Po o le a faataga e le Atua tagata ia faaauau ona pule le tasi i le isi, ma faamataʻuina ai le lumanaʻi o tagata? E leai, o le a ia faalaa mai ma faaiʻuina puapuaga ma mafatiaga uma ia ua autausagā o iai. E finagalo Lē na foafoaina tagata ma le lalolagi, ia e iloa ua lata le taimi e gaoioi ai o ia. Ua faapefea ona ia faailoa mai lenā malamalamaga tāua?

O se faaaʻoaʻoga: Pe a e faimalaga i se taavale, atonu e te vaai muamua i se faafanua pe saʻili i nisi faamatalaga mo ni taʻiala. Pe a uma, e te mautinoa o le a e taunuu i le nofoaga lea e te malaga i ai, a o e vaai atu i faailoilo ma faailoga e tutusa lelei ma taʻiala ia na e maua. I se tulaga talitutusa, ua tuuina mai e le Atua iā i tatou lana Afioga, lea e faamatala mai ai mea mataʻina o le a tutupu i le lalolagi. A o tatou vāai atu i na mea o loo tutupu, e faamautinoa mai ai ua tatou tulata atu i le iʻuga.

O loo faamatala i le Tusi Paia o le a oo atu le talafaasolopito o le lalolagi i se vaitaimi e sili ona mataʻina ma tāua, lea e iʻu atu ai i le iʻuga. O le a vaaia i lenā vaitaimi se tuufaatasiga o mea e tutupu i le lalolagi, ma tulaga e leʻi tutupu muamua lava i le talafaasolopito o le tagata. Seʻi o tatou iloilo nisi o vala o loo taʻua i le Afioga a le Atua.

1. O TULAGA MATUĀ FAIGATĀ I LE LALOLAGI O loo lisi mai i le valoaga i le Mataio mataupu e 24, mea e tutupu i le lalolagi e fai ma faailoga. O lenā faailoga o le a iloa ai le “taufaaiʻuiʻuga o le faiga o mea,” ma faasolo atu ai i le taimi ʻe oo mai ai le iʻuga.’ (Fuaiupu 3, 14) O nei mea e aofia ai taua, oge, o mafuiʻe i lea mea ma lea mea, le faatuputeleina o le amioleaga, leai se alofa, ma gaoioiga faaʻoleʻole a taʻitaʻi lotu ina ia faasesē ai tagata. (Fuaiupu 6-26) O le mea moni, ua faitau senituri o tutupu nei mea. Peitaʻi, a o lata mai le iʻuga, o nei mea uma o le a tutupu i se vaitaimi e tumu i faigatā, ma o le a tutupu faatasi ma isi faailoga lapataʻi e tolu ia e sosoo mai.

2. UIGA O TAGATA Ua taʻua i le Tusi Paia o le a faailogaina “aso e gata ai,” po o le vaitaimi lea e iʻu atu ai i le iʻuga, i le faasolo ina matuā leaga o uiga o tagata. O loo taʻua i le 2 Timoteo 3:1-4: “E avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.” Ioe, e lē o se mea fou le lē faaaloalo, peitaʻi e na o “aso e gata ai” ua matuā faateteleina ai lenā uiga, ma ua talafeagai ai ona faamatalaina lenā vaitaimi o “aso e sili ona faigatā.” Po ua e mātauina lenei vala i uiga o tagata?

3. FAALEAGAINA LE LALOLAGI Ua taʻua i le Faaaliga 11:18 o le a ʻfaafanoina e le Atua i latou o loo faaleagaina le laueleele.’ Ua faapefea ona faaleagaina e tagata le lalolagi? E pei lava o le vaitaimi o Noa. Ua faamatalaina e faapea: “I le silasila a le Atua moni, ua faaleagaina le lalolagi ma ua tumu le lalolagi i faiga sauā. Ona silasila mai lea o le Atua i le lalolagi, tagaʻi foʻi! ua faaleagaina.” O lea na fetalai ai le Atua e faatatau i lenā lalolagi amioleaga: “Ou te faaumatia i latou.” (Kenese 6:11-13) Po ua e mātauina le tele o faamaoniga e iloa ai ua tumu le lalolagi i faiga sauā? E lē gata i lea, ua iai tagata i se vaitaimi mataʻina i le talafaasolopito: Ua mafai e tagata ona faaleagaina moni lava le lalolagi, e ala i le fasiotia o tagata uma e faaaogā ai auupega. Ua matuā faaleagaina  foʻi le ʻea o loo tatou mānavaina, le sami, faapea le siʻosiʻomaga o meaola ma laau, ona o le lē lelei o le auala e tausia ai e tagata.

Seʻi fesili ifo: ʻI le senituri ua mavae, pe sa iai i tagata le malosiaga e faaleagaina ai atoatoa i latou lava?’ I aso nei, ua mafai e tagata ona faia faapea, e ala i le faateleina o meatau ma le faatamaʻia o le siʻosiʻomaga. Ua vave le agaʻi i luma o le tomai o tagata i le faatekinolosi, ae ua lē mafai ona latou malamalama pe pulea iʻuga o na mea. Peitaʻi, e lē o tagata e filifilia pe pulea le lumanaʻi o le lalolagi. A o leʻi tafiesea ola uma mai i lenei lalolagi, ua folafola mai e le Atua o le a ia faalaa mai ina ia faaumatia i latou o loo faaleagaina le lalolagi.

4. SE GALUEGA TALAʻI I LE LALOLAGI AOAO O se isi vala o le faailoga o le iʻuga na valoia, o se galuega e leʻi faia muamua lava. “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mataio 24:14) O lenei galuega talaʻi e matuā ese mamao mai i talaʻiga ia ua autausagā o faia e le tele o lotu. O le feʻau faapitoa lea o le a faamatilatila i aso e gata ai, o le “tala lelei o le malo.” Pe e te silafia se isi tapuaʻiga o loo latou faamatilatila lenei feʻau? E tusa foʻi pe e iai ni lotu o loo talaʻia lenei feʻau, ae po o i latou e na o se vaega i lou vaipanoa, po o latou faasalalau atu lenei tala lelei “i le lalolagi atoa e fai ma molimau i atunuu uma”?

Ua taulaʻi atu le Upega tafaʻilagi o le www.mt1130.com i “lenei tala lelei o le malo.” O loo iai i lenei Upega tafaʻilagi lomiga o loo faamatala ai lenā feʻau i gagana e silia ma le 700. Pe e te silafia se isi vaega o loo tausolomua e faamatilatila le tala lelei o le Malo i le lalolagi aoao? A o leʻi taitai ona iai le Initaneti, ae ua lauiloa Molimau a Ieova i le faalauiloaina atu o le tala lelei o le Malo o le Atua. Talu mai le 1939, ua tusia i le pito i luma o Le Olomatamata faaupuga e faapea, “Faasilasilaina le Malo o Ieova.” Na taʻua i se tusi e faatatau i lotu, “e toetoe a lē mafaatusalia le tele ma le mamao ua oo i ai” le galuega talaʻi a Molimau a Ieova. O loo faamatilatila i lenei galuega talaʻi le tala lelei e faapea ua toeitiiti ona ʻoo mai lea o le iʻuga,’ e ala mai i le Malo o le Atua.

Po ua e mātauina ua tutupu i le taimi o loo e soifua ai, faailoga lapataʻi e fā mai i le Tusi Paia ia na taʻua i lenei mataupu? Ua silia i le selau tausaga o saunia mai i lenei mekasini, le tele o faamatalaga e faatatau i mea o loo tutupu i le  lalolagi, ina ia fesoasoani i ē e faitau i ai ia iloa ua tatou tulata atu i le iʻuga. Peitaʻi, e lē ioe i ai nisi tagata faitio, ma ua faapea mai e mafai ona sesē le auala e faamatala ai ni mea moni ma faamaumauga. Ua latou faapea mai foʻi, talu ai ua faigofie ona tatou faalogo ma iloa mea o loo tutupu i le lalolagi, e foliga mai ai ua faateteleina mea leaga e tutupu. E ui i lea, ua tele faamaoniga e iloa ai ua tatou iai i le taufaasiʻusiʻuga o se vaitaimi tāua i le talafaasolopito o le tagata.

E manatu nisi tagata atamamai ua tatou tulata atu i suiga tetele i lenei lalolagi. O se faaaʻoaʻoga, i le 2014, na lapataʻia ai e le Science and Security Board po o le pulega a le Bulletin of the Atomic Scientists, le Fono Tau Puipuiga a Malo Aufaatasi, e faatatau i mea mataʻutia o loo tutupu e lamatia ai ola o tagata. Ua taʻua e na saienitisi: “I se iloiloga totoʻa o nei lamatiaga, ua matou iloa ai o loo faateteleina popolega e faatatau i le mafai lea ona faaleagaina o ola o tagata ona o faiga faatekinolosi.” O le toʻatele o tagata ua matuā talitonu ua tatou iai i se vaitaimi e sili ona tāua i le talafaasolopito o le lalolagi. Ua mautinoa e i latou ua lomia ma faitau i lenei mekasini, o lenei vaitaimi tāua, e faasino atu i aso e gata ai, ma ua lata mai le iʻuga. Nai lo o le mataʻu la e faatatau i le lumanaʻi, ae e ao ona e fiafia auā e mafai ona faasaoina oe i le iʻuga.