E Valaaulia ma le Māfana Oe

ATONU na e ui ane i luma o se Maota mo Sauniga o Molimau a Ieova i lo outou nuu ma e taumānatu, po o ā a latou mea o fai i inā. Pe na e silafia o loo tatala le avanoa mo so o se tagata e auai ai i a latou sauniga i vaiaso taʻitasi? E talia ma le fiafia tagata e asiasi mai.

Peitaʻi, atonu o loo i ai ni au fesili o loo e fia malamalama ai. Aiseā e faapotopoto ai Molimau a Ieova? O ā mea o loo fai i na sauniga? Ae o ā tala na fai e tagata asiasi e lē o ni Molimau a Ieova e faatatau i na sauniga?

‘Ia Faapotopoto le Nuu’

Talu mai lava anamuā, sa faapotopoto faatasi ai tagata ina ia tapuaʻi i le Atua ma aʻoaʻoina mea e faatatau iā te ia. I le toetoe lava 3,500 tausaga ua mavae, na faatonuina ai tagata Isaraelu: “Ia e faapotopotoina le nuu, o tane, ma fafine, ma tama iti, atoa ma le tagata ese e iā te oe i au aai, ina ia latou faalogologo ai, ma ia aʻoaʻoina i latou, ma ia latou matataʻu iā Ieova lo outou Atua, ma latou anaana e fai o upu uma lava o lenei tulafono.” (Teuteronome 31:12) O lea la, i Isaraelu, sa aʻoaʻoina tamaiti ma tagata matutua ina ia tapuaʻi ma usiusitai i le Atua.

I senituri mulimuli ane, ina ua faavaeina le faapotopotoga Kerisiano, sa faaauau pea ona avea sauniga ma se vaega tāua o le tapuaʻiga moni. Na tusi le aposetolo o Paulo: “Ia manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina lo tatou faapotopoto faatasi e pei o le masani a isi, a ia fefaalaeiauaʻi, ia sili foʻi ona faia faapea aemaise ua outou iloa ua matuā latalata mai le aso.” (Eperu 10:24, 25) E pei lava ona faamalosia le mafutaga o se aiga pe a faaalu le taimi e faatasitasi ai, e faapena foʻi ona faamalosia le alofa o i latou e mananaʻo e auauna i le Atua, pe a latou faapotopoto faatasi mo le tapuaʻiga.

I le ōgatusa ma nei mau faale-Tusi Paia, o loo faapotopoto faatasi Molimau a Ieova i o latou Maota mo Sauniga, e faalua i le vaiaso. E fesoasoani nei sauniga i ē auai ina ia talisapaia, malamalama, ma faatatauina mataupu silisili o le Tusi Paia. Pe a talafeagai, e tutusa lava polokalame o loo faia i le lalolagi aoao, ma e tofu lava le sauniga ma lona aogā faaleagaga. A o leʻi amataina ma pe a māeʻa foʻi le sauniga, e fiafia i latou o loo auai e “fefaalaeiauaʻi” le tasi i le isi e ala i talanoaga e atiaʻe ai. (Roma 1:12) O ā mea o loo fai i na sauniga?

Lauga Faale-Tusi Paia

O le sauniga muamua lava e auai ai le toʻatele, o se lauga faale-Tusi Paia e faia mo le lautele, lea e masani ona faia i faaiʻuga o vaiaso. Sa masani ona faia e Iesu lauga i le lautele—o se tasi o na lauga, o lana Lauga taʻutaʻua i luga o le Mauga. (Mataio 5:1; 7:28, 29) Na lauga atu foʻi Paulo i tagata Atenai. (Galuega 17:22-34) I le mulimuli i le mea na faia e Iesu ma Paulo, o loo faamatilatilaina ai e sauniga a Molimau a Ieova, se lauga ua faia faapitoa mo tagata lautele, ma o nisi o i latou atonu o le taimi muamua lea ua auai ai i se sauniga.

E amata le sauniga i se pese mai le tusi, Pese Atu Viiga iā Ieova. * O ē uma e mananaʻo e tutū ma usuina faatasi le pese, e mafai lava ona latou faia. Pe a māeʻa se tatalo puupuu, ona tauaaoina lea e se failauga agavaa se lauga e 30 minute le umi. (Tagaʻi i le pusa “O Lauga Aogā mo le Lautele”) E faavae lana lauga atoa mai le Tusi Paia. E masani ona valaaulia e le failauga ē o loo auai ina ia suʻe mau o le Tusi Paia, ma mulimuli atu a o faitauina. O lea la, atonu e tāua tele le aumai o lau lava kopi o le Tusi Paia, po o lou talosaga atu foʻi i Molimau a Ieova mo sau kopi o le Tusi Paia a o leʻi amata le sauniga.

 Suʻesuʻega o le Olomatamata

I le tele o faapotopotoga o Molimau a Ieova, pe a uma le lauga i le lautele ona sosoo lea ma le Suʻesuʻega o le Olomatamata, o se talanoaga i se mataupu mai le Tusi Paia e faafesili ma tali. E faalaeiauina e le sauniga lenei i latou o loo auai e mulimuli i le faaaʻoaʻoga a tagata Perea i aso o Paulo, lea na “latou taliaina le upu ma le fiafia tele, ua latou matuā iloiloina Tusitusiga Paia.”—Galuega 17:11.

E amata le Suʻesuʻega o le Olomatamata i le pese. O loo maua i le lomiga mo suʻesuʻega o le mekasini lenei, ia manatu na talanoaina ma fesili na fesiligia e lē o loo tauaaoina. E mafai ona maua sau kopi o le lomiga mo suʻesuʻega mai i se tasi o Molimau a Ieova. O mataupu nei sa talanoaina talu ai nei: “Mātua—Ia Aʻoaʻo la Oulua Fanau i le Alofa,” “Aua le Taui Atu le Leaga i le Leaga,” ma “Le Māfuaaga ua Toeitiiti ai Mou Atu Puapuaga.” E ui lava o le sauniga lenei e faafesili ma tali, ae lē faamalosia le aofia e tali mai, ma e masani ona tali i latou sa faitau ma manatunatu i le mataupu ma faaaogā mau faale-Tusi Paia e lagolago ai, a o leʻi ō mai i le sauniga. E faaiʻuina le sauniga i se pese ma le tatalo.—Mataio 26:30; Efeso 5:19.

Suʻesuʻega Faale-Tusi Paia a le Faapotopotoga

E tasi le afiafi i vaiaso taʻitasi, e toe faapotopoto ai Molimau i le Maota mo Sauniga mo se polokalame e tolu ona vaega, lea e 1 le itula ma le 45 minute le umi. O le vaega muamua o le Suʻesuʻega Faale-Tusi Paia a le Faapotopotoga, lea e 25 minute le umi. E fesoasoani lenei vaega i ē o loo auai ia faamasani i a latou Tusi Paia, ia fetuunaʻi ai o latou mafaufau ma uiga, ma agavaa atili ai o ni soo o Keriso. (2 Timoteo 3:16, 17) E pei le faiga o lenei sauniga o le faiga o le Suʻesuʻega o le Olomatamata, o se  talanoaga i se mataupu o le Tusi Paia e faafesili ma tali. O i latou e fai tali, ia fai ma le loto i ai. E masani ona faaaogā se tusi po o se polosiua ua lomia e Molimau a Ieova, e fai ai le suʻesuʻega faale-Tusi Paia.

Aiseā e faaaogā ai lomiga faale-Tusi Paia i le sauniga? I tuā i aso o le Tusi Paia, e lē lava le tau ina faitau o le Tusi Paia. “Ua latou folafola atu le uiga, ma faamatalaina atu iā te i latou le mea ua faitauina.” (Neemia 8:8) I tausaga e leʻi leva atu, sa fesoasoani ai lomiga e talanoaina ai tusi o Isaia, Tanielu, ma le Faaaliga i ē na auai i lenei sauniga ina ia malamalama i vaega na o le Tusi Paia.

Aʻoga o le Faiva Faatiokarate

Pe a uma le Suʻesuʻega Faale-Tusi Paia a le Faapotopotoga, ona sosoo lea ma le Aʻoga o le Faiva Faatiokarate. Ua fuafuaina le sauniga lenei e 30 minute le umi, e fesoasoani ai i Kerisiano e atiaʻe le “tomai e aʻoaʻo atu.” (2 Timoteo 4:2) O se faaaʻoaʻoga, pe na iai se taimi na fesili atu ai lau tama po o lau uō i se mataupu e faatatau i le Atua po o le Tusi Paia, ma ua faigatā ona e avatu se tali talafeagai? E mafai e le Aʻoga o le Faiva Faatiokarate ona aʻoaʻoina oe, i le auala e avatu ai ni tali faalaeiau ma faale-Tusi Paia i fesili faigatā. O lea la, e mafai ona tatou fai atu e pei o le perofeta o Isaia, o lē na faapea mai: “Ua foaʻi mai iā te aʻu e le Alii o Ieova le laulaufaiva o ē ua aʻoaʻoina, ina ia ou iloa ona faamāfanafana i se upu lē ua tigāina.”—Isaia 50:4.

E amataina le Aʻoga o le Faiva Faatiokarate i se lauga e faavae mai se vaega o le Tusi Paia, lea na faalaeiauina ē o loo auai ina ia faitau i ai i le vaiaso muamua atu. Pe a uma le lauga, ona valaaulia loa lea e le failauga le aofia e fai mai ni o latou tali pupuu e uiga i manatu na latou faitau i ai i le Tusi Paia, lea sa aogā iā i latou. Pe a uma lea talanoaga, ona sosoo lea ma lauga a le ʻauaʻoʻoga ua tofia e faia ni a latou vaega i le aʻoga.

Ua tofia le ʻauaʻoʻoga e faitauina se vaega o le Tusi Paia mai i luga o le pulelaa, pe faataʻitaʻi foʻi le auala e aʻoaʻoina ai se tasi i se mataupu faale-Tusi Paia. Pe a māeʻa lauga taʻitasi, e mafai e se uso agavaa ma e iai le poto masani ona faamālō atu i le tagata aʻoga mo se mea  lelei na latou faia i a latou lauga, ma e faavae mai ona manatu i le tusi Mauaina o Aogā Mai le Aʻoga o le Faiva Faatiokarate. Ae pe a māeʻa le sauniga, atonu e mafai ona ia avatu se fautuaga tau lava o le tagata aʻoga i le auala e faaleleia ai lana lauga.

O lenei vaega o le polokalame, ua fuafuaina e fesoasoani e lē gata i le ʻauaʻoʻoga ae faapea foʻi i latou o loo auai o ē mananaʻo e faaleleia la latou faitau, tautala, ma le auala e aʻoaʻo ai. Pe a uma le Aʻoga o le Faiva Faatiokarate, e usuina se pese e faavae mai i se mau o le Tusi Paia e amata ai le Sauniga o le Auaunaga.

Sauniga o le Auaunaga

O le vaega mulimuli o le polokalame, o le Sauniga o le Auaunaga. E ala mai i lauga, faataʻitaʻiga, faatalanoaga, ma le sao a le aofia, o le a aʻoaʻoina ai i latou o loo auai ina ia taulau i le aʻoaʻo atu o upu moni o le Tusi Paia. A o leʻi aauina atu e Iesu ona soo e talaʻi, na ia faapotopotoina i latou ma aʻoaʻo atu mea e ao ona fai. (Luka 10:1-16) Ina ua sauniuni atoatoa i latou mo le galuega faaevagelia, na latou olioli i mea mataʻina na tutupu. Mulimuli ane, na taʻu atu e soo o Iesu iā te ia mea na tutupu. (Luka 10:17) Sa masani ona faasoa atu e le ʻauaposetolo mea na tutupu i isi.—Galuega 4:23; 15:4.

O loo iai i se nusipepa faalemasina e taʻua o La Tatou Faiva o le Malo, le faasologa o le polokalame e 35 minute mo le Sauniga o le Auaunaga. O mataupu nei ua uma ona talanoaina: “Tapuaʻi iā Ieova o se Aiga,” “Le Māfuaaga Tatou te Faaauau ai Pea Ona Toe Foʻi Atu,” ma le “Ia Faaaʻoaʻo iā Iesu i Lau Faiva.” E faaiʻuina le polokalame i se pese, ma e faia e se tasi o le faapotopotoga ua uma ona tofia le tatalo faaiʻu.

O Tala na Fai e Tagata Asiasi Mai

E taumafai le faapotopotoga e talia ma le fiafia i latou e auai mai. Mo se faataʻitaʻiga, na faalogo Aneterea i tala lē lelei e uiga i Molimau a Ieova. Ae ina ua ia auai atu i le sauniga mo le taimi muamua, sa ia maofa i le talileleia o ia. Na faapea mai Aneterea, “O se nofoaga matuā manaia lava. Sa ou maofa i le māfana mai o tagata ma lo latou fiafia mai iā te aʻu.” O le tala foʻi lenā a Asera, o se talavou mai Kanata: “E ese le manaia o le sauniga! E faigofie ona uaʻi atu i ai.”

O Iose, o lē e nofo i Pasili, o ia o se tagata e lauiloa i lona nuu i ona uiga faamisa. Peitaʻi, sa valaauliaina o ia e auai atu i se sauniga i le Maota mo Sauniga i lona nuu. Na ia faapea mai: “Na talia ma le fiafia mai aʻu e i latou sa i le Maota mo Sauniga, e ui lava na latou malamalama lelei i loʻu talaaga.” Na taʻua e Atsushi, o lē nofo i Iapani e faapea: “O le mea moni lava, sa ou lagona le tau matamuli ina ua ou auai i le sauniga a Molimau a Ieova mo le taimi muamua. Ae na ou iloa mulimuli ane, e tutusa lava i latou ma isi tagata. Na latou taumafai malolosi e faafeiloaʻi aʻu i se auala māfana.”

E Talia ma le Fiafia Oe

E pei ona taʻua i manatu o loo i luga, e mafai ona avea le auai i sauniga i le Maota mo Sauniga o se mea e olioli ai. O le a e aʻoaʻoina ai mea e uiga i le Atua, ma e ala mai i faatonuga faale-Tusi Paia o le a e maua i inā, o le a aʻoaʻoina ai oe e Ieova le Atua “i mea e aogā.”—Isaia 48:17.

E lē totogia sauniga a Molimau a Ieova, ma e lē aoina ai foʻi ni peleti. Pe e te fia auai i se sauniga i le Maota mo Sauniga o loo i lou vaipanoa? E matuā valaaulia ma le māfana oe e faia faapea.

[Faaopoopoga i lalo]

[Pusa i le itulau 21]

O Lauga e Aogā mo le Lautele

O lauga faale-Tusi Paia, e filifilia mai i matua eseese e sili atu i le 170, e aofia ai ma matua nei:

▪ Pe Afāina le Mea o E Talitonu i ai i le Amataga o le Tagata?

▪ Le Silafaga a le Atua i Faaipoipoga ma Feusuaʻiga

▪ Le Faaleagaina o le Lalolagi ua Aumai ai le Tauimasui a le Atua

▪ Faafetaiaʻia Popolega o le Olaga

▪ Pe na Pau ea Lenei o le Olaga?

[Ata i le itulau 21]

Lauga faale-Tusi Paia

[Ata i le itulau 21]

Suʻesuʻega o le “Olomatamata”

[Ata i le itulau 22]

Suʻesuʻega Faale-Tusi Paia a le Faapotopotoga

[Ata i le itulau 22]

Aʻoga o le Faiva Faatiokarate

[Ata i le itulau 23]

Sauniga o le Auaunaga