Talaʻia o le “Tala Lelei” i Motu Mamao i Mātū o Ausetalia

NA FETALAI Iesu: “O le a talaʻiina atu lenei tala lelei o le malo i le lalolagi atoa.” (Mataio 24:14) E usitaʻia e Molimau a Ieova le faatonuga a Iesu ma taumafai e faaoo atu le feʻau o le Tusi Paia i tagata, po o fea lava e nonofo ai. (Mataio 28:19, 20) O lenei galuega e faia i le lotomalie ma i nisi taimi e iai lagona faalētonu, ma e faaaogā ai tupe a le tagata lava ia.

O se faaaʻoaʻoga, na toe fetuutuunaʻi e Nathan ma Carly o la olaga ina ia mafai ona la talaʻi atu i tagata i motu maotua o le Torres Strait. I le 2003, na valaaulia ai i laʻua e se sui o le ofisa o le lālā o Molimau a Ieova i Ausetalia, e siitia atu i Thursday Island e galulue faatasi ma le faapotopotoga o loo iai. O le motu lea o se tasi o motu matagofie o le Pasefika i le va o Ausetalia ma Niu Kini.

I le 2007, na faatau ai e le aiga se vaa tuai e taʻu o le Teisan-Y, lea na faaaogā mo le fagotaina o penina. Na latou faafou le vaa i a latou lava tupe, ma amata ai a latou malaga e talaʻi i motu mamao e 10 na ʻainā, ae na faamautū i Thursday Island. O nisi nei o faamaumauga o a latou faigāmalaga.

Ianuari 2008: O le asō, sa ou malaga i se tamaʻi vaa i Bamaga, e 50 maila (80 kilomita) le alu ma le sau, e piki mai nisi o Molimau e toʻa ono. O lea ua matou i le Teisan-Y, ma malaga atu i motu o Warraber ma Poruma. Ua tutumu tane suāuu—e 1,450 kalone (5,500 lita), e $8.00 i le kalone. E alu lemū le vaa, pe ā ma le ono maila (10 kilomita) i le itula. E lagi lelei le tau, ma malū le sami.

Ina ua matou taunuu, na taula le vaa i tai, ae matou ō i le tamaʻi vaa ma nisi o le ʻaumalaga e iai o latou aiga i Warraber, ma feiloaʻi atu i le pulenuu o le motu ina ia maua ai se faatagaga e talaʻi. O ia o se faifeʻau o se lotu i inā, ma na faataga i matou e talanoa i tagata o le motu. O le mea lava lenā e tasi na matou faia i Poruma, ma na matou maua le faatagaga e talaʻi. E foliga fiafia tagata o le motu, ma na fiafia e faitau i a matou lomiga. Na matou amataina le tele o suʻesuʻega faale-Tusi Paia.

Aperila 2008: Na matou fuafua se faigāmalaga i Dauan, Saibai, ma Boigu, o motu e tolu e pito sili ona mamao, e latalata i le tuaoi ma Papua Niu Kini. Ona na matuā leaga le tau, na matou malaga atu ai i le motu o Mabuiag. E na o le 43 maila (70 kilomita) le mamao o Mabuiag mai i le mea na matou faamautū ai, a o lea o le a fepiʻopiʻoaʻi le malaga mo le 86 maila (140 kilomita), ona o le tele o āʻau.

Na tafea ese le tamaʻi vaa mai le Teisan-Y ona o se galu telē. E ui i le tetelē o galu, ae na  toe liliu le matou vaa ina ia toe sefe mai le tamaʻi vaa. O le toʻatele lava o le ʻaumalaga sa maʻi vasa.

Na matou maua le faatagaga e talaʻi ai i le motu o Mabuiag, ma na talia ma le fiafia i matou e tagata, ma galo atu ai tulaga faalētonu na iai. Sa matuā fiafia se tasi o tamaʻitaʻi e faalogo i le matou feʻau ma na ia talia ni lomiga faaopoopo, lea o le a faaali i le faletusi a le motu, i le mea o loo ia faigaluega ai.

Me seʻia oo iā Oketopa 2008: Ona o tulaga o le tau, na lē mafai ai ona matou oo atu i isi motu. Na matou faaaogā le taimi e talaʻi ai i le mea na matou faamautū ai, galulue, ma toe lipea le vaa.

Ona o le tele o mea na manaʻomia ona faalelei o le vaa, na matou malaga atu ai i le uafu i le motu tele o Weipa, ma toso aʻe le vaa ma tuu i luga o se taavale toso telē. E lē o se gaoioiga faigofie! Na tauofo mai Molimau o le faapotopotoga i lenā vaipanoa e fesoasoani i le faia o le galuega, e pei o le palama, o le vali ma le kamuta. Na saunia e isi taumafataga. Ae aumai e isi mea mo la matou malaga e sosoo ai. Na matou matuā talisapaia lo latou talimālō ma le agaga fesoasoani.

Tesema 2008: Ua matou toe folau atu i Dauan, Saibai, ma Boigu. Ina ia lē afātia lo matou vaa, na matou faaaogāina se reitā, ma fepiʻopiʻoaʻi i āʻau i le fesoasoani a se masini e faatautaia folauga. E 12 itulau na matou folau atu ai ona faatoʻā taunuu lea i Dauan, ae o se motu aupito i matagofie lea ua matou vāai i ai. E ufitia i ao ona mauga maualuluga. Na naunau tele tagata o Dauan e faalogo iā i matou, ma na fai a matou fuafuaga e faaauau a matou lesona faale-Tusi Paia e ala i le telefoni ina ua matou toe foʻi.

O se fafine mai le motu e igoa iā Lettie, na ia maua a tatou mekasini ma na ia talosagaina ni lomiga e ala i le faatumu o kuponi. Na lafo atu e le ofisa o le lālā i Ausetalia iā te ia ni lomiga, ma na avatu ai foʻi ma se tusi i le matou faapotopotoga e faafesootaʻi o ia pe a talafeagai ai. Mulimuli ane, na matou maua Lettie ma na matou fiafia e faamalieina lona naunau i mea faaleagaga.

I le motu o Saibai, e leʻi faatagaina i matou e le pulenuu e talaʻi i le motu. Peitaʻi, o nisi o i matou e iai aiga i le motu, na faataga ona asiasi ma talanoa iā i latou. E iai saʻu konekarate ma le malo e faia se galuega o le valiina o ni fale o Saibai, ma ua fesoasoani lenā e totogi ai mea e manaʻomia.

O se tasi o matou tuafafine e igoa iā Tassie mai i se nuu i Papua, lea e pe ā ma le lua ma le ʻafa maila (4 kilomita) mai i Saibai. Ona o se feagaiga ma le malo o Ausetalia, ua mafai ai e tagata mai i Papua ona ō mai i Saibai ma faia fefaatauaʻiga. E feiloaʻi ai Tassie ma le toʻatele o tagata mai i lona nuu, ma e lē lava ana lomiga mo i latou uma. O le taimi muamua lea ua feiloaʻi ai Tassie ma tagata o lona nuu, talu ona avea o ia ma Molimau a Ieova. Na matou toe foʻi i le vaa ma aumai se pusa lomiga, o le tele o nei lomiga e maua i le gagana Pidgin a Papua, lea e taʻu o le Tok Pisin. Ua faailoa atu e  Tassie le feʻau o le Tusi Paia i tagata e sili atu i le 30 mai i Papua, ae ona o le toʻatele o tagata fiafia, na uma lelei ai le pusa o lomiga. O le nuu lea e nonofo ai e na o le vaa e mafai ona oo atu i ai, ma atonu e leʻi asia lava e Molimau a Ieova.

E matuā faigatā lava le oo atu i le motu mulimuli o Boigu. E pe tusa o le lua ma le ʻafa maila (4 kilomita) mai le matafaga lea ua matou iai, ma ua valu futu (2.5 mita) le loloto o le sami. Ua ono futu (1.8 mita) le va o le taʻele o le vaa mai luga o le sami. Na ma ō ma se tasi o le ʻaumalaga i le tamaʻi vaa e suʻe se alāvaa e oo atu ai i le motu. Ua matuā maligi timuga, ma na ma pala uma! E lua itula faatoʻā maua se alāvaa.

Ina ua matou taunuu, na faateʻia i latou ma faapea mai e sesē le masini na faatonutonuina le matou folauga, auā e oo lava i ē e puipuia le gataifale ma fuāvaa e leʻi mafai ona oo atu i le motu. E leʻi faatagaina e le pulenuu i matou e talaʻi, seʻi vaganā ai i latou e iai aiga i le motu, na mafai ona asiasi atu ma talaʻi iā i latou. Na matou faaaloalo i le manaʻo o le pulenuu, ma asiasi atu tau lava o na aiga. Na talia e se tasi o tamāloa le tusi O ā Aʻoaʻoga Moni a le Tusi Paia?, * na faitau ai loa ma amata ona tusi i lalo fesili i tua o lana Tusi Paia. Mulimuli ane, o le tamāloa lava lea e tasi na toe faafesootaʻi ina ua asiasi mai i le Thursday Island.

Ianuari 2009: Ua matou toe foʻi i le motu o Moa ma Mabuiag ina ia toe talanoa iā i latou na faaalia le fiafia i le feʻau o le Tusi Paia. I nei motu uma e lua, na talia fiafia i matou. Ua faapea mai le toʻatele o i latou i le nuu o St. Paul i le motu o Moa, ina ia toe vave ō atu. Ua fai mai le pulenuu po o le ā lava le taimi e matou te fia ō atu ai e talaʻi, e talia ma le fiafia i matou.

E 17 motu ʻainā i Torres Strait. E matou te lē iloa po o le ā le tele e mafai ai ona matou faafesootaʻi tagata uma o loo nonofo ai i inā. Ae o i matou uma lava o loo i le faapotopotoga i inei i motu mamao i mātū o Austelia, e matou te fiafia e fai le mea e gata ai lo matou mafai, e vivii atu ai i Lē silisili na faia mea, o Ieova.

[Faaopoopoga i lalo]

[Faafanua i le itulau 23]

(Tagaʻi i le lomiga mo le ata atoa)

AUSETALIA

Weipa

Bamaga

TORRES STRAIT ISLANDS

PAPUA NIU KINI

[Ē Ana le Ata]

Based on NASA/Visible Earth imagery

[Faafanua i le itulau 24, 25]

Bamaga

Thursday Island

Moa Island

Warraber Island

Poruma Island

Mabuiag Island

Saibai Island

Boigu Island

Dauan Island

PAPUA NIU KINI

[Ē Ana le Ata]

Based on NASA/Visible Earth imagery

[Ata i le itulau 24]

Taunuu i Thursday Island

[Ata i le itulau 24]

Savavali e asiasi atu i tagata i le motu o Saibai

[Ata i le itulau 25]

Talaʻi le tala lelei i le gagana Tok Pisin