o lenei galuega i tagata o loo faia? Ina ia taliina nei fesili, seʻi o tatou iloiloina le mea o loo tupu i Mekisikō ma Belize.

E Faitau Afe Maota mo Sauniga o Loo Manaʻomia!

I tausaga ua mavae, na faatasitasi Molimau a Ieova i Mekisikō mo tapuaʻiga i so o se nofoaga e avanoa, i tuāfale, fale o aiga Molimau, fale e teu ai oloa, fale taavale, po o se maota e totogi. Ua masani ona mafaufau nei Molimau faamaoni i taimi faapea, maʻimau e pe ana iai lava so latou Maota mo Sauniga.

E 388,000 le aofaʻi o Molimau a Ieova i Mekisikō i le 1994. Na faaalia mai i se suʻesuʻega na faia i lenā tausaga, ina ia mafai ona auai uma atu i se maota mo tapuaʻiga, e 3,300 Maota mo Sauniga e manaʻomia ona fausiaina. O se galuega inā telē tele!

Pe afai e mafai, e amata ona fausia e faapotopotoga a latou lava Maota mo Sauniga. A o faagasolo le isi lima tausaga, e foliga mai ina ia gafatia le manaʻoga mo Maota o Sauniga, e lē gata ua tatau ona fausia nisi maota, ae ao foʻi ona faatopetope le fausiaina. E faapefea ona faataunuu lea manaʻoga?

Tagata Talenia e Galulue Tauofo

I le 1999 na amata ai se polokalame mo le fausiaina o maota. Na amata fai ni Vaega Faufale mo Maota mo Sauniga i vaega eseese o Mekisikō. Na tauofo Molimau a Ieova o ē e iai lenei tomai mai vaipanoa eseese o le atunuu, e faia sa latou vaega i lenei polokalame mataʻina. I le taimi nei, e 35 vaega faapena o loo iai i Mekisikō, ma e tasi le vaega faapena ua amata i Belize.

O nei Vaega mo le Fausiaina o Maota mo Sauniga e masani ona faia aʻe i le pe ā ma le toʻavalu ē e tauofo, o tane ma tamaʻitaʻi, o ē galulue faataimi atoa e aunoa ma se totogi. E femalagaaʻi solo i le atunuu nei tagata tauofo  e taulamua i nei faugāfale. E valu itula e galulue ai nei tagata tauofo mai le aso Gafua seʻia oo i le aso Faraile, aemaise foʻi nisi o aso Toonai. E amata le aso i le 7 i le taeao i le talanoaina o le mau o le aso, ona sosoo ai lea ma le meaʻai o le taeao. E naunau tagata taʻitasi e fai so o se galuega e tuuina atu. O se faaaʻoaʻoga, e fesoasoani nisi tamaʻitaʻi i tane i le faatinoina o isi galuega e pei o le faalamolemoleina o puipui, folaina o le fola, ma le valiina o le fale.

E fesoasoani faapotopotoga i na vaipanoa e ala i le gafa iā i latou o le ʻaufaigaluega, le tāina o lavalava, ma le saunia o meataumafa mo nei tagata tauofo femalagaaʻi. E lē gata i le galulue faatasi i le fausiaina o le maota, ae felagolagomaʻi nei tagata tauofo ma le faapotopotoga i sauniga faa-Kerisiano ma le galuega talaʻi.

Faamanuiaga o le Avea ma Sē e Tauofo

O ā lagona a nei tagata tauofo i le galuega o loo latou faia? Na faapea mai Tanielu o lē sa galue tauofo mo le silia ma le tolu tausaga, “E moni matou te galulue i le vevela ma le mālūlū, aai i meaʻai e lē masani iai, femalagaaʻi solo, taumamao mai aiga, ma e lē o maua mea faaonapōnei ua matou masani ai.” Ae na ia toe faapea mai, “O nei faigatā e lē mafaatusalia i faamanuiaga matou te mauaina.”

O ā nisi o nei faamanuiaga? O le toʻatele o i latou e tauofo latou te aʻoaʻoina se tomai fou i faugāfale. Ae na faapea mai Kolosi o sē e tauofo ma vaaia se tasi o na vaega telē, e tusa o le mea na te lagona e sili ona tāua. “Ua pei i matou o se aiga e 20 ona sui. Matou te aai faatasi, galulue faatasi, suʻesuʻe faatasi, ma tatalo faatasi. Ua matou faia ni faigāuō e sili ona māfana.”

E avea foʻi le faapotopotoga na latou fesoasoani i ai ma uō māfana a vaega mo faugāfale. Na faapea mai Iose o lē na auai i le silia ma le 100 galuega: “O se mea e faagaeeina ai le faaalia o le talisapaia e ala i loimata ma foliga fiafia, pe a vaaia e Molimau o na vaipanoa ua tino mai o latou moomooga i le mauaina o se maota fou mo sauniga. E matou te olioli i le iloaina ua malosi le faatuatua o isi ona o la matou vaega itiiti i le fausiaina o nei maota mo le tapuaʻiga moni.”

Mataʻina Mea ua Faataunuuina!

E lē soona sasalu naʻuā nei maota mo tapuaʻiga pe faalialiavale foʻi. Nai lo lea, na fuafuaina Maota mo Sauniga ina ia faigofie ma vave le fausiaina, toe taugofie foʻi lona tau. E masani ona faaaogā le tomai ma mea faufale mai lenā vaipanoa pe a talafeagai. O le faia faapea, e mafai ai ona fausia se maota i totonu o le ono vaiaso!

I le 2007, na tofu uma faapotopotoga i Belize ma Maota mo Sauniga, ma e 17 le aofaʻi. E 1,400 maota ua fausia i Mekisikō talu mai le 1999.

 E ui e tele galuega lelei ua faataunuuina, ae o loo tele pea faugāfale e manaʻomia ona fai. (Mataio 9:37) Ua silia nei ma le 600,000 le aofaʻi o Molimau a Ieova i Mekisikō, ma e faatolu i le vaiaso ona faatasitasi ina ia aʻoaʻoina i latou i le Afioga a le Atua. O lea la, pe ā ma le 2,000 maota fou o loo manaʻomia. Pe ana faalagolago lenei galuega tauofo i na o taumafaiga a tagata, e mautinoa e lē ausiaina sini na faatūina. Ae e pei ona faaalia mai i le taunuuga o nei mea uma, a iai le lagolagosua a Ieova, ‘e mafai mea uma.’—Mataio 19:26.

[Pusa/Ata i le itulau 22]

“E Latou te Faia Mea na Latou Fai Mai Ai”

E lē na o tagata o faapotopotoga i vaipanoa ia e fausia ai Maota o Sauniga, e aafia i nei galuega. O se faaaʻoaʻoga, a o fausia se Maota o Sauniga i Belize, na faapea atu se tamāloa i lana avā lea e lotu i le Penetekoso, o le taimi lava e māeʻa ai le “falesā” a Molimau a Ieova, o le taimi foʻi lenā ou te auai ai i a latou sauniga. O le ā le māfuaaga o lenā faanaunauga? Na ia faapea mai: “Ou te iloa o loo faatasi le Atua ma i latou. E lē femisaaʻi pe a galulue faatasi, ma e latou te faia mea na latou fai mai ai.”

[Ata]

Maota mo Sauniga i Orange Walk, Belize

[Pusa/Ata i le itulau 23]

Se Galuega i le Lalolagi Aoao

Ua faavaeina ni Vaega mo le Fausiaina o Maota o Sauniga i atunuu e 120. O nisi nei o atunuu e ō mai ai i latou o ē fiafia e faaaogā lo latou taimi ma le malosi i lenei galuega:

Aitiope, Angola, Iamaika, Initia, Ukraine, Fiti, Ghana, Laiperia, Molodova, Nigeria, Papua Niu Kini, Polivia, Tuvalu, Venezuela, Croatia, Dominican Republic, Hong Kong, Kazakhstan, Rwanda, Zambia.

[Ata]

Maota mo Sauniga i Tlaxcala, Mekisikō

Maota mo Sauniga i Acapulco, Mekisikō

[Ata i le itulau 23]

Sui o se Vaega mo le Fausiaina o Maota mo Sauniga i Mekisikō