O se Tusi Mai Eleni

Talaʻi i le Taufaasiʻusiʻuga i Saute o Europa

A O AGAʻI atu la matou vaa i se tamaʻi motu i le Sami o Metitirani, sa faasolo ina mou mālie atu i le vaai atumauga tetele o Levká i le motu o Kereta. E toʻa 13 la matou ʻaumalaga, o loo naunau e ō atu e talaʻi i le tamaʻi motu o Gavdos, i le taufaasiʻusiʻuga i saute o Europa.

Na foliga mai o le a sologa lelei la matou faigāmalaga i lenā aso vevela. Ae na agi mai se matagi malosi ma sousou ai le sami ma felafoaʻiina ai le vaa. Ina ua amata ona ou maʻi vasa, sa ou manatua loa le tala e faatatau i le aposetolo o Paulo, o lē na afātia i lenei ogāsami i senituri ua mavae, a o taʻua Gavdos o Kalauta. (Galuega 27:13-17) Na pau le mea na ou talotalo i ai, ia taunuu saogalemu le vaa i Gavdos.

Ina ua matou iloa mamao atu le motu, na foliga mai e pei e maugā, ae ina ua matou taunuu, na iloa ai e laugatasi le motu, e tusa ma le 1,000 futu (300 mita) lona maualuga, ma e leai ni tumutumu iloga. O lenei motu e pe tusa ma le sefulu maila faatafafā (26 km faatafafā), ma o le tele o vaipanoa e togāvaoa ma e iai laau o le paina. O nisi o nofoaga, e ola gofie ai le laau o le perosi e oo lava i le matafaga.

E tusa ma le 8,000 tagata na nonofo i le motu i aso ua mavae, ae i aso nei ua itiiti ifo i le 40 tagata o loo nonofomau ai, ma e lē tele ai ni faiga faaonapōnei. E ui e masani ona pasia lona talafatai e vaa laʻu uta ma vaa suāuu, ae seāseā ona faimalaga atu le tamaʻi vaa lea e alu i Kereta ona o le leaga o le tau, ma i nisi taimi e tolopō ai ana faigāmalaga.

Ina ua taunuu le vaa, sa matou naunau e ō atu e taʻu atu i tagata se tala fiafia e faalaeiau ai, o se faamoemoe mautinoa mo se lumanaʻi lelei, faapea le ola e faavavau i se soifua mālōlōina lelei atoatoa.

I se faigāmalaga e fā ma le ʻafa itula i le sami sousou ma matagi, sa iloagofie atu i o matou foliga e leʻi toʻafilemu la matou faigāmalaga i Gavdos. Peitaʻi na toe maua le malosi ina ua uma ona fai sina mālōlōga ma inu se ipu kofe. Ina ua uma ona autalu puupuu le tala e faatatau i le malaga a le aposetolo o Paulo, ma fai se tatalo faatauanau, ona amata loa lea o la matou galuega.

 E faaleuō ma talimālō tagata, auā na latou faaulufale i matou ma aumai ni meaʻai ma vaiinu. E lē gata na faasoa atu iā i latou le tala lelei mai i le Tusi Paia, ae na faaalia foʻi lo matou talisapaia o lo latou agaga talimālō, e ala i le fesoasoani e faaleleia nisi o mea. Sa mātauina e se tasi o la matou vaega e fai eletise, se masini ua lē o toe ola a se fafine na ia talanoa i ai, ma na ia toe faaleleia. Sa pāʻia le loto o le fafine i le agalelei sa faaalia atu, talia lomiga faale-Tusi Paia, ma faamālō mai mo la matou talaʻiga. Na faailoa mai e se isi fafine lona talisapaia e ala i le faapea mai: “O la outou galuega e mai le Atua, ae e lē o tagata, ma e mautinoa lenā mea ona ua outou ō mai e talaʻi i lenei motu e mamao ese.”

Sa matuā talisapaia e tagata a matou lomiga faale-Tusi Paia. Na talia e se tamāloa Le Olomatamata ma le Ala Mai!, ma manaʻo mai mo nisi lomiga e faitau i le taimi o le tau mālūlū. O le isi tamāloa e lē gata sa manaʻo i ni lomiga mo ia, ae sa talosaga mai foʻi mo nisi lomiga e tuu i lona faleoloa e ō atu tagata faatau ma faitau ai. Sa ia tuuina mai lona tuatusi e lafo atu ai mekasini i masina taʻitasi. Sa faateʻia se aiga ina ua faailoa atu o loo taʻua i le Tusi Paia le igoa o si o latou tamaʻi motu, ma na talia ma le fiafia a matou lomiga.

E ui sa talilelei mai tagata, ae o la matou asiasiga i Gavdos sa toe aumaia ai ni faalogona faanoanoa, i nisi o la matou ʻaumalaga. I vaifagaloa o Sarakíniko, sa iai se fale na nonofo ai tagata na ave faapagota i inā. I le vaitausaga o le 1930, na ave faapagota ai i inā se Molimau a Ieova e igoa iā Emmanuel Lionoudakis, ona o lana galuega talaʻi. * I aso ua mavae, sa faamatalaina Gavdos, o se motu tuufua e tele ai akarava, e toʻatele tagata ua maliliu ai ona o le fia aai, matitiva, faapea ma faamaʻi, ma o se nofoaga ua talafeagai ona taʻua o le motu o le oti. Sa fagota Emmanuel e maua ai ana meaʻai, ae i le taimi e tasi sa maelega foʻi o ia e talaʻi atu i isi na ave faapagota, auā sa na o ia le Molimau i inā. Na matou malaga faatasi ma le afafine o Emmanuel ma lona toʻalua, faatasi ai ma le la tama teine, ma na matuā ootia o latou loto ina ua vāai i le mea na ave faapagota i ai lo latou tamā, mo le 70 tausaga ua mavae. O le faaaʻoaʻoga a Emmanuel, na avea o se faalaeiauga mo i matou, ina ia tumau faamaoni ma maelega i le talaʻiga.

O i latou na ave faapagota i Gavdos, sa lē toe mananaʻo e toe foʻi atu i le motu ona o mea na tutupu ai. Ae o se faaeaga iā i matou le asiasi atu i lenei motu, ma e matou te naunau e toe foʻi e asi tagata na faaalia le fiafia, ia sa tufa i ai mekasini e 46 ma polosiua e iva.

Na leaga le tau a o lata i le taimi e matou te toe foʻi ai, o lea na tolopō ai la matou malaga na fuafua e ō ese i le 5 i le afiafi. Na matou ō i totonu o le vaa i le vaeluapō, e sauniuni ai mo le faigāmalaga. Na alu ese le vaa i le 3 i le vaveao, ma e lima itula na folau ai le vaa i le sami sousou ae faatoʻa oo i Kereta. Ina ua matou taunuu, na matuā lagona le vaivai ona o le sou o le faigāmalaga, ae na lagona foʻi le fiafia, ona na mafai ona matou faalauiloa atu le suafa o Ieova i le motu o Gavdos. (Isaia 42:12) Na manatu la matou vaega sa aogā a matou taumafaiga. E galo le sousou o le faigāmalaga, ae e lē galo i mafaufau ma loto mea na tutupu i lenei malaga.

[Faaopoopoga i lalo]

[Ata i le itulau 24]

Trypití Cape, i le taufaasiʻusiʻuga i saute o Europa

[Ata i le itulau 25]

Vaifagaloa o Sarakíniko, o loo iloa atu ai se fale na nonofo ai tagata na ave faapagota i inā, ma se maa faamanatu e manatua ai i latou

[Ē Ana le Ata]

Courtesy of Hellenic Post