I le tausaga e 33 T.A., na maliu ai Iesu, toe faatūina mai ma afio aʻe i le lagi. I le tele o tausaga mulimuli ane ai, na tuuina atu ai iā te ia le pule e avea ai o se Tupu. (Tanielu 7:13, 14) I le lumanaʻi, o le a gaoioi o ia o se Tupu e aumaia le filemu i le lalolagi ma tafiesea le mativa.​—Faitau le Salamo 72:7, 8, 13.

O le a faia e Iesu mea matagofie mo le fanau a tagata. O le a ia faaaogā le mana mai lona Tama e toe faafoʻisia ai le ola lelei atoatoa i tagata. O le a olioli foʻi tagata i le olaga i le lalolagi e aunoa ma le soifua matua ma le oti.​—Faitau le Ioane 5:26-29; 1 Korinito 15:25, 26

O loo faatonutonuina e Iesu le galuega talaʻi a ona soo moni i le lalolagi aoao. E latou te asiasi atu i tagata e faalauiloa atu le malo o le Atua mai i le Tusi Paia. Na faamautinoa mai e Iesu o le a ia lagolagoina pea le galuega a ona soo, seʻia tafiesea e le malo o le Atua faigāmalo uma o loo iai i le lalolagi.​—Faitau le Mataio 24:14; 28:19, 20.

Ua faaaogā e Iesu le faapotopotoga o Kerisiano moni e taʻitaʻia ai tagata i se olaga e sili ona lelei. E faaauau ona ia taʻitaʻia i latou a o agaʻi atu i le faaumatiaga o lenei faiga o mea a le lalolagi, ma a o ulu atu i le lalolagi fou ua folafola mai e le Atua.​—Faitau le 2 Peteru 3:7, 13; Faaaliga 7:17