O faiga piʻopiʻo i malo, e uiga atu i le faaaogā sesē o le pule ina ia maua ai mea a se tagata lava ia. Ua autausagā o faaaogā sesē e tagata le pule. O se faaaʻoaʻoga, o loo iai i le Tusi Paia se tulafono na faasā ai faiga faaalatua i faamasinoga. E faaalia mai ai, ua leva ona iai lenei faiga i le silia i le 3,500 tausaga ua mavae. (Esoto 23:8) Ae e iai nisi mea e aofia ai i faiga piʻopiʻo, nai lo o le tau ina talia o faiga faaalatua. O nisi taimi, o le fai mea piʻopiʻo o tagata mautofiga i malo, e latou te gaoia ai meatotino ma tupe, pe faaaogā sesē auaunaga e lē aiā i ai. E latou te ono faaaogā foʻi o latou tulaga mo le lelei o a latou uō ma tauaiga.

O so o se faalapotopotoga faaletagata lava e iai faiga piʻopiʻo. Ae e foliga mai ua sili atu ona leaga faiga piʻopiʻo i malo. I le lipoti o le Global Corruption Barometer i le 2013, lea na tusia e le Transparency International, na taʻua ai e manatu tagata o le lalolagi aoao, o vaega e lima e sili ona tele ai faiga piʻopiʻo, o vaega faapolotiki, leoleo, tagata maualuluga o le malo, ʻaufaitulafono ma faamasinoga. Seʻi iloilo nisi o lipoti e faamatilatila mai ai lenei faafitauli.

• AFERIKA: I le 2013, pe tusa ma le 22,000 tagata maualuluga o le malo i Aferika i Saute, na molia i gaoioiga lē talafeagai ona o faiga piʻopiʻo.

• AMERIKA I SAUTE: I le 2012, e 25 tagata na molia ma faasalaina i Pasili ona o le faaaogāina o tupe a tagata lautele, ina ia lagolago ai i latou i faiga faapolotiki. O se tasi na aofia ai i ē na molia ma faasalaina, o le sui ofisa sili a lē na avea ma peresitene, o le tagata lona lua e sili ona maualuga i le malo.

• ASIA: I le 1995, e 502 tagata na maliliu ina ua malepe i lalo se faleoloa telē i Seoul i Korea i Saute. Na maua i suʻesuʻega a tagata suʻesuʻe, sa faia e tagata maualuluga o lenā taulaga ni faiga faaalatua, ina ia faataga ai le ʻau konekarate e faaaogā simā e vaivai, ma solia ai tulafono o le saogalemu.

• EUROPA: Na taʻua e Cecilia Malmström, o le komesina o Mataupu Tau Lotoifale o Europa: ʻE matuā faateʻia ona o le faatuputupulaʻia o faiga piʻopiʻo i Europa.’ Na ia taʻua atili, “e lē o faia se taumafaiga malosi a le faigāmalo e matuā aveesea faiga piʻopiʻo.”

Ua matuā faigatā i tagata ona aveesea faiga piʻopiʻo i malo. Na tusi le polofesa o Susan Rose-Ackerman, o sē e atamai i mataupu e tetee atu ai i faiga piʻopiʻo e faapea, ina ia faia se suiga, e manaʻomia “ni suiga mataʻina i le auala e faia ai mea e malo.” E ono foliga mai ua leai se mea e mafai ona faia i lenei tulaga. Peitaʻi, ua faaalia mai i le Tusi Paia e lē gata e mafai ona faia ni suiga e sili atu, ae e mautinoa foʻi o le a tutupu na suiga.