MATAUPU AUTŪ | PE E MANATU MAMAFA MAI LE ATUA IĀ TE OE?
E Silasila Mai le Atua iā te Oe
“O loo silasila ona [Atua] fofoga i ala o le tagata, e silafia foʻi e ia ona ala uma.”—IOPU 34:21.
LE MĀFUAAGA E LĒ MAUTONU AI NISI: E tusa ai o se tasi o suʻesuʻega, o le aniva lea e iai lo tatou lalolagi, e toetoe 100 piliona isi paneta o loo iai. Pe a fua atu i le telē o le vateatea, e toʻatele ua fesili, ʻAiseā la e manatu mai ai Lē na foafoaina nei mea i tagata faatauvaa o loo i lenei paneta laʻitiiti?’
LE AʻOAʻOGA A LE TUSI PAIA: E lē na ona tuuina mai e le Atua iā i tatou o le Tusi Paia e aunoa ma le naunau mai iā i tatou. Nai lo lea, ua faamautinoa mai e Ieova e faapea: “Ou te fautua atu foʻi ma ou vaai iā te oe.”—Salamo 32:8.
Seʻi o tatou iloilo le tulaga o Akara, o se fafine Aikupito i le senituri lona 20 T.L.M. Sa lē faaaloalo Akara i lona matai o Sarai, ona tuliesea lea e Sarai o ia ma sola ese ai i le toafa. Pe na faagaloina ai la e Ieova Akara ona o lana mea sesē? Ua taʻua i le Tusi Paia: “Ona maua lea o ia e le agelu a Ieova.” Na faamautinoa atu e le agelu iā Akara, ua “faafofogaina e Ieova lou tagiauē.” Ona valaau atu lea o Akara iā Ieova: “O oe o le Atua na te silafia mea uma.”—Kenese 16:4-13.
O loo silasila mai foʻi le ʻAtua o lē e na te silafia mea uma’ iā te oe. Ina ia faataʻitaʻia lenei tulaga: E vaavaaia lelei e se tinā alofa lana fanau lāiti, auā o le laʻitiiti o se tamaitiiti, o le atili manaʻomia foʻi lenā o le tausiga alofa a ona mātua. I se tulaga tutusa, e sili ona silasila mai le Atua iā i tatou o ē faatauvaa ma mafatia. Ua fetalai mai Ieova: “Ou te nofo i le mea maualuga ma le mea paia, e ma te mau foʻi ma lē ua nutimomoia ma faamaulalo, ina ia faafouina loto o ē ua faatauvaa ma faafouina loto o ē ua nutimomoia.”—Isaia 57:15.
Peitaʻi e te ono tomānatu e faapea: ʻE faapefea ona silasila mai le Atua iā te aʻu? Pe e na te faamasinoina aʻu i oʻu foliga vaaia, pe e silasila mai i loʻu loto ma malamalama moni iā te aʻu?’