LE TALI A LE TUSI PAIA: “E oo mai le itula e faalogo ai i latou uma o loo i tuugamau i lona leo [o Iesu], ma latou ō mai ai.”​—Ioane 5:28, 29.

Sa valoia e Iesu le taimi i le lumanaʻi i le pulega a lona Malo, o le a lē toe iai ni tino oti i tuugamau. Ua faapea mai Fernando lea na taʻua i le mataupu ua mavae: “Sa faateʻia aʻu i le taimi muamua na ou faitau ai i le Ioane 5:28, 29. Sa aumaia ai iā te aʻu le faamoemoe moni ma ou mafaufau ai ma le mautinoa e faatatau i le lumanaʻi.”

I aso anamua, sa faatalitalia e le tane faatuatua o Iopu o le a mulimuli ane toe faatūina o ia e le Atua pe a maliu. Na fesili Iopu: “Pe a oti le tagata, pe e toe ola mai ea o ia?” Na toe tali mai o ia ma le mautinoa e faapea: “Ou te faatali i aso uma o laʻu galuega mamafa [taimi e iai i le Tuugamau], seʻia oo ina tuusaʻoloto aʻu. E te valaau mai, ona ou tali atu ai lea iā te oe.”​—Iopu 14:14, 15.

E leʻi fou i le tuafafine o Lasalo, o Mareta, le mataupu e faatatau i le toetū. Ina ua maliu Lasalo, sa fetalai atu Iesu iā Mareta: “O le a toetū lou tuagane.” Na tali mai Mareta: “Ou te iloa e toetū o ia i le toetū i le aso mulimuli.” Sa toe fetalai atu Iesu: “O aʻu o le toetū ma le ola. O lē e faatuatua mai iā te aʻu, e ui ina oti o ia, ae e toe ola mai lava.” (Ioane 11:23-25) Ina ua uma, sa faatūina loa e Iesu Lasalo. O lenei tala ua aumaia ai iā i tatou se faaataga o mea e sili atu o le a tutupu i le lumanaʻi. Seʻi faaāta i mafaufau le toe faatutūina aʻe o tagata ua maliliu i le lalolagi aoao!

LE TALI A LE TUSI PAIA: Ua faaalia mai i le Afioga a le Atua, e ese le toetū o Iesu mai i isi toetū e valu lea e faamauina ai. O na tagata e toʻavalu sa toetutū ma ola i inei i le lalolagi. Peitaʻi ua taʻua e faatatau i le toetū o Iesu e faapea: ʻO Iesu Keriso ua afio i le lagi ma o loo i le itu taumatau o le Atua.’ (1 Peteru 3:21, 22) Pe e na o Iesu e toetū ma ola i le lagi? Muamua atu na fetalai ai Iesu i ona aposetolo: “Afai foʻi ou te alu ma sauni se nofoaga mo outou, ou te toe sau ona ou talia lea o outou, ina ia iai foʻi outou i le mea ou te iai.”​—Ioane 14:3.

Sa afio Keriso i le lagi ma sauni mo le taunuu atu o nisi o ona soo. O le aofaʻi o ē o le a toetutū ma ola i le lagi, e 144,000. (Faaaliga 14:1, 3) Ae o ā  mea a nei soo vavalalata o Iesu o le a faia i le lagi?

O le a pisi tele i latou auā ua taʻua i le Faaaliga 20:6: “E fiafia ma paia so o se tasi e iai i le uluaʻi toetū; e leai se pule a le oti faalua iā i latou nei, ae e fai i latou ma ositaulaga a le Atua ma le Keriso, e pule i latou o ni tupu faatasi ma ia mo le afe tausaga.” O ē e toetutū ma ola i le lagi o le a avea ma tupu ma ositaulaga faatasi ma Iesu, e pule mai i le lalolagi.

LE TALI A LE TUSI PAIA: O loo faamauina i le Tusi Paia faagaeeina le lauga lenei a le aposetolo o Paulo: “Ou te faamoemoe foʻi i le Atua, ma o le faamoemoe lava lenā o nei tagata, e toetutū mai tagata amiotonu ma tagata amiolētonu.”​—Galuega 24:15.

O ai o le a aofia ai i “tagata amiotonu” ia na taʻua e Paulo? Seʻi manatu i se faataʻitaʻiga. Ina ua lata ina maliu le tane faatuatua o Tanielu, sa taʻu atu i ai e faapea: “E te mālōlō ae e te tū mai i lou tofi i le iʻuga o aso.” (Tanielu 12:13) O fea o le a toetū mai ai Tanielu? “E fai lava le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) Na valoia foʻi e Iesu i le Mataio 5:5: “E fiafia o ē e agamalu, auā e fai mo latou tofi le lalolagi.” O le a toetutū mai Tanielu ma isi tane ma fafine faatuatua ma toe soifua e faavavau i inei i le lalolagi.

Ae faapefea “tagata amiolētonu” ia na taʻua e Paulo, o ai e aofia ai? O i latou ia o le faitau piliona o tagata na maliliu ae e leʻi maua se avanoa e aʻoaʻoina ai ma faatatau upu moni o le Tusi Paia. O le a latou toetutū mai ma mafai ona aʻoaʻoina ma alolofa iā Ieova * ma Iesu. (Ioane 17:3) O i latou uma lava la e filifili e auauna i le Atua, o le a maua le faamoemoe o le ola e faavavau e pei foʻi ona soifua e faavavau Ieova.

LE TALI A LE TUSI PAIA: O le Atua ʻe na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.’ (Faaaliga 21:4) “O le a latou fausia fale ma nonofo ai, e latou te totō foʻi togāvine ma latou aai i ona fua.”​—Isaia 65:21.

Seʻi faaāta i mafaufau le soifua ai i na tulaga faatasi ma ē e pele iā te oe ua toetutū mai! Peitaʻi e tumau pea le fesili, E faapefea ona e mautinoa o le a taunuu moni le toetū?