Esekielu 11:1-25
11 Ona sii aʻe lea o aʻu e le agaga ma tuuina atu aʻu i le faitotoʻa o le pā i le itu i sasaʻe o le fale o Ieova, o le faitotoʻa o le pā lea e faasaga i le itu i sasaʻe.+ I luma o le faitotoʻa o le pā, na ou vaai ai i ni tamāloloa se toʻa 25, ma o loo iā i latou Iaasenaia le atalii o Asure ma Peletia le atalii o Penaia, o taʻitaʻi ia o le nuu.+
2 Ona Ia fetalai mai lea iā te aʻu: “Le atalii e o le tagata, o tamāloloa nei o loo faia ni faufauga leaga ma avatu fautuaga leaga i le aai.*
3 Ua latou faapea ane, ‘Pe e lē o le taimi ea lenei e fau ai fale?+ O lenei aai* o le ulo,*+ a o i tatou o le tufaaga i totonu o le ulo.’
4 “O lea, ia faia valoaga e faasaga iā i latou. Le atalii e o le tagata, inā faia ia o valoaga.”+
5 Ona oo mai lea i oʻu luga o le agaga o Ieova,+ ma ua fetalai mai le Atua iā te aʻu: “Ia e fai atu, ‘O le fetalaiga lenei a Ieova: “Le aiga e o Isaraelu, ua saʻo le tala ua outou fai ane ai, ma ua ou iloa mea ua outou manatunatu i ai.
6 Ua outou faapogaia le feoti o le toʻatele i lenei aai, ma ua outou faatumu ona auala i ē ua feoti.”’”+
7 “O lea, o le fetalaiga lenei a le Alii Pule Silisili Ese o Ieova: ‘O tino oti na outou faasalalau solo i le aai, o le tufaaga lea, a o le aai o le ulo lea.+ Ae o le a aveesea outou mai i totonu o le aai.’”
8 “‘Ua outou fefefe i le pelu,+ ma ou te faaoo atu le pelu iā te outou,’ o le fetalaiga lea a le Alii Pule Silisili Ese o Ieova.
9 ‘O le a ou aveesea outou mai i le aai, ma tuuina atu outou i lima o tagata ese, ma faaoo le faasalaga iā te outou.+
10 O le a fasiotia outou i le pelu.+ Ou te faaoo le faasalaga iā te outou i le tuaoi o Isaraelu,+ ona outou iloa ai lea o aʻu lava o Ieova.+
11 O le a lē avea le aai o se ulo mo outou, e lē avea foʻi outou ma tufaaga i totonu o le ulo. Ou te faaoo le faasalaga iā te outou i le tuaoi o Isaraelu,
12 ona outou iloa ai lea o aʻu lava o Ieova. Auā e tou te leʻi savavali e tusa ma aʻu tuutuuga, e tou te leʻi tausia foʻi iʻuga o aʻu faamasinoga,+ ae ua outou tausia iʻuga o faamasinoga a atunuu o loo siʻomiaina outou.’”+
13 Ua oti Peletia le atalii o Penaia ina ua uma ona ou faia le valoaga, ona ou faapaʻū faō lea ma alaga atu ma le leotele e faapea: “Oi auē, le Alii Pule Silisili Ese o Ieova! Po o le a e faaumatia ea i latou o totoe o Isaraelu?”+
14 Ua toe oo mai le afioga a Ieova iā te aʻu e faapea:
15 “Le atalii e o le tagata, o ou uso, o ē mai i ou uso o loo iai le aiā e toe faatau mai ai, faapea ma le aiga uma o Isaraelu, o i latou ia ua faapea atu i ai tagata ua nonofo i Ierusalema, ‘Ia faamamao ese mai iā Ieova. O i matou e ana le laueleele; ua tuuina mai iā i matou o se tofi.’
16 O lea ia faapea atu, ‘O le fetalaiga lenei a le Alii Pule Silisili Ese o Ieova: “E ui ina ou aveese mamao i latou i isi nuu ma ua ou faataapeapeina i latou i isi atunuu,+ ae e avea aʻu ma malumalu mo sina taimi iā i latou i totonu o atunuu ua latou ō atu i ai.”’+
17 “O lenei ia fai atu, ‘O le fetalaiga lenei a le Alii Pule Silisili Ese o Ieova: “O le a ou aoaoina outou mai i nuu, ma faapotopoto outou mai i atunuu na faataapeapeina i ai outou, ma o le a ou tuuina atu iā te outou le laueleele o Isaraelu.+
18 O le a latou toe foʻi atu i inā ma aveesea mea inosia uma ma mea matagā mai i le laueleele.+
19 O le a ou tuuina atu iā i latou le loto e tasi,+ ma o le a ou tuuina i totonu o i latou se agaga fou;+ o le a ou aveeseina mai i o latou tino le loto e pei o se maa,+ ma tuu atu iā i latou se loto e vaivai,*+
20 ina ia latou savavali ai i aʻu tulafono ma tausia iʻuga o aʻu faamasinoga ma usiusitaʻi i ai. Ona fai ai lea o i latou ma oʻu nuu, e fai foʻi aʻu ma o latou Atua.”’
21 “ʻ“A o ē e maumauaʻi o latou loto i le faia pea o mea inosia ma mea matagā, o le a ou taui atu iā i latou e tusa ma o latou ala,” ua fetalai mai ai le Alii Pule Silisili Ese o Ieova.’”
22 Ona sii aʻe lea i luga e kerupi o o latou apaʻau, ua iai uili i o latou autafa,+ ma ua i o latou luga le mamalu o le Atua o Isaraelu.+
23 Ona alu aʻe lea o le mamalu o Ieova+ mai i le aai, ma ua tū i luga o le mauga o loo i le itu i sasaʻe o le aai.+
24 Ona sii aʻe lea o aʻu e le agaga, e ala i se faaaliga mai i le agaga o le Atua, ma avatu aʻu i tagata na ave faapagota i Kaletaia. Ona mou atu ai lea o le faaaliga na ou vaaia.
25 Ona ou faailoa atu lea i tagata na ave faapagota o mea uma na faaali mai e Ieova iā te aʻu.
Faamatalaga Pito i Lalo
^ Po o le “faasaga i le aai.”
^ E faasino atu i le aai o Ierusalema, lea na manatu tagata Iutaia o le a puipuia ai i latou.
^ Po o le “ulo e telē le gutu.”
^ E faasino atu i se loto e gauaʻigofie i le taʻitaʻiga a le Atua.
