Ua Fesili Mai le ʻAufaitau

O Fea o le a Tau ai le Taua o Amaketo?

E lē tauina le taua o Amaketo i se nofoaga e tasi. Nai lo lea, o le a avea le lalolagi aoao ma nofoaga e fai ai le taua. Aiseā? Auā e matuā toʻatele lava tagata i itu fetauaʻi e lua ma e lē mafai ona ofi i se nofoaga e tasi.

O loo taʻua foʻi Amaketo o le “taua o le aso tele o le Atua o Lē e ona le malosi uma lava.” O le a faaaogā e Ieova le Atua lona Alo, o Keriso Iesu, e faamaopoopo se ʻautau o agelu e faasaga i ʻau tuufaatasi a taʻitaʻi amioleaga o le lalolagi.—Faaaliga 16:14; 19:11-16.

E foliga mai o loo uunaʻia e Satani nei atunuu ina ʻau atu iā te ia. O loo taʻua i le Tusi Paia ‘⁠faamatalaga mai i temoni’ ma ua oo atu “i tupu o le lalolagi uma, e faapotopoto i latou . . . i le mea ua igoa i le upu Eperu o Amaketo.”—Faaaliga 16:14-16.

E ese mai i isi tusi o le Tusi Paia, ua faapogaia e le tusi o Faaaliga le toʻatele o le ʻaufaitau o le Tusi Paia, e faaata le uiga o nei mea i o latou mafaufau. E toʻatele tagata e manatu e faaletino le uiga o le Faaaliga, ma ua latou manatu o le mea moni lenā o le a tupu, ma faasino atu i le nofoaga tonu lea latou te talitonu e amata ai le taua, ma ua latou tulimataʻia ma le popole mea o loo tutupu i lenā vaipanoa. O le manatu faapea o loo faasino atu Amaketo i se nofoaga patino, o loo maua i le uluaʻi tusi o loo faamatalaina ai i le gagana Eleni le tusi o Faaaliga, lea na tusia i le senituri lona ono T.A. e Oecumenius.

I le faaleo mai o se manatu taatele i faifeʻau mapolotu, na faapea mai John F. Walvoord, o lē na avea muamua ma peresitene o le Dallas Theological Seminary, o Amaketo o le “taua mulimuli lea e leai se tasi e sao mai ai, o toe taumafaiga ia a le lalolagi o le a faaogatotonu i Sasaʻe Tutotonu.” Na faailoa mai e Walvoord le nofoaga o lenei taua i le lumanaʻi, “‘o le Mauga o Mekito,’ o se mauga laʻitiiti i le itu i mātū o Palesitina i le taufaasiʻusiʻuga o se vanu vaiti.”

Peitaʻi, e lē o taumafai le tusi o Faaaliga e faailoa mai se nofoaga e taʻua o Amaketo. O loo taʻua i upu amata o le faapea o loo tuuina atu “ia faailoga.” (Faaaliga 1:1) Ua leva ona taʻua e Molimau a Ieova i a latou lomiga o le Studies in the Scriptures, Tusi e IV: “Tatou te lē faatalitalia le faamaopoopoina moni o tagata i Maupuʻepuʻe o Mekito.”

O loo faasino atu mea na tutupu i le talafaasolopito o Mekito i se tulaga, o le a lē mafai ona sao mai ai fili o le Atua. O lea la, pe a oo iā Amaketo, o le a faamautinoa e le Atua le aveesea aʻiaʻi o faiga faapiʻopiʻo ma le amioleaga, e tusa lava po o fea o le lalolagi o loo tupu ai.—Faaaliga 21:8.

E lē tatau ona fefefe iā Amaketo i latou o ē alolofa iā Ieova le Atua ma lona Alo, o Iesu Keriso. O le a taulaʻi atu le taua a le Atua iā i latou ua ia faamasinoina e matuā fiafia i le amioleaga. E maʻoti i latou o le a faaumatia i lana taua. O loo faapea mai le Tusi Paia, “E silafia e Ieova le auala e laveaʻi ai tagata e faamaoni iā te ia.” (2 Peteru 2:9) E faamāfanafanaloto le folafolaga i le Salamo 37:34 lea e faapea mai: “Ia e faatalitali iā Ieova, ma e tausi i lona ala; ona faaeaina lea o oe e ia ina ia fai mou le nuu; e te iloa atu le fanoga o ē amio leaga.”