Olaga i Taimi o le Tusi Paia​—Le Faifaatoʻaga

“Ona fetalai atu lea o [Iesu] i ona soo: ʻE moni, e telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.’”—MATAIO 9:37, 38.

E MASANI ona faaaogā e Iesu auala e faia ai faatoʻaga ina ia aʻoaʻo mai ai se lesona tāua. (Mataio 11:28-30; Mareko 4:3-9; Luka 13:6-9) Aiseā? Ona sa nofo o ia i se nofoaga e toʻatele ai le ʻaufaifaatoʻaga. O le toʻatele o lana ʻaufaalogologo na faaaogāina nei faiga faafaatoʻaga mo le tele o senituri. Na fiafia i latou i le auala na faasino atu ai Iesu i a latou galuega i aso fai soo. Na malamalama lelei Iesu i le ituaiga o olaga sa latou ola ai, ma o ana aʻoaʻoga na uunaʻia ai i latou.—Mataio 7:28.

E mafai ona tatou matuā talisapaia talafaatusa a Iesu ma isi tala o loo i le Tusi Paia, pe a iai sina o tatou malamalamaga e uiga i faifaatoʻaga i uluaʻi senituri, o fuata o laau na ia totōina, o meafaigaluega na faaaogā, ma faigatā na ia fesagaʻia.

Seʻi mātau le auala e galue ai se faifaatoʻaga. Ia faitau mau faasino ma ia vaai po o ā ni mea e te aʻoaʻoina mai ai.

O le Taimi e Lūlū Ai

O loo tū le faifaatoʻaga i le faitotoʻa o lona fale ma taupunipuni ona mata mai ave o le lā, ma sosogi le manogi o le susū o le ea. Ua malū le palapala malō ona o timuga. Ua oo mai le taimi e sua ai le eleele, ma ua ia amo lana suō laau ma agaʻi atu i le fanua.

Ua tuufaatasi e le faifaatoʻaga ana povi poʻa ma ua tui i le tui povi ina ia unaʻi ai e fai le galuega.  Ua amata ona sua e le suō tosina le palapala gaoā ina ia maua ai sina alāvai, ae e lē matuā suaina le palapala (1). O loo taumafai le faifaatoʻaga e faasaʻosaʻo laina palapala o loo eli, ma e lē taitai ona toe tepa i tua ina neʻi sipa ese le suō ma piʻo ai le laina. (Luka 9:62) E tatau ona tausisi o ia i mea ua uma ona faailoga e galueaʻiina, ina ia mafai ona faaaogā lelei lona fasi fanua.

Ua uma ona sua le palapala i ni laina, ma ua sauni e lūlū i ai fatu. O loo ave e le faifaatoʻaga se taga karite i le isi ona lima, a o faaaogā le isi ona lima e lūlū solo ai fatu (2). E savali le faifaatoʻaga i luga o le eleele malō ma lūlū ma le faaeteete le fatu, ina ia paʻu i luga o “le eleele lelei.”—Luka 8:5, 8.

Pe a uma ona lūlū fatu, ona nonoa lea e le faifaatoʻaga ni lālā laau tuitui i lana povi poʻa, ona alu lea o le povi ma toso solo i le fanua ina ia nuti ai potopotoi palapala ma tanu ai fatu, ina neʻi ō mai manulele ma togitogi ma ʻai fatu a o leʻi tanuina e le palapala. Mulimuli ane, e faaaogā e le faifaatoʻaga se piki (3) ina ia faamaveve ai le palapala ma aveese ai ni vao e ono fetinaʻiina ai fatu a o leʻi matua.—Mataio 13:7.

O le Taimi e Selesele Ai

Ua mavae masina ma ua paʻū timuga. Ua paʻepaʻe mai le fanua atoa i karite ua matua.—Ioane 4:35.

O le seleselega o se taimi pisi tele lea mo le faifaatoʻaga ma lona aiga. E taofi e le tagata selesele i lona lima agavale ia tagutugutu o saito, ae e sele e lona lima taumatau i le sele saito uʻamea (4). E aoaoina mai e nisi saito ma fusi faatasi (5), ma uta i luga o se asini po o se taavale toso (6), e ave ai i le nuu i le mea e soli ai saito.

O loo susulu mai le lā i se aso maninoa, a o nofonofo le aiga i lalo o le laau o le mati. O loo toē, talatalanoa, ma aai faatasi a latou falaoa, saito tao, olive, mati mamago, ma vine, ona faaiʻu lea i le inuina o vai mai i le vaipuna.—Teuteronome 8:7.

I se fanua e lata ane, o loo aoina ai saito o totoe e tagata ao fanua (7). O nisi o tagata e matitiva ma e leai ni o latou fanua.—Teuteronome 24:19-21.

 Mulimuli ane, e faasalalau e le faifaatoʻaga ni fusi saito i luga o se fola maualuga e malō, i le mea e soli ai saito a le nuu. Ona toso faataamilo lea e le povi se laupapa mamafa e soli ai saito (8). (Teuteronome 25:4) I lalo o le laupapa e soli ai saito, o loo iai ni maa ma uʻamea maamaʻai e nuti ai ʻau o saito.

E faatalitali le faifaatoʻaga seʻia oo i le taimi e savili mai ai le afiafi. (Ruta 3:2) Pe a oo ina tau pogipogi, ona faaaogā lea o lana “suō” (9) e asu aʻe ai le saito i le ʻea. (Mataio 3:12) E paʻuʻū ifo saito i le fola ae e lelea le aputi i le matagi. E faaauau pea ona asu aʻe e le faifaatoʻaga lana suō seʻia oo ina mamā uma le saito.

Pe a oso aʻe le lā, ona amata loa lea o le galuega faamamā (10) a le avā a le faifaatoʻaga ma ona afafine. E latou te lūlū le faamamā o loo tumu i saito ma maamaa, ona toʻuulu ifo lea o saito i totonu o ato, ae e lafoaʻi ese lapisi. Ona o le tele o saito e maua mai, o lea e teu ai e tagata faigaluega na saito i totonu o fagu (11), ae e ave isi mea i le fale e teu ai saito.

I luga o le fola e soli ai saito, e fālō ai e le faifaatoʻaga lona tua, ma faamālōlō lona tino, a o vaavaai atu i fanua o loo siʻomia ai le nuu. E na te mātauina ma le lotomalie le vaega o lona fanua lea ua uma ona seleseleina, ma o se faamaoniga lenā o ana galuega mamafa. E vaavaai atu i tagata faigaluega a o galueaʻiina togāvine, togāolive, rimoni, ma laau o le mati. E talotalo mai lona tuaoi ma faamalō mai a o ia suaina se vaega o lona fanua. E fua mai i le fanua ni kukama, atasema, pi, liki, chickpeas, ma aniani. E mālōlō le faifaatoʻaga ma tepa aʻe i le lagi, ma fai atu sana tatalo mai i le loto, e faafetai ai i le Atua mo meaalofa lelei uma ua Ia foaʻi mai iā te ia.—Salamo 65:9-11.

[Ata i le itulau 28-30]

(Tagaʻi i le lomiga)