Faaaloalogia ma Faamamaluina e le Atua

A O IAI Iesu i le lalolagi, sa ia faaatagia atoatoa mai uiga ma le auala e faia ai mea e lona Tamā o i le lagi. Na faapea mai o ia: “Ou te lē faia se mea i loʻu lava loto; ae o mea na aʻoaʻo mai e le Tamā iā te aʻu, . . . ou te faia pea mea e fiafia i ai lona finagalo.” (Ioane 8:28, 29; Kolose 1:15) O lea la, o le iloaina o le auala na feagai ai Iesu ma fafine, o le a fesoasoani iā i tatou e iloa ai le silafaga a le Atua i fafine, faapea ma mea e na te faatalitalia mai iā i latou.

Ua faapea mai nisi o tagata popoto, na matuā ese lava manatu o Iesu e uiga i fafine, mai i manatu o tagata sa iai i taimi na tusia ai tusi o Evagelia. E ese faapefea? Ma pe e mafai e ana aʻoaʻoga ona maua ai e fafine i aso nei le saʻolotoga?

Auala na Feagai ai Iesu ma Fafine

▪ E lē na o ni ē e aogā mo feusuaʻiga. Na manatu taʻitaʻi lotu Iutaia, e lē tatau ona talanoa fafine i tamāloloa i nofoaga faitele, pe e lē ufiufia foʻi o latou foliga, ona e iʻu ina faaosoosoina ai tamāloloa i tuʻinanauga lē mamā. I  se faaeseesega, sa fautuaina e Iesu tamāloloa ia pulea o latou lava tuʻinanauga, ma ia feagai ma fafine i se auala mamalu, ae aua le faaesea i latou.—Mataio 5:28.

Na faapea mai foʻi Iesu: “Ai se tasi e faateʻa i lana avā ma toe faaipoipo atu i se isi, ua mulilua o ia . . . i le fafine muamua.” (Mareko 10:11, 12) Na ia teena foʻi aʻoaʻoga faarapi sa faataga ai ona teteʻa se tamāloa ma lana avā “i so o se māfuaaga” lava. (Mataio 19:3, 9) Sa lē masani tagata Iutaia i le faaupuga, ua mulilua o ia i le fafine muamua, auā na aʻoaʻo e rapi e faapea e lē mafai ona mulilua se tane i lana avā, ae e na o le avā e mafai ona mulilua! Ua faapea mai se tasi o faitofā o le Tusi Paia, ua “faamamaluina ma siitia le tulaga o fafine ona na faailoa mai e Iesu, e tatau ona tutusa tapulaa tau amio e ola ai tane ma avā.”

Aafiaga o ana aʻoaʻoga i aso nei. I faapotopotoga Kerisiano a Molimau a Ieova, e faifaimea faatasi ai fafine ma tane i a latou sauniga. Peitaʻi, e lē tatau ona popole fafine ina neʻi faaalia atu e tane ni uiga lē lelei iā i latou, auā e feagai tane Kerisiano ma ʻfafine matutua e pei o ni tinā, ma fafine lāiti e pei o ni tuafāfine i le amio mamā.’—1 Timoteo 5:2.

▪ Lotomalie e aʻoaʻo fafine. E ese mai i aʻoaʻoga taatele a rapi ia sa lē amanaʻia ai fafine, na aʻoaʻo e Iesu fafine ma faalaeiau i latou e faaali mai o latou manatu. Ona e leʻi manaʻo Iesu e aveesea le olioli o Maria i mea sa ia aʻoaʻoina, na ia faailoa atu ai e faapea e lē tatau ona uaʻi atu se fafine tau lava o feʻau i le fale. (Luka 10:38-42) O tali atamai a Mareta iā Iesu ina ua maliu Lasalo, na iloa ai sa ia maua foʻi aogā mai i aʻoaʻoga a Iesu.—Ioane 11:21-27.

Na manatu mamafa Iesu i manatu o fafine. A o iai o ia i le lalolagi, o le toʻatele o fafine Iutaia sa manatu e maua le fiafia pe a iai sana tama tama, aemaise lava pe afai o ia o se perofeta. O lea, ina ua valaau atu se fafine iā Iesu: “Amuia le manava na e fanau mai ai!,” sa faaaogā loa e Iesu le avanoa e faailoa atu ai se mea e sili atu ona tāua. (Luka 11:27, 28) Sa ia faailoa atu e sili ona tāua le usiusitaʻi i le Atua, nai lo o tiute tauave masani a se fafine.—Ioane 8:32.

Aafiaga o ana aʻoaʻoga i aso nei: E talisapaia e tane o loo aʻoaʻo i le faapotopotoga Kerisiano manatu o fafine i taimi o sauniga, ma faaaloalogia tuafāfine matutua “o ē e aʻoaʻo atu i mea lelei” e ala i a latou faaaʻoaʻoga ma le auala e feutagaʻi ai ma isi. (Tito 2:3) E faalagolago foʻi nei tane i fafine ina ia talaʻi atu le tala lelei o le Malo o le Atua.—Salamo 68:11; tagaʻi i le pusa  “Pe na Faasā e le Aposetolo o Paulo Ona Tautatala Fafine?”

 ▪ Alofa i fafine. I taimi o le Tusi Paia, sa faatāua fanau tama nai lo o teine, ma e atagia mai lenei manatu i le tusi tulafono a Iutaia lea o loo faapea mai: “E fiafia i latou e iai fanau tama, ae faanoanoa i latou e iai fanau teine.” E manatu nisi mātua o se avega mamafa le tausia o se tama teine, ona e manaʻomia ona suʻe se alii e faaipoipo i ai, totogi le taui mo le alii faaipoipo, ma e lē mafai ona faalagolago atu mātua iā te ia pe a matutua.

Na faaalia e Iesu e tutusa le tāua o le ola o se teine ma se tama, auā na ia faatūina le tama tama a le fafine Naina ua oti lana tane, faapea ma le afafine o Iairo. (Mareko 5:35, 41, 42; Luka 7:11-15) Ina ua uma ona faamālōlōina se fafine na “maʻi mo tausaga e sefulu valu ona o se temoni,” ona ia taʻua lea o ia “o le afafine o Aperaamo,” o se faaupuga e seāseā ona maua i tusitusiga Iutaia. (Luka 13:10-16) O lenei faaupuga agalelei ma faaaloalo na faaalia ai e Iesu lona amanaʻia o le tele o le faatuatua o le fafine, ma e tāua o ia e pei o isi.—Luka 19:9; Kalatia 3:7.

Aafiaga o ana aʻoaʻoga i aso nei: E iai se faaupuga Asia e faapea, o le tausia o se afafine e tai pei o le galue mamafa mo lou tuaoi ae leai sau mea e maua mai ai. Peitaʻi, e lē tatau ona manatu faapena tamā Kerisiano. E tatau i mātua Kerisiano ona alolofa i a latou fanau, o atalii ma afafine, ma faamautinoa ua aʻoaʻoina ma tausia lelei i latou.

▪ Faatuatuaina fafine. I faamasinoga i Iutaia, e manatu i le molimau a se fafine e tutusa ma le molimau a se pologa. Na fautua mai le tusitala o talafaasolopito o Josephus: “E lē tatau ona taliaina le molimau a se fafine ona e latou te manatu māmā i mea, ma o la latou masani o le osovale.”

I se faaeseesega, na filifilia e Iesu fafine ina ia fai ma molimau i lona toetū. (Mataio 28:1, 8-10) E ui sa iloa e aposetolo sa molimauina e nei fafine le fasiotia ma le tanuga o le Alii, ae sa faigatā lava ona talitonu i a latou faamatalaga e uiga i le toetū. (Mataio 27:55, 56, 61; Luka 24:10, 11) Peitaʻi, o le faaali muamua atu o Keriso i fafine ina ua toe faatūina o ia, sa faailoa mai ai e agavaa fafine ina ia avatu se molimau e pei foʻi o ona soo.—Galuega 1:8, 14.

Aafiaga o ana aʻoaʻoga i aso nei: I faapotopotoga a Molimau a Ieova, e faaalia e tane o loo iai tiute tauave le manatu mamafa i fafine, e ala i le amanaʻia o o latou manatu. E faaalia foʻi e tane Kerisiano le “āva” i a latou avā e ala  i le faalogologo lelei atu iā i latou.—1 Peteru 3:7; Kenese 21:12.

E Maua e Fafine le Fiafia Ona o Mataupu Silisili o le Tusi Paia

Pe a faaaʻoaʻo tane iā Keriso, e latou te faaalia le faaaloalo i fafine, ma tuu atu le saʻolotoga lea e finagalo Ieova e maua e fafine. (Kenese 1:27, 28) Nai lo o le manatu o tane Kerisiano e sili atu i latou i lo o fafine, e tatau ona mulimuli i mataupu silisili o le Tusi Paia, ma maua ai e a latou avā le fiafia.—Efeso 5:28, 29.

Ina ua amata ona suʻesuʻe e Yelena le Tusi Paia, sa masani ona sauāina o ia e lana tane, o lē na ola aʻe i se siʻomaga sauā, ma o le masani a tamāloloa o le ave faamalosi o tamaʻitaʻi e fia faaipoipo i ai. Ua faapea mai Yelena: “Sa ou maua le lototele mai i mea na ou aʻoaʻoina mai i le Tusi Paia. Na ou iloa ai e iai se tasi o loo faatāuaina ma alofa mai iā te aʻu, ma e mafai ona suia uiga o laʻu tane pe afai e suʻesuʻe i le Tusi Paia.” Na matuā faafiafiaina Yelena ina ua talia e lana tane se suʻesuʻega faale-Tusi Paia, ma papatisoina e avea ma Molimau a Ieova. Ua faapea atili mai Yelena: “Ua avea nei laʻu tane o se tagata e iloa pulea lona ita, ma e ma te faaalia le fefaamagaloaʻi. Ua fesoasoani mataupu silisili o le Tusi Paia, ina ia ou lagona ai e iai soʻu aogā, ma ua ou malupuipuia i totonu o la ma faaipoipoga.”—Kolose 3:13, 18, 19.

E tele isi faaaʻoaʻoga e pei o le mea na tupu iā Yelena. E faitau miliona fafine Kerisiano ua fiafia ona ua taumafai faatasi ma a latou tane, e faatatauina mataupu silisili o le Tusi Paia i a latou faaipoipoga. Ua latou maua le faaaloalogia, faamāfanafanaga, ma le saʻolotoga a o auaufaatasi ma o latou uso Kerisiano.—Ioane 13:34, 35.

I le avea o ni ē e agasala ma lē lelei atoatoa, ua iloa e tane ma fafine Kerisiano, o i latou o se vaega o le foafoaga a le Atua ua ʻfaatoʻilaloina i le agasala.’ Peitaʻi, o le mafuta vavalalata atu i lo latou Tamā alofa o Ieova, ua latou maua ai le faamoemoe e ʻsaʻoloto mai i le faapologaina i mea leaga, ma le saʻolotoga mamalu o le fanau a le Atua.’ Maʻeu se faamoemoe matagofie mo tane ma fafine e ala i le tausiga a le Atua!—Roma 8:20, 21.

[Pusa i le itulau 9]

 Pe na Faasā e le Aposetolo o Paulo Ona Tautatala Fafine?

Na tusi le aposetolo o Paulo: “Ia aua neʻi tautatala fafine i faapotopotoga.” (1 Korinito 14:34) O le ā le uiga o lana faamatalaga? Pe na ia taʻu faatauvaaina o latou tomai? E leai, auā e masani ona ia taʻua le auala lelei e fetufaaʻi ai fafine ma isi. (2 Timoteo 1:5; Tito 2:3-5) I lana tusi i Korinito, sa fautuaina ai e Paulo fafine, faapea ma ē o iai le meaalofa o le tautatala i gagana eseese ma le faia o valoaga, ina ia “aua neʻi tautatala” pe afai o loo tautala se isi uso talitonu. * (1 Korinito 14:26-30, 33) E foliga mai sa naunau tele nisi o fafine Kerisiano i o latou talitonuga fou, ma e latou te faasalavei atu i lē o loo lauga e ala i le tuufesili atu, e pei o le masani a tagata i na atunuu. Ina ia ʻalofia le faasalavei atu, sa faalaeiau e Paulo i latou ina ia “fesili atu i a latou lava tane i le fale.”—1 Korinito 14:35.

[Faaopoopoga i lalo]

[Ata i le itulau 10]

Ina ua toetū Iesu, sa ia tuu atu iā Maria le Makatala, le faaeaga e faailoa atu ai lona toetū i le ʻauaposetolo

[Ata i le itulau 11]

E faaaloalogia ma faamamaluina fafine e i latou e usitaʻia mataupu silisili o le Tusi Paia