NA TUSI atu e le aposetolo o Paulo na upu i ona uso Kerisiano i Roma, pe tusa o le 56 T.A. E lē o taʻua i le Tusi Paia pe na taunuu le faigāmalaga lenā a Paulo i Sepania pe leai. Po o le ā lava le tulaga, na oo lava le tala lelei mai le Afioga a le Atua i Sepania i le senituri lona lua T.A., e ala i taumafaiga a Paulo po o isi misionare Kerisiano.

E leʻi umi ae amata ona faatoʻateleina faalapotopotoga na faapea mai o Kerisiano i Sepania. O lea na tulaʻi mai ai se manaʻoga e faaliliu le Tusi Paia i le gagana Latina, mo tagata Sepania. O le māfuaaga, e oo ane i le senituri lona lua ua leva ona pulea e le Emepaea o Roma Sepania, ma sa avea le gagana Latina ma gagana autū sa tautatala ai tagata.

Na faia e uluaʻi Kerisiano i Sepania ni faaliliuga eseese o le Tusi Paia i le gagana Latina, lea ua taʻua o le Vetus Latina Hispana. E tele tausaga na tufatufaina ai nei Tusi Paia i Sepania, a o leʻi māeʻa ona faaliliuina e Jerome i le gagana Latina le Vulgate i le tauamatamataga o le senituri lona lima T.A.

Na māeʻa ona faaliliu e Jerome lenā faaliliuga i Peteleema i Palesitina, ma na vave lava ona oo i Sepania. Ina ua logotala Lucinius o se tagata taualoa e suʻesuʻe i le Tusi Paia i le faaliliuga a Jerome, na vave ona manaʻo e maua sana kopi o lenā faaliliuga. Na ia aauina atu ni tusiupu se toʻaono i Peteleema e faia ni kopi, ma aumai i Sepania. I senituri mulimuli ane, na faasolosolo lava ona suia e le Vulgate le Vetus Latina Hispana. O nei faaliliuga na mafai ai ona faitau ma malamalama tagata Sepania i le feʻau mai i le Tusi Paia. Ae ina ua mavae atu le pulega a le Emepaea o Roma, na tulaʻi mai ai se manaʻoga e faaliliuina nisi Tusi Paia i nisi gagana.

I le senituri lona lima, na aliaʻe mai ai se isi gagana fou i Sepania, o le gagana Gothic, ina ua osofaʻia Sepania e tagata Visigoth ma isi ituaiga o tagata Siamani. Na ō mai nei tagata ma lo latou talitonuga faa-Ariu (Arianism) lea e teena ai le aʻoaʻoga o le Tolutasi. Na latou aumaia la latou lava faaliliuga o le Tusi Paia, e taʻua o le Ulfilas Gothic Bible. O le Tusi Paia lea na faaaogā i Sepania seʻia oo i le faaiʻuga o le senituri lona ono. O le taimi lenā na liulotu ai Reccared le tupu o tagata Visigoth e avea o se Katoliko, ma na ia faatonuina ai ina ia ao uma mai tusi faa-Ariu ma susunuina, lea e aofia ai ma le Ulfilas Bible. Talu mai lenā taimi, e leʻi toe iai lava ni tusitusiga i le gagana Gothic i Sepania.

Peitaʻi, sa olaola pea le Afioga a le Atua i Sepania i lenā vaitaimi. E ese mai le gagana Gothic, sa iai se isi gagana Latina sa tautatala ai le toʻatele o tagata i Sepania, lea na tupuga mai ai isi gagana * na tautatala ai tagata i le penisula i Iberia. O tusitusiga  tuai i nei gagana na taʻua o papamaa Visigothic, talu ai na tusia i papamaa. O nei tusitusiga e mai i le senituri lona ono ma le fitu, ma o nisi o nei tusitusiga na aofia ai faamatalaga mai le tusi o Salamo e pei o le Salamo e 16, ma tusi o Evagelia.

O le faaauau ona iai o le Tusi Paia i papamaa, ua iloa ai sa mafai pea ona faitau ma toe tusia e tagata lautele le Afioga a le Atua i lenā taimi. Atonu sa faaaogā e faiaʻoga o le Tusi Paia na tusitusiga e aʻoaʻo ai a latou tagata aʻoga, ina ia iloa faitau ma tusitusi. Sa taugofie papamaa pe a faatusatusa atu i le taugatā o paʻu o manu sa faaaogā e i latou na nonofo i monaseri i taimi anamua, e tusia ai a latou Tusi Paia lea e iai ata.

O se tasi o na Tusi Paia taugatā o loo teu i le falesā o San Isidoro i León i Sepania. Na iai lenei tusi talu mai le 960 T.A., e 1028 itulau, 18 inisi (47 cm) le umi, 13 inisi (34 cm) le lautele, ma pe tusa ma le 40 pauna (18 kilo) le mamafa. O le isi Tusi Paia e taʻua o le Bible of Ripoll, o loo iai i le Faletusi o le Vatikana ma na iai lenā tusi talu mai le 1020 T.A. O se tasi lenei o Tusi Paia e sili ona tele ata o loo iai. Atonu na faaalu e se alii monike se aso atoa e tusi ai se mataʻitusi se tasi, po o se vaiaso atoa foʻi e tusi ai le ulutala i le faavaa o le tusi. E ui i le anagatā o nei Tusi Paia, ae e leʻi tele se fesoasoani i le faalauiloaina atu o le feʻau mai le Afioga a le Atua.

Na aliaʻe mai se isi gagana i Sepania i le senituri lona valu, ina ua manumalo tagata Musalimi i se osofaʻiga i le tolotolo i Sepania. I vaipanoa na pulea e tagata Musalimi, na sili atu ona toʻatele tagata e tautatala i le gagana Arapi nai lo o le gagana Latina. O le māfuaaga lea na manaʻomia ai ona faaliliuina le Tusi Paia i le gagana Arapi.

Na tele faaliliuga o le Tusi Paia i le gagana Arapi na tufatufaina i Sepania, aemaise lava i tusi o Evagelia. I le pe ā o le senituri lona valu, na faaliliuina ai le Tusi Paia atoa i le gagana Arapi e John, o se epikopō o Seville. Peitaʻi, o le tele o na faaliliuga ua lē o toe iai. O se tasi o faaliliuga faa-Arapi o tusi o Evagelia mai le ogatotonu o le senituri  lona 10, o loo teuina i le malumalu i León i Sepania.

I le taufaaiʻuiʻuga o le vaitausaga e amata mai i le senituri lona 5 T.A. seʻia oo i le senituri lona 15 T.A., na amata ona aliaʻe mai ai le gagana Castile po o le gagana Sepania i le penisula o Iberia. Na fesoasoani lenei gagana e faalauiloa atu le Afioga a le Atua. * I le tauamatamataga o le senituri lona 13, na maua ai le uluaʻi faaliliuga o le Tusi Paia i le gagana Sepania, e taʻua o le La Fazienda de Ultra Mar. E aofia i lenei faaliliuga faamatalaga e faatatau i se faigāmalaga na alu i Isaraelu, faamatalaga mai le Penetatuka po o tusi muamua e lima o le Tusi Paia, isi tusi o le Tusitusiga Eperu, faapea tusi o Evagelia ma isi tusi o Tusitusiga Eleni.

E leʻi fiafia taʻitaʻi lotu i lenei faaliliuga. I le tausaga e 1234, na faia ai se Fono i Tarragona ma na poloaʻia ai e avatu uma Tusi Paia i le gagana Sepania i taʻitaʻi lotu, ina ia susunuina. Peitaʻi e leʻi taofia ai le faaliliuina pea o Tusi Paia. Na manaʻo le tupu o Alfonso X (1252-1284) e faaliliu le Tusi Paia i le gagana Sepania, ma sa ia lagolagoina na taumafaiga. O ia foʻi na amataina le gagana tusitusi a Sepania. Sa aofia i faaliliuga sa faia i lea vaitaimi le Pre-Alfonsine Bible, faapea le Alfonsine Bible, lea na avea ma faaliliuga pito i taatele i le gagana Sepania.

O nei faaliliuga e lua na fesoasoani e faamausalī ma faaʻoaina ai le gagana Sepania. Na faapea mai se tasi o faitofā o Thomas Montgomery, e faatatau i le Pre-Alfonsine Bible: “Na mataʻina le galuega a lē na faaliliuina lenei Tusi Paia, pe a fua i le saʻo aʻiaʻi o le faaliliuga faapea le matagofie o le gagana sa faaaogā. . . . Sa faigofie ma manino le gagana, o se mea na manaʻomia ina ia faigofie ai ona malamalama tagata e lē malamalama i le gagana Latina.”

Peitaʻi o na uluaʻi faaliliuga o le Tusi Paia i le gagana Sepania, sa faaliliu mai i le Vulgate lea na i le faa-Latina, nai lo o uluaʻi gagana. Talu mai le senituri lona 14, na faia ai e ni tagata faitofā Iutaia le tele o faaliliuga faa-Sepania o Tusitusiga Eperu, mai le gagana Eperu. Sa toʻatele tagata Iutaia i le taimi lenā i Sepania nai lo o isi atunuu o Europa, ma sa mafai ona maua e tagata faaliliu Iutaia manusikulipi Eperu e saʻo aʻiaʻi, lea na faia aʻe ai a latou faaliliuga. *

O se tasi o faaaʻoaʻoga mataʻina o le Alba Bible, lea na māeʻa ona faaliliuina i le senituri lona 15. Na faatonuina e se alii taualoa o Sepania o Luis de Guzmán se faiaʻoga o le Tusi Paia o Moisés Arragel, e faaliliu le Tusi Paia i le gagana Sepania moni. E lua māfuaaga na ia avatu ai lenei faatonuga: (1) “O Tusi Paia na faaliliuina i gagana na tupuga mai i le faa-Latina, e lē saʻo aʻiaʻi faamatalaga o loo iai.” (2) “E tatou te matuā manaʻomia ni faasino tusi mo ni mau e faigatā ona malamalama i ai.” O lenā talosaga sa iloa ai le matuā naunau o tagata i lenā vaitaimi, e faitau ma malamalama i le Tusi Paia. Ua iloa ai foʻi, ua loa ona iai taumafaiga e tufatufaina le Tusi Paia i Sepania.

Ua mafai e tagata Sepania ona faitau i le Tusi  Paia i la latou lava gagana ma malamalama i ai, ona o taumafaiga a tagata faaliliu ma i latou na toe tusia. O lea, na taʻua e se tusitala o talafaasolopito o Juan Orts González e faapea, “sa sili atu le malamalama o tagata Sepania i le Tusi Paia nai lo o tagata Siamani po o tagata Egelani, a o leʻi oo i le vaitaimi o Luther.”

Peitaʻi, i le taufaaiʻuiʻuga o le senituri lona 15, na faasā ai e le Faamasinoga a le Lotu i Sepania le faaliliuina, po o le umia foʻi e se tasi o se Tusi Paia e tusa lava po o le ā le gagana. Na umi se taimi na faasā ai le Tusi Paia i Sepania, ma na soloia lenā faasāsāaga ina ua mavae le 300 tausaga. I lenā vaitaimi faigatā, e toʻaitiiti le ʻaufaaliliu lototetele na toe faia faaliliuga i le gagana Sepania i isi atunuu, ma ave faananā i Sepania. *

O nei mea uma na tutupu, ua faaalia ai le tele o taumafaiga a tagata tetee e tafiesea le Afioga a le Atua. Peitaʻi, e leʻi mafai ona latou taofia fetalaiga a Lē e ona le malosi uma lava.​—Salamo 83:1; 94:20.

O galuega fitā a tagata faitofā mai i le senituri lona 5 T.A. e oo i le senituri lona 15 T.A., na mafai ai ona mauaa ma faatuputeleina le feʻau o le Tusi Paia i Sepania. Ua faaaʻoaʻo foʻi tagata faaliliu i aso nei i le maelega o ē na faaliliuina le Tusi Paia i le gagana Latina, Gothic, Arapi ma le gagana Sepania. O le iʻuga, ua mafai e le faitau miliona o tagata Sepania, ona faitau i le Afioga a le Atua i le gagana e pāʻia ai o latou loto.