Ia Mafuta Atu i le Atua

“Le Faafofoga Tatalo”

1 NOFOAIGA A TUPU 4:9, 10

PE E tali mai Ieova le Atua i tatalo faamaoni a ē e tapuaʻi atu iā te ia? Ua faaalia i le tala i le Tusi Paia e uiga i se tagata e lē lauiloa tele, o Iapesa, e moni lava o Ieova o le “Faafofoga tatalo.” (Salamo 65:2) O lenei tala puupuu ua tusia i se vaega o le Tusi Paia e leʻi mafaufauina e maua ai, auā ua tusia i le ogatotonu o le faasologa o gafa i tusi amata o le Muamua Nofoaiga a Tupu. Seʻi o tatou iloilo le 1 Nofoaiga a Tupu 4:9, 10.

O loo maua i nei fuaiupu e lua, mea e tatou te iloa e uiga iā Iapesa. Ua taʻua i le fuaiupu e 9, “na faaigoa o ia e lona tinā iā Iapesa, ua faapea: ‘Na ou fanaua o ia ma le tigā.’” * Aiseā na ia filifilia ai lenā igoa? Pe na sili atu ona tigā i lo o le tigā e masani ai, ina ua ia fanauina lenei tama? Po ua oti lana tane, ma na faanoanoa ona ua lē iai lana tane e vaai i le la pepe fou? E lē o taʻua i le Tusi Paia. Ae sa iai le aso na matuā mitamita ai lenei tinā i lenei tama. Atonu sa amiotonu uso o Iapesa, ae “sa sili atu ona faamamaluina Iapesa nai lo o ona uso.”

Sa masani ona tatalo Iapesa mai i lona loto. Sa amata lana tatalo i le talosagaina o le faamanuia a le Atua. Ona ia faia lea o ni talosaga se tolu na faaalia ai lona matuā faatuatua.

Muamua, na augani atu Iapesa i le Atua: ‘Ia faalauteleina loʻu laueleele.’ (Fuaiupu e 10) E leʻi mata i fanua lenei tane faamamaluina, pe losilosivale i mea a isi ona uso a tagata. Ina ua ia faia lenei talosaga, atonu sa mafaufau i tagata ae e lē o le laueleele. Atonu sa ia talosaga atu e faalautele lona laueleele i se auala filemu, ina ia mafai ona toʻatele tagata tapuaʻi o le Atua moni e nonofo ai. *

Lona lua, na ōle atu Iapesa ia iā te ia le “aao” o le Atua. Ua faatusaina le aao o le Atua i lona mana, lea e na te faaaogā e fesoasoani ai i ona tagata tapuaʻi. (1 Nofoaiga a Tupu 29:12) Ina ia maua mea na naunau i ai, na tatalo atu Iapesa i le Atua o lē e lē faapuupuuina lona aao i ē e faatuatua iā te ia.—Isaia 59:1.

Lona tolu, na tatalo Iapesa: ‘Ia e laveaʻiina aʻu mai i puapuaga ina ia ou lē tigā ai.’ O le faaupuga “ina ia ou lē tigā ai,” e ono faaalia ai e leʻi tatalo Iapesa ia sao mai i mala, ae ia aua neʻi matuā tigā pe toʻilalo i āuga o mea leaga.

Ua faaalia mai ai i le tatalo a Iapesa lona faatāua o le tapuaʻiga moni, ma lona faatuatua ma faalagolago atu i Lē e faafofoga tatalo. O le ā le tali mai a Ieova? O upu faaiʻu nei o lenei tala puupuu: “Ona faataunuu lea e le Atua o mea na ia talosaga atu ai.”

E lē o suia Lē e faafofoga tatalo. E fiafia o ia i tatalo a tagata tapuaʻi. Ua iloa e i latou o ē e faatuatua ma faalagolago iā te ia: “Po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”—1 Ioane 5:14.

[Faaopoopoga i lalo]