O le ā le mea na tupu? Aiseā na lē tau ai le Atua mo tagata Iutaia, e pei ona ia faia i taimi ua mavae? Ae aiseā foʻi na ia lē poloaʻia ai tagata Iutaia ia tau ni taua ina ia faasaʻoloto ai i latou mai i faiga sauā? Pe na suia le silafaga a le Atua i taua? E leai. Peitaʻi, e iai se mea na matuā suia e faatatau i tagata Iutaia. Sa latou teena le Alo o le Atua o Iesu, i le avea ai ma Mesia. (Galuega 2:36) O lea na melea ai e lenei nuu la latou faiā faapitoa ma le Atua.—Mataio 23:37, 38.

Sa lē toe maua e le nuu o Iutaia ma lo latou Nuu Folafolaina le puipuiga a le Atua, ma e leʻi toe lagolagoina pe fesoasoani le Atua i ni taua na tauina e Iutaia. E pei ona valoia e Iesu, sa aveesea faamanuiaga ma le finagalo malie o le Atua mai i le nuu faaletino o Isaraelu, ae tuu atu i se nuu fou, lea na mulimuli ane taʻua i le Tusi Paia o le “Isaraelu a le Atua.” (Kalatia 6:16; Mataio 21:43) Ua avea le faapotopotoga o Kerisiano faauuina i le agaga, ma Isaraelu faaleagaga a le Atua. Na faailoa atu iā i latou i le uluaʻi senituri e faapea: “Ua avea nei outou ma nuu o le Atua.”—1 Peteru 2:9, 10.

Talu ai o lea ua avea Kerisiano i le uluaʻi senituri ma “nuu o le Atua,” pe sa tau la le Atua mo i latou ina ia faasaʻoloto mai i faiga sauā a Roma? Pe sa ia poloaʻia i latou ia tau faasaga i ē na faasauā ane? E leai, auā na taʻua i le mataupu ua mavae, o le Atua lava ia na filifilia le taimi e tau ai taua na ia faatagaina. E leʻi tauina e le Atua ni taua mo Kerisiano i le uluaʻi senituri, pe poloaʻia foʻi i latou e tau ni taua. E manino mai, o le uluaʻi senituri e lē o le taimi lenā a le Atua e tau faasaga ai i ē amioleaga ma faasauā.

O lea, i le pei o auauna a le Atua i aso anamua, sa tatau i Kerisiano i le uluaʻi senituri ona faatalitali, seʻia oo i le taimi a le Atua e faaiʻuina ai le amioleaga ma faiga sauā. I le taimi e tasi, e leʻi poloaʻia e le Atua i latou ia tau faasaga i o latou fili. Sa faamanino mai e Iesu lenei manatu i ana aʻoaʻoga. O se faaaʻoaʻoga, e na te leʻi faatonuina ona soo ia tau ni taua, ae na ia faapea atu iā i latou: “Ia alolofa atu pea i o outou fili ma tatalo pea mo ē ua sauāina outou.” (Mataio 5:44) Ina ua valoia le osofaʻia o Ierusalema i le uluaʻi senituri e ʻautau a Roma, e leʻi faatonuina e Iesu ona soo ia nonofo pea i le aai ma tau. Nai lo o lea, na faatonuina i latou ia sosola, ma o le mea lenā na latou faia.—Luka 21:20, 21.

E lē gata i lea, na faagaeeina le aposetolo o Paulo i le agaga e tusi e faapea: “Aua tou te tauimasui, . . . auā ua tusia: ʻO aʻu e faia le tauimasui; ou te taui atu lava,’ ua fetalai mai ai Ieova.” (Roma 12:19) Sa sii mai e Paulo fetalaiga a le Atua i senituri ua mavae, lea e faamauina i le Levitiko 19:18 ma le Teuteronome 32:35. Na iloa mai i le mataupu ua  mavae, o se tasi o auala na faia ai e le Atua le tauimasui mo ona tagata i aso anamua, o le fesoasoani lea iā i latou a o tau faasaga i o latou fili. O lea, ua faaalia mai i upu a Paulo, e leʻi suia le silafaga a le Atua i taua. I le uluaʻi senituri, sa tumau ona silasila le Atua i taua o se auala talafeagai e faia ai le tauimasui mo ana auauna, ma faaiʻuina ai so o se faiga sauā ma amioleaga. Peitaʻi, e pei foʻi o aso anamua, o le Atua lava ia e filifilia le taimi e tatau ona tau ai na taua, ma po o ai foʻi e tatau ona tauina.

Ua manino mai, e leʻi poloaʻia e le Atua Kerisiano i le uluaʻi senituri e tau ni taua. Ae faapefea i aso nei? Po o poloaʻia e le Atua se vaega o tagata ina ia tau ni taua? Po o le taimi lenei mo le Atua e faalaa mai ai ma tau mo ana auauna? O le ā le silafaga a le Atua i taua i aso nei? O le a taliina nei fesili i le mataupu o loo sosoo mai.