Esekielu 16:1-63
-
Le alofa o le Atua mo Ierusalema (1-63)
16 Ua toe oo mai le afioga a Ieova iā te aʻu e faapea:
2 “Le atalii e o le tagata, ia faailoa atu iā Ierusalema ana mea inosia o loo faia.+
3 E ao ona e fai atu, ‘O le fetalaiga lenei a le Alii Pule Silisili Ese o Ieova iā Ierusalema: “O lou tupuaga ma lou fanau mai, e mai i Kanana. O lou tamā o le tagata Amorī,+ a o lou tinā o le tagata Hetī.+
4 I le aso na e fanau mai ai, e leʻi tipiesea lou pute, e leʻi faatā‘eleina oe i le vai ina ia faamamā ai, e leʻi miliina foʻi oe i le masima, ma e leʻi afīfīina oe i ʻie.
5 E leai se isi na alofa faapelepele iā te oe ma faia ia mea iā te oe. E leai se tasi na alofa mutimutivale iā te oe. Nai lo o lea, na lafoina oe i le fanua auā na inosia oe i le aso na e fanau mai ai.
6 “ʻ“A o oʻu ui ane, na ou vaaia ai oe ua e tafiti solo i lou lava toto, ona ou fai atu lea iā te oe a o e taoto ai i inā i lou toto: ‘Inā ola ia!’ Ioe, na ou fai atu iā te oe a o e taoto ai i inā i lou toto: ‘Inā ola ia!’
7 Na ou matuā faatoʻateleina oe e pei o laau ua tutupu aʻe i le fanua, ma ua e matua ma tupu lou tino, ma ua teuina oe i teuga e sili ona matagofie. Ua popona ou susu ma ua uumi lou lauulu; ae sa e telenoa pea ma lē lavalavā.”’
8 “‘A o oʻu ui ane ma ou vaaia oe, na ou iloa ai ua talafeagai lou matua mo fefaaalia‘iga o le alofa. Ona ou faa‘afu lea o oe i loʻu ofu*+ ina ia ufiufi ai lou lē lavalavā, ma ou faia se tautoga ma osia se feagaiga ma oe, ma na fai oe mo aʻu,’ ua fetalai mai ai le Alii Pule Silisili Ese o Ieova.
9 ʻNa ou faatā‘ele foʻi oe i le vai ma faamamā ese le toto mai iā te oe ma uu oe i le suāuu.+
10 Ona ou faaofu lea iā te oe i ofu ua teuteuina, faaseevae oe i paʻu lelei o manu, faapulupulu oe i le ʻie lino lelei, ma faaofu oe i ofu taugatā.
11 Na ou teuteu oe i teuga matagofie, ma tuu taulima i ou lima ma se asoa i lou ua.
12 Na ou tuu foʻi se mama i lou isu ma tautaliga i ou taliga, ma se pale matagofie i lou ulu.
13 Ua e teuteuina pea oe i auro ma siliva, o ou laʻei foʻi o ʻie lino lelei, o ʻie taugatā, ma le ofu ua teuteuina. Ua e ʻai i le falaoamata lelei, o le meli, ma le suāuu, ua oo ina e matuā lalelei lava,+ ma ua talafeagai ona avea oe o se masiofo.’”*
14 “‘Ua oo foʻi ina taʻutaʻua oe* i nuu ona o lou lalelei,+ auā na atoatoa lou lalelei ona o loʻu lava matagofie na ou tuuina i ou luga,’+ ua fetalai mai ai le Alii Pule Silisili Ese o Ieova.”
15 “‘Ae ua e faatuatuaina lou lalelei,+ ma ua avea oe o se fafine talitane ona o lou taʻutaʻua.+ Ua e faia au gaoioiga faatalitane i ē uma na ui ane,+ ma ua fai mo i latou lou lalelei.
16 Ua e ave nisi o ou ofu ma faia ai ni mea maualuluga e lanu eseese, ma e faia ai le talitane,+ o mea ia e lē tatau ona faia, e lē tatau lava ona tutupu.
17 Ua e ave foʻi au teuga matagofie e faia mai i le auro ma le siliva na ou avatu iā te oe, ma e faia ai mo oe ni faatusa o tane ma e talitane ai ma ia faatusa.+
18 Ua e ave foʻi ou ofu ua teuteuina ma ufiufi ai ia mea, ma ua e ofoina atu i ai laʻu suāuu ma laʻu mea manogi.+
19 O laʻu meaʻai foʻi na ou avatu iā te oe, lea na faia mai i le falaoamata lelei, o le suāuu ma le meli na ou avatu e te ʻai ai, na e ofoina atu o se manogi lelei* i luma o ia faatusa.+ O le mea tonu lenā na tupu,’ ua fetalai mai ai le Alii Pule Silisili Ese o Ieova.”
20 “‘Ua e ave ou atalii ma ou afafine o ē na e fanaua mai iā te aʻu,+ ma fai ai taulaga i tupua ina ia faaumatia ai.+ Po ua lē lava ea au gaoioiga faatalitane?
21 Ua e fasiotia laʻu fanau, ma ua e faia taulaga iā i latou e ala i le faaui ane o i latou i le afi.+
22 A o e faia au mea inosia uma ma au faiga faatalitane, e te leʻi manatua aso o lou teineitiiti a o e telenoa ma lē lavalavā, ma tafiti solo i lou lava toto.
23 Oi talofa, oi talofa iā te oe, ona o nei mea leaga uma na e faia,’+ ua fetalai mai ai le Alii Pule Silisili Ese o Ieova.
24 ʻUa e faia mo oe se mea maupuʻepuʻe, ma faia foʻi mo oe se mea maualuga i nofoaga faitele uma.
25 Ua e faia au mea maualuluga i vaega e sili ona iloagofie o auala uma, ua e faia foʻi lou lalelei ma mea inosia e ala i lou talia o ē uma e ui ane,+ ma ua e faateleina au faiga faatalitane.+
26 Ua e talitane i atalii o Aikupito,+ o ou tuaoi ia e tuʻinanau tele i feusuaʻiga, ma ua e faatigā mai iā te aʻu i le tele o au faiga faatalitane.
27 O lea, o le a ou faaoo atu loʻu lima e faasagatau iā te oe ma faaitiitia au meaʻai,+ ma tuuina atu oe ina ia faia ai le mea e loto i ai fafine ua ʻinoʻino iā te oe,+ o afafine o Filisitia, o ē ua ʻinoʻino ona o au amioga matagā.+
28 “‘Ua e talitane foʻi i atalii o Asuria+ ona ua lē faamalieina oe, ma ina ua uma ona e faia faiga faatalitane ma i latou, e leʻi faamalieina ai lava oe.
29 O lea, ua e faateleina ai pea au faiga faatalitane i le nuu o ē faia fefaatauaʻiga,* e oo foʻi i tagata Kaletaia,+ ae e leʻi faamalieina ai lava oe.
30 Pagā le vaivai o lou loto,’* ua fetalai mai ai le Alii Pule Silisili Ese o Ieova, ‘ona o lou faia o nei mea uma, ma amioaʻi e pei o se fafine talitane faauamaaa!+
31 Ae ina ua e fausia mo oe se mea maupuʻepuʻe i vaega e sili ona iloagofie o auala uma, ma faia au mea maualuluga i nofoaga faitele uma, e leʻi pei oe o le fafine talitane masani, auā ua e teena se totogi.
32 O oe o se avā e mulilua, o sē e momoe ma tane ese ae e lē o lana lava tane!+
33 E avatu e tagata se meaalofa i fafine talitane uma,+ a o oe, ua e avatu meaalofa iā i latou uma e tuʻinanau tele iā te oe,+ ua e avatu foʻi meaalofa i se auala faaalatua, ina ia latou ō mai ai iā te oe mai i itu uma ina ia faia faiga faatalitane.+
34 Ua ese lava oe mai i isi fafine e faia faiga faatalitane. E leai se tasi ua faia faiga faatalitane e pei ona e faia! Ua e avatu le totogi i isi, nai lo o le totogiina mai o oe. Ua matuā ese lava mea ua e faia.’
35 “O lea, le fafine talitane e,+ inā faalogo mai ia i afioga a Ieova.
36 O le fetalaiga lenei a le Alii Pule Silisili Ese o Ieova: ‘Talu ai ua faaalia lou tuʻinanau tele i feusuaʻiga, ma ua faaalialia lou lē lavalavā i au faiga faatalitane ma ē ua tuʻinanau iā te oe ma au tupua inosia*+ uma, ia ua e ofoina atu i ai toto o lau fanau,+
37 o lea, ou te faapotopoto faatasi ai i latou uma ua e tuʻinanau i ai, o i latou ia na e faamalieina, faapea i latou uma ua e alofa i ai ma i latou uma ua e ʻinoʻino i ai. O le a ou aoaoina faatasi i latou e faasagatau atu iā te oe mai i itu uma, ma faaaliali atu iā i latou lou lē lavalavā, ma e latou te vāai i lou matuā lē lavalavā.+
38 “‘Ou te faasalaina oe i faasalaga ua tatau i fafine mulilulua+ ma fafine faamasaatoto,+ o le a faamasaaina foʻi lou toto ona o loʻu ita tele ma loʻu fuā.+
39 O le a ou tuuina atu oe i o latou lima, ma o le a latou soloia au mea maupuʻepuʻe ma lepetia au mea maualuluga;+ e latou te toese ou ofu+ ma ave au teuga matagofie+ ma tuua telenoa ma le lē lavalavā oe.
40 E latou te aumaia tagata e toʻatele+ e faasagatau iā te oe, e latou te fetogia foʻi oe+ i maa ma fasiotia oe i a latou pelu.+
41 E latou te susunuina ou fale i le afi+ ma faaoo le faasalaga iā te oe i luma o mata o fafine e toʻatele; o le a ou faamutaina au faiga faatalitane,+ ma o le a e lē toe avatuina se totogi.
42 O le a ou faamutaina loʻu ita tele iā te oe,+ ma o le a liliuese loʻu ita mai iā te oe;+ ona ou toʻafilemu ai lea ma lē toe tigā ai loʻu loto.’
43 “‘Talu ai e te leʻi manatua aso o lou teineitiiti+ ma ua e faatupuina loʻu ita e ala i le faia o nei mea uma, o lea o le a ou taui atu ai iā te oe e tusa ma ou ala,’ ua fetalai mai ai le Alii Pule Silisili Ese o Ieova, ‘ma o le a e lē toe faia au amioga matagā ma au gaoioiga inosia uma.
44 “‘Faauta! O i latou uma e faia faaupuga masani, o le a latou faia lenei faaupuga masani iā te oe: “E soo le tama teine i lona tinā!”+
45 O oe o le tama teine a lou tinā, o lē e ʻinoʻino i lana tane ma lana fanau. O oe foʻi o le uso o ou uso, o ē e ʻinoʻino i a latou tane ma a latou fanau. O lo outou tinā o le tagata Hetī, a o lo outou tamā o le tagata Amorī.’”+
46 “‘O lou uso matua o Samaria lea,+ o lē ua nofo i lou itu i mātū* ma lana fanau teine,*+ ae o lou uso e laʻitiiti iā te oe, o lē e nofo i lou itu i saute,* o Sotoma+ lea ma lana fanau teine.+
47 E lē gata na e savali i o latou ala ma mulimuli i a latou mea inosia sa faia, ae i se taimi puupuu, ua sili atu ona leaga mea uma ua e faia nai lo o i latou.’+
48 Ua fetalai mai le Alii Pule Silisili Ese o Ieova le Atua soifua: ‘Ou te tautō iā te aʻu lava, e leʻi faia e lou uso o Sotoma ma lana fanau teine, mea na e faia ma lau fanau teine.
49 Faauta! O le mea sesē lenei a lou uso o Sotoma: Na mimitavale+ o ia ma lana fanau teine,+ na tele a latou meaʻai,+ ma ola saʻoloto e aunoa ma le popole;+ ae e latou te leʻi fesoasoani i lē ua puapuagatia ma lē ua mativa.+
50 Na faaauau pea ona latou faualuga+ ma faia pea amioga inosia i oʻu luma,+ o lea na ou manatu ai ua talafeagai ona aveesea i latou.+
51 “‘E leʻi faia e Samaria+ le ʻafa o au agasala. Ua e faateleina pea au mea inosia e fai e sili atu i lo o i latou, ma ua oo ai lava ina foliga mai e amiotonu ou uso ona o au mea inosia uma ua faia.+
52 O lea, ia e onosaia lou faalumaina ona ua e taʻutonuina amioga a ou uso. Ona o lau agasala o le faia o mea e sili ona inosia nai lo o mea na latou faia, ua sili ai ona amiotonu i latou nai lo o oe. O lea, ia e māsiasi ma ia e onosaia lou faalumaina, ona o oe ua foliga mai ai ua amiotonu ou uso.’
53 “‘O le a ou aoaoina o latou tagata na ave faapagota, o ē na ave faapagota o Sotoma ma lana fanau teine, faapea ma ē na ave faapagota o Samaria ma lana fanau teine; o le a ou aoaoina foʻi ou tagata na ave faapagota faatasi ma i latou,+
54 ina ia e onosaia ai lou faalumaina; ma o le a e lagona le faalumaina ona o mea na e faia ua faamāfanafanaina ai i latou.
55 O le a toe foʻi ou lava uso o Sotoma ma lana fanau teine i lo latou tulaga na iai muamua, o le a toe foʻi Samaria ma lana fanau teine i lo latou tulaga na iai muamua, ma o le a e toe foʻi ma lau fanau teine i lo outou tulaga na iai muamua.+
56 E te leʻi taʻua lava lou uso o Sotoma i aso o lou mimitavale,
57 a o leʻi faaalialia lou lava amioleaga.+ A o lenei, ua faalumaina oe e tama teine a Suria atoa ma ona tuaoi, ma ua tauemua oe e tama teine a Filisitia,+ o i latou ia ua i ou itu uma.
58 O le a e selesele āuga o au amioga matagā ma au mea inosia na fai,’ ua fetalai mai ai Ieova.”
59 “O le fetalaiga lenei a le Alii Pule Silisili Ese o Ieova, ‘O le a ou faia nei iā te oe e tusa ma mea ua e faia,+ auā ua e ʻinoʻino i le tautoga i lou solia o laʻu feagaiga.+
60 Ae o le a ou manatua le feagaiga na ou osia ma oe i aso o lou teineitiiti, ma o le a ou faia ma oe se feagaiga e tumau.+
61 O le a e manatua au amioga ma e lagona ai le faalumaina+ pe a e taliaina ou uso, o ē e matutua iā te oe atoa ma ē e lāiti iā te oe, ma ou te tuuina atu i latou e fai ma au fanau teine, ae e lē faapea ona o se feagaiga ua osia ma oe.’
62 “‘O le a ou osia foʻi laʻu feagaiga ma oe; ma o le a e iloa ai o aʻu lava o Ieova.
63 Ona e manatua ai lea ma o le a e matuā māsiasi ai e tautala ona o lou faalumaina,+ pe a ou faia le togisala mo oe e ui i mea uma na e faia,’+ ua fetalai mai ai le Alii Pule Silisili Ese o Ieova.”
Faamatalaga Pito i Lalo
^ Po o le “pito ofu.”
^ Po o le “talafeagai ona e maua se tulaga tautupu.”
^ Epe., “Ua oo atu lou igoa.”
^ Po o le “manogi ua faamalieina ai.”
^ Epe., “nuu o Kanana.”
^ Pe atonu “Ua matuā tumu aʻu i le ita tele iā te oe.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ Epe., “i lou itu tauagavale.”
^ E foliga mai e faasino atu i tamaʻi aai.
^ Epe., “i lou itu taumatau.”
