Na ou ola aʻe i se vaipanoa e matitiva i le taulaga o Montreal. Na maliu loʻu tamā ua ono masina loʻu matua, ma na tauave uma e loʻu tinā le tausiga o lo matou aiga. O aʻu e uii i le fanauga e toʻavalu.

A o oʻu tuputupu aʻe, o se mea masani loʻu vaai i fualaau faasāina, taaloga faitupe, faiga sauā, ma faifaimea faatasi ma tagata solitulafono. I le sefulu o oʻu tausaga, na amata ai ona ou alu e fai feʻau a le ʻau talitane ma i latou e nonō atu tupe i ni pasene tetelē. O laʻu vaisū le pepelo ma le faavalea o tagata.

E 14 ane oʻu tausaga, ua ou matuā poto lava e fafau auala e faavalea ai tagata. O se faataʻitaʻiga, ou te faatau mai ni uati, taulima ma ni mama se tele e lē auro maʻoi, ona tuu lea iai o se faailoga e faapea ai e auro maʻoi, ma toe faatau atu i le auala ma paka o taavale i faleoloa tetele. Sa ou naunau e maua ni tupe vave, ma i se tasi aso na maua ai laʻu $10,000 i mea na faatau atu!

I le 15 o oʻu tausaga, na tuli ai aʻu mai i le aʻoga mo tamaiti solitulafono, ma na leai se mea ou te nofo ai. Sa ou moe i auala savali, paka mo tafaoga, po o fale o aʻu uō.

O aʻu faiga taufaavalea, na masani ai ona fesiligia aʻu e leoleo. Talu ai ou te leʻi faatauina atu ni oloa gaoi, o lea ou te leʻi falepuipui ai lava. Peitaʻi, e tetelē sala na ou totogiina ona o faiga taufaavalea, le faasesē o faamatalaga, ma le faatau atu o oloa e aunoa ma se pemita. Ou te leʻi fefe i se tagata, o le pogai lea na ou alu ai e ao mai tupe a i latou e nonō atu tupe i ni pasene tetelē. O se galuega e lamatia, ma o nisi taimi sa ou alu ma feaveaʻi se fana. O nisi taimi na matou galulue faatasi ma ni vaega o tagata solitulafono.

O le taimi muamua lava na ou faalogo ai i le Tusi Paia, o le 17 o oʻu tausaga. Sa ma nonofo faatasi ma laʻu uō teine ae amata loa ona ia suʻesuʻeina le Tusi Paia ma Molimau a Ieova. Peitaʻi, sa ou  tetee i tapulaa tau amio a le Tusi Paia, o le pogai lea na ou tuua ai laʻu uō teine ina ia nonofo ma se isi foʻi teine na ma feoaʻi.

Na suia loʻu olaga ina ua suʻesuʻe laʻu uō teine lona lua ma Molimau a Ieova. Sa ia faia ni suiga i lona olaga, ma na ou fiafia i suiga na ou vaaia. Ua amata ona ia pulea lona ita ma onosaʻi. Na ou talia se valaaulia e auai i se sauniga i le Maota mo Sauniga a Molimau a Ieova. Sa faafeiloaʻi aʻu e tagata e uiga tausaafia ma agalelei. Oka se eseesega ma uiga o le lalolagi ua ou masani ai! A o ou tuputupu aʻe o se tamaitiiti, e leʻi iai lava se taimi na ou lagona ai le alofagia e loʻu aiga. Sa tuulafoaʻia aʻu ma lē amanaʻia. O uiga māfana na faaalia e Molimau a Ieova, o uiga ia na ou matuā manaʻo i ai. Ina ua ofo mai Molimau e matou te suʻesuʻeina le Tusi Paia, na ou talia ma le fiafia.

O mea na ou aʻoaʻoina mai i le Tusi Paia atonu na faasaoina ai loʻu ola. Sa matou fuafua ma ni tama se toʻalua e gaoi mai i se tagata, ina ia totogi ai aʻu aitalafu i taaloga faitupe, lea e silia i le $50,000. Ae ua ou matuā fiafia ona ou te leʻi alu! Na faaauau pea ona alu le gaoiga a le isi toʻalua, ma na puʻe e leoleo le isi, ae fasiotia le isi.

A o faaauau ona ou suʻesuʻeina le Tusi Paia, na ou iloa ai le tele o suiga e ao ona ou faia. O se faataʻitaʻiga, ua ou aʻoaʻoina mai i le 1 Korinito 6:10: “O ē e gāoi, o ē e matapeʻapeʻa, o ē e onanā, o ē e fai upu masoā, ma ē e taufaavalea, e lē fai mo latou tofi le malo o le Atua.” Ina ua ou faitau i lenei mau, na ou tagi ona e matuiā aʻu mea na fai. Sa ou iloa ai ua tatau ona matuā suia loʻu olaga. (Roma 12:2) O aʻu o se tagata sauā ma maitaita, ma o loʻu olaga atoa e na o pepelo lava.

Peitaʻi, ua ou aʻoaʻoina mai i aʻu suʻesuʻega o le Tusi Paia, e alofa mutimutivale ma lotofaamagalo Ieova. (Isaia 1:18) Sa ou tatalo faatauanau ma ʻaiʻoi iā Ieova e fesoasoani mai ia ou saʻoloto mai i loʻu olaga na iai. O lana fesoasoani, na faasolosolo mālie ai ona suia oʻu uiga. O se laasaga tāua na ou faia, o le faatulafonoina lea o le ma faaipoipoga ma laʻu uō teine.

I le taimi lea, ua 24 oʻu tausaga ma ua ou faaipoipo ma ua toʻatolu laʻu fanau. Ua tatau nei ona suʻe saʻu galuega. Peitaʻi e leʻi lelei ni aʻu aʻoaʻoga ma e leai ni aʻu tusi pasi. Sa ou toe tatalo faatauanau foʻi iā Ieova. Ina ua ou alu e suʻe saʻu galuega, sa ou taʻu atu i pule o galuega, ou te manaʻo e sui loʻu olaga ma galue faamaoni. O nisi taimi na ou faailoa atu o loo oʻu suʻesuʻeina le Tusi Paia, ma ou te naunau ia avea ma tagata lelei. E toʻatele pule o galuega e leʻi mananaʻo e faafaigaluega aʻu. Ae ina ua ou faailoa atu loʻu olaga na iai i se tagata na faia saʻu faatalanoaga, na ia faapea mai: “Ou te lē iloa le māfuaaga, ae ua musumusuina aʻu e avatu le avanoa iā te oe.” Ou te talitonu o le tali lea o aʻu tatalo. A o faagasolo taimi, na ma papatiso uma ma laʻu avā ma avea i maʻua ma Molimau a Ieova.

O loo faaauau ona ou maua le ola ona o le faatatauina o mataupu silisili o le Tusi Paia ma ola i se olaga faa-Kerisiano. Ua ou maua se aiga fiafia. Ua ou maua foʻi se lotofuatiaifo mamā i le iloaina ua faamagalo aʻu e Ieova.

Ua 14 nei tausaga o oʻu faaaluina le 70 itula i le masina i le talaʻiga, e fesoasoani i isi ia iloa aʻoaʻoga a le Tusi Paia. E leʻi leva nei ona faia foʻi faapea e laʻu avā. I le 30 tausaga ua mavae, o se fiafiaga loʻu fesoasoani i le toʻa 22 o ē e matou te faigaluega faatasi, ina ia auauna iā Ieova. O loo faaauau pea ona ou alu i nofoaga e tele ai faleoloa, e lē ina ia faavalea tagata, ae ina ia faasoa atu i ai loʻu faatuatuaga ma le faamoemoe o le ola i se lalolagi fou i le lumanaʻi, e aunoa ma ni tagata taufaavalea.​—Salamo 37:10, 11.