E Mafai E Le Tusi Paia Ona Suia Olaga

O LE ā na uunaʻia ai se tagata taalo i taaloga faitupe ma gaoi ina ia suia ana masaniga ma lona olaga? Ia faitau i lana faamatalaga.

“Na ou matuā fiafia tele i tuuga solofanua.”—RICHARD STEWART

TAUSAGA FANAU: 1965

ATUNUU: JAMAICA

TALAAGA: TAALO I TAALOGA FAITUPE MA FAIA SOLITULAFONO

OLAGA SA IAI: Na ou ola aʻe i le laumua o Jamaica o Kingston, o se vaipanoa mativa ma laʻitiiti ae e toʻatele tagata e nonofo ai. E toʻatele tagata na leai ni galuega ma sa taatele soligatulafono. Na fefefe tagata ona o kegi leaga. E toetoe o aso uma ou te lagona ai le pāpā o fana.

O loʻu tinā o se tagata e galue malosi ma e na te faia mea uma mo aʻu, o loʻu uso ma loʻu tuafafine laʻitiiti. Sa ia faamautinoa ua matou maua aʻoaʻoga lelei. Ou te leʻi fiafia i le aʻoga, ae na ou matuā fiafia tele i tuuga solofanua. E masani ona ou tiaʻi aʻoga ae alu i le malae tutuu, ma sa ou tiʻetiʻe foʻi i solofanua.

E leʻi umi ae ou matuā aafia i petipetiga i tuuga solofanua. Sa ou ola i se olaga lē mamā ma faia feusuaʻiga ma le toʻatele o tamaʻitaʻi. Sa ou ulaina mariuana ma na faalagolago loʻu olaga i mea ou te gaoia mai. E tele aʻu fana na iai, ae o le mea e faafetai ai ona e leai se isi na maliu i le tele o gaoiga na ou iai.

Mulimuli ane, na maua aʻu e leoleo ma tuuina atu i le falepuipui ona o aʻu soligatulafono. Sa ou toe foʻi lava i loʻu olaga sa iai ina ua ou magalo, ae ua sili atu loʻu leaga nai lo o le mea sa iai. E ui lava ou te foliga filemu, ae e ese loʻu loto malosi, itaitagofie, ma sauā. Ou te manatu ifo lava na o aʻu, e aunoa ma loʻu popole i isi tagata.

SUIA E LE TUSI PAIA LOʻU OLAGA: A o faagasolo na tausaga leaga o loʻu olaga, na suʻesuʻe loʻu tinā i le Tusi Paia ma avea ai ma Molimau a Ieova. Sa ou vaaia suiga lelei i ona uiga ma na ou fia iloa pe aiseā. Na ou filifili e suʻe po o le ā le māfuaaga na suia ai uiga o loʻu tinā, o lea na amata ai ona ou suʻesuʻeina le Tusi Paia ma Molimau.

Na ou iloa le ese o aʻoaʻoga a Molimau a Ieova mai i isi lotu, ma e faaaogā e Molimau le Tusi Paia e faamaonia ai mea uma e latou te fai mai ai. E na o i latou lava le vaega ou te iloa e talaʻi mai i lea fale i lea fale, e pei ona sa faia e uluaʻi Kerisiano. (Mataio 28:19; Galuega 20:20) Na ou talitonu ua ou maua le tapuaʻiga moni, ina ua ou vaaia le alofa moni lea e faaalia e le tasi i le isi.—Ioane 13:35.

Ona o mea na ou aʻoaʻoina mai i le Tusi Paia, na ou iloa ai le manaʻomia ona faia o ni suiga tetele i loʻu olaga. Na ou iloa e inosia e Ieova le Atua le faitaaga, ma e tatau ona tuu amioga e faaleagaina ai loʻu tino, pe afai ou te manaʻo e faafiafia o ia. (2 Korinito 7:1; Eperu 13:4) Na faagaeetia aʻu ina ua ou aʻoaʻoina e iai faalogona o Ieova, ma o aʻu gaoioiga e mafai ona  faafiafiaina pe e faatigā ai iā te ia. (Faataoto 27:11) Sa ou filifili e tuu le ulaula mariuana, aveese aʻu fana, ma ou taumafai e faaleleia oʻu uiga. O nisi o suiga sa sili ona faigatā, o le tuua lea o loʻu olaga lē mamā ma taofia le taalo i taaloga faitupe.

I le taimi muamua, ou te leʻi manaʻo e iloa e aʻu uō o loo oʻu suʻesuʻeina le Tusi Paia ma Molimau a Ieova. Ae na iai se suiga mataʻina ina ua ou faitau i le Mataio 10:33, lea o loo faamauina ai fetalaiga nei a Iesu: “O lē e teena aʻu i luma o tagata, ou te teena foʻi o ia i luma o loʻu Tamā o i le lagi.” O na upu na uunaʻia ai aʻu ina ia faailoa atu i aʻu uō, o lea ua ou suʻesuʻeina le Tusi Paia ma Molimau. Na matuā faateʻia i latou. E latou te leʻi talitonu e mafai e se tasi e pei o aʻu ona avea ma Kerisiano. Ae na ou faailoa atu iā i latou, ou te lē manaʻo e toe foʻi i loʻu olaga tuai.

AOGĀ IĀ TE AʻU: Na matuā fiafia loʻu tinā ina ua ia vaaia ua amata ona ou ola e tusa ai ma taʻiala o le Tusi Paia. E lē o toe popole nei o ia ina neʻi oʻu toe faia ni mea leaga. E ma te talatalanoa i le mea e ma te tutusa ai, o lo ma alofa lea mo Ieova. E iai taimi ou te toe mafaufau ai i loʻu olaga tuai, ma ou te lē talitonu i suiga ua mafai ona ou faia ona o le fesoasoani mai a le Atua. Ou te lē o toe naunau i le olaga na ou masani ai, o amioga lē mamā ma le manaʻo tele i meafaitino.

Pe ana ou lē talia le feʻau a le Tusi Paia, semanū e faapenei ua ou oti po o le iai foʻi i le falepuipui. Ua ou maua nei se aiga lelei ma fiafia. Ua ou maua le fiafiaga sili i le auauna iā Ieova le Atua faatasi ai ma se avā e lagolagosua iā te aʻu, ma se afafine e usiusitaʻi. Ou te faafetaia Ieova ona ua ou maua le avanoa e avea ai ma se vaega o se ʻauuso Kerisiano e alolofa. Ou te matuā lotofaafetai i lē na faia taumafaiga e aʻoaʻo aʻu i upu moni o le Tusi Paia. Ou te faatāuaina avanoa ua ou maua e fesoasoani ai i isi ina ia iloa aʻoaʻoga a le Tusi Paia. Ae e sili atu ona ou faafetaia Ieova le Atua mo lona alofa faamaoni, ua ia tosina atu ai aʻu iā te ia.

[Faamatalaga faaopoopo i le itulau 11]

“Ua ou aʻoaʻoina e iai faalogona o Ieova, ma o aʻu gaoioiga e mafai ona faafiafiaina pe e faatigā ai iā te ia”

[Ata i le itulau 11]

O i matou ma laʻu āva ma loʻu afafine

[Ata i le itulau 11]

Na ou vaaia suiga lelei i uiga o loʻu tinā